BS aqqutigalugu illuutit

Nunarput tamakkerlugu boligstøttemit, nammineerluni aamma sanaqateqarluni illuliornermut taarsigassarsiat tamaasa INIp aqutarai


Boligstøttemit illuliaq sunaava?

Boligstøttemit illuliat tassaapput illut, danskit naalagaaffiata aammalu kingusinnerusukkut taamani namminersornerullutik oqartussaasut aningaasaliissutaannik sananeqartut. Illut amerlanersaat 1950’ikkunni aammalu 1960’ikkunni sananeqarput.

Illunut nutaanut boligstøttemit taarsigassarsiat ukiuni kingullerni tunniunneqarneq ajorput. Taamaattoq suli periarfissaavoq boligstøttemit illuliamik piginnittunngornissaq, taarsigassarsinermi piumasaqaatit allanngortinnagit piginnittut paarlaannerisigut illut pioreersut pigilerlugit. Boligstøttemit illuliaq inuttaqanngitsoq boligstøttemit piumasaqaatit tunngavigalugit piginnittunngornissaq maannakkorpiaq periarfissaqanngilaq, boligstøttemit illuliat inuttaqanngitsut tamarmik tamanut ammasumik annerpaamik neqeroortunut tunineqartarmata.

Boligstøttemit illulianut taarsigassarsinissamik aaqqissuussinerit marluk periarfissaapput. Aaqqissuussinermi siullermi illumik piginnittoq terminit akilernissaannut Namminersorlutik Oqartussanit taperneqartarpoq. Illumik piginnittoq aammattaaq Namminersorlutik Oqartussat eqqarsaatigalugit arlalinnik pisinnaatitaaffeqarlunilu pisussaaffeqarpoq.

Aaqqissuussinerup aappaani illumik piginnittoq termininut tapiiffigineqarneq ajorpoq, taarsiulluguli illumik piginnittutut kiffaanngissuseqarnerulluni. Illut taarsigassarsinermi taamatut aaqqissuussiffigineqartut ikittuinnaammata, taamatut aaqqissuussineq tulliuttuni nassuiarneqassanngilaq.
 

Nammineerluni illuliaq sunaava?

Nammineerluni illuliaq tassaavoq illu, ”Nammineerluni illuliortunut aningaasaleeriaaseq” malillugu akilersorneqartoq.
Januaarip 1. 2008-mit aningaasaleeriaaseq taanna atorlugu nammineerluni illuliornissaq periarfissaajunnaarpoq. Tamatumunngalu taarsiullugu "sanaqateqarluni illuliorneq" periarfissaalernikuulluni.

 

Sanaqateqarluni illuliorneq sunaava?

"Sanaqateqarluni illuliorneq" tassaavoq piginnittussaq sanaartornermik ilinniarsimasumik ikiorteqarluni illuliorneq. Sanaqateqarluni illuliorneq aaqqissuussineq aqqutigalugu illit nammineq illuit sananissaanut Namminersorlutik Oqartussat taarsigassarsiarititaat erniaqanngitsut taarsersugassaanngitsullu qinnuteqaatigisinnaavatit. Qanoq annertutigisunik taarsigassarsisinnaanissinnut inoqutigiiususi ukiuni kingullerni tallimani isertitasi aallaaviussapput, naatsorsorneqartassallutillu malittarisassat kiisalu porcent-it aaliangersakkat malillugit.

Boligstøttemit, nammineerluni imaluunniit sanaqateqarluni illuliamik piginnittutut arlalinnik pisussaaffeqarputit.

Taarsigassarsiat akilernissaannut illumik atuisinnaanermik killilersuutit makku atuupput:

• Illu qularnaveeqqutigineqassanngilaq eqqartuussisulersuutigineqaranilu
• Illu ingutserneqassanngilaq
• Illu allanngortinneqassanngilaq attartortinneqassananilu, aatsaallu Naalakkersuisut akuerippassuk illu piffissap ilaani piumasaqaatit malillugit inoqanngitsutut qimanneqarsinnaalluni
• Illu Namminersorlutik Oqartussanut imaluunniit pisiarinnittumut Namminersorlutik Oqartussat akuerisaannut taamaallaat piumasaqaatit malillugit tunniunneqarsinnaavoq

BOLIGSTØTTEMIT ILLULIANI TAARSIGASSARSIAT SUMIGINNARSORINEQASSAPPUT:

• Erniat akilersuutillu piffissaq eqqorlugu akilerneqanngippata
• Taarsigassarsisup illu illersorneqarsinnaasumik aserfallatsaaliunngippagu
• Illu ikuallattoornissamut anorersuamillu innarlernissamut sillimmaserneqanngippat
• Illu ingutserneqarpat
• Illu akuersissutitaqanngitsumik inuussutissarsiorfittut aaqqissorneqarpat imaluunniit inuussutissarsiorfiuppat
• Taarsigassarsisoq nuuppat ima-luunniit Naalakkersuisunit akue-rineqarani illu attartortippagu 
• Illu qularnaveeqqutigalugu taarsigassarsisoqarpat
• Naalakkersuisut illumik misissueqqusaanngippata
• Naalakkersuisut taarsigassiissutaat atorlugit illu allineqanngippat pitsanngorsarneqaraniluunniit

NAMMINEERLUNI ILLULIANI TAARSIGASSARSIAT SUMIGINNARSORINEQASSAPPUT:

• Sanaartorneq pisariaqanngitsumik kinguartinneqarpat naammassineqaranilu
• Erniat akilersuutillu piffissamut akilerneqanngippata aamma allakkatigut peqquneqarnikkut kingusinnerpaamik ullut 7 kingorna akiitsut akilerneqanngippata
• Taarsigassarsisup illu illersorneqarsinnaasumik aserfallatsaaliunngippagu paarinerlullugulu
• Illu ikuallattoornissamut anorersuamillu innarlernissamut sillimmaserneqanngippat
• Illu ingutserneqarpat nuunneqarpalluunniit
• Naalakkersuisut akuersitinnagit illu titartakkanit nassuiaatinillu akuerineqartunit allanngortinneqarpat
• Illu aalajangersimasumik najukkatut atorneqanngippat imaluunniit allamut tunniunneqarpat imaluunniit akuerineqanngitsumik illu inoqartinneqanngippat

PIGINNITTUP PISINNAATITAAFFII:

• Akileraartarnermut nalunaarsuiffimmi erniat akilerneqartut ilanngaatigalugit. Ukiumut naatsorsuutit imaluunniit erniat ilanngaatigisinnaanerinut allakkat nalunaarsuiffimmut atukkit akileraartarfimmullu siunnersoqqullutit.
• Qaqortumi, Nuummi, Sisimiuni Ilulissaniluunniit 180.000 kr. inorlugit isertitaqarlutit najugaqaruit tapiissutinik qinnuteqarsinnaavutit
• Pitsanngorsaanermut iluarsaassinermulluunniit realkredit-imit taarsigassarsiniarit (Qaqortoq, Nuuk, Sisimiut & Ilulissat)
• Meeqqamut 18-it inorlugit ukiulimmut 7,5 %-inik tapisiaqarit, meeqqat 6-it tikillugit
• Pisussaaffiusumik sillimmasiissuteqaruit, anorersuarmit ikuallattoornermillu innarlernernut aningaasartuutit akilersikkit
• Nunaminertamik sananissamillu kommunimit akuersissuteqarlutit aneersuartarfiliorit quiliorlutillu
• Taarsigassarsinermi piumasat allanngortinnagit illu kia tigussaneraa siunnersuutigiuk

• Aapparisavit illu najorsinnaavaa utoqqaat illuannut nuukkuit
• Toqussaguit illu kingornussisuit aappavilluunniit tigusinnaavaat imlt. Namminersorlutik Oqartussanut utertillugu
• Taarsigassanut immikkut sinneruttunilluunniit ataatsimut akiliineq
• Taarsigassat akilerpata illullu allagartaa eqqartuussivimmi nalunaarsorneqarpat, illu sumilluunniit atorsinnaavat
• Taarsigassat akiitsullu allanngortinnissaat qinnutigisinnavat
• Taarsigassat akiitsullu aaqqissuuteqqinnissaat qinnutigisinnaavat
• Akiitsunik isumakkeerfigitinnissaq qinnutigisinnavat
• Nuukkallarnermi illu INI aqqutigalugu attartorallartissinnaavat
• Allamut nuukkallarnermi illup inoqannginnissaa INI aqqutigalugu qinnutigisinnavat
• Akilersuinissamik kinguartitsinissamillu qinnuteqarsinnaavutit. INI oqaloqatigiuk

INIp boligstøttemit illuliani nammineerlunilu illuliani taarsigassarsianut tamanut terminimut akiliutissat kiisalu akiligassat kinguaattoorutinngorsimasut akilersinniarnerat isumagisarpai.

Matumani boligstøttemit illulianut nammineerlunilu illulianut akiliutissanut nalinginnaasumik piumasaqaatit nassuiarneqarput. Aammattaaq illup pinngitsaaliissummik tiguneqarnissaata pinngitsoortinnissaa qanorlu inoqutivit illumit anisitaanissaasa pinngitsoornissaat matumani atuarsinnaavatit.

Terminimut akiliutissat qaqugukkut akilerneqarsimassappat?
Boligstøttemit taarsigassarsiat ukiup affaanut terminit akilerneqartarnerisigut akilersorneqartarput akiligassanngortarlutillu 1. majimi aamma 1. novemberimi.

Akiliinerit tamarmik piffissamik eqquilluni akiliinerussapput kingusinnerpaamik akiliiffissanngortussap ullua qaammammik ataatsimik kingoqqullugu akilerneqarunik, tassalu 31. maj aamma 30. november. Akiliiffissanngortussaq imaluunniit piffissaq eqqorlugu akiliiffissaq nalliuttuuppat arfininngornerulluniluunniit, akiliinissaq ulluinnarmut tulliuttumut kinguartinneqartassaaq.

Terminimut akiliutissat akilinngitsoorukkit qanoq pisoqassava?
Nukingisaarutitut allakkat nukingisaaruteqarnermut akiliummik 50 koruuninik ilallugit kiisalu kinguaattoorutit 1000 koruunit qaangersimappatigit taakku 2 procentii akiligassavit saniatigut akiligassiissutigineqassapput.

Taarsigassarsianik aaqqissuuteqqinneqarsimasunik akiliinissamut piumasaqaatit:
1998-imili taarsigassarsiat aaqqissuuteqqinneqarsinnaalerput. Taarsigassarsianut allanngortinneqartunut taakkununnga akiliinissamut piumasaqaatit makkua atuupput:

Akiliinerit tamarmik piffissaq eqqorlugu akiliinerussapput taakkua ullup akiliiffiusussap kingornatigut ulluinnaat pingajussaanni pippata. Piffissaq eqqorlugu akiliiffissaq nalliuttuuppat arfininngornerulluniluunniit, ulloq akiliiffissaq ulluinnarmut tulliuttumut kinguartinneqassaaq.

Nukingisaarutitut allakkat nukingisaaruteqarnermut akiliummik 50 koruuninik ilallugit kiisalu kinguaattoorutit 1000 koruunit qaangersimappatigit taakku 2 procentii akiligassavit saniatigut akiligassiissutigineqassapput kisianni aningaasat koruuninut qaninnerpaanut akunnaallisarlugit.

Eqqartuussisutigut suliassanngortitsineq
Taarsigassarsinermi piumasaqaatit eqqortinneqanngippata aamma taarsigassarsisoq peqquneqaraluarluni nukingisaarutinillu allagarsisaraluarluni INImut saaffiginninngippat, soorlu akilersuinissamik isumaqatigiissuteqarnissaq anguniarlugu, taava INI allatut siumut ilisimatitseqqaarani illup pinngitsaaliissummik utertinneqarnissaa siunertaralugu eqqartuussisutigut suliassanngortitsisinnaavoq.

Eqqartuussisutigut suliassaq tamanna najukkami eqqartuussivimmi ingerlanneqalissaaq. Eqqartuussut ima oqaasertaqarpat, illu Namminersorlutik Oqartussanut piffissaliussatut taaneqartup iluani (nalinginnaasumik eqqartuussinerup inernerata tiguneraniit sap. akunnerisa sisamat qaangiunnerisigut) utertillugu tunniunneqassasoq, taava illu Namminersorlutik Oqartussanut utertillugu tunniunneqassaaq, tassalu imaappoq; illu pigisanik suli imaqarsimappat imaarneqarsimassasoq matuersaallu INImut tunniunneqarluni.

Boligstøttemit illuliamit anisitaaneq:
Taarsigassarsisoq, naak najukkami eqqartuussivik aalajangiigaluartoq, illumiit nammineq piumassutsimik nuunngippat, suliassaq, anisitsinissaq siunertaralugu politiinut tunniunneqassaaq. Anisitsisinnaanermi inoqutigiit allamut inissikkallarnissaminnik neqeroorfigineqassapput, aammalu pequtit pigisallu peerneqarsimanngippata INI pisinnaatitaavoq najugaqartup akiligassaanik pigisat poortorneqarnissaannut suliassiissalluni. Taamatut pisoqarpat pigisat qaammatit pingasut angullugit toqqortarineqassapput. Najukkani suliffeqarfinnik nutsilernermi poortuisartoqanngitsumi piginnittup pigisat paarinissaannut nammineq isumaginnittussaavoq.

Akiligassanik kinguaattoorutit akilersinniarnissaanni taakkua kommunimi akiliisitsiniartartumut nassiunneqassapput
Illu nalilerneqareerpat aammalu taarsigassarsiat illup nalilerneqarnera tunngavigalugu kinguaattoorutaasut ilanngullugit naatsorsorneqareerpata INIp akiligassat kommunimut akiliisitsiniartartumut akilersinniagassanngorlugit nassiutissavai.

Akiliinissamut piumasaqaatit taakkuusut aammattaaq nammineerluni illulianut, kapitali 4 atorlugu innaallagissamut atortulersuutit ikkussornerinut illullu toqqavissaanut taarsigassarsiartalinnut atuupput.

Boligstøttemit taarsigassarsiavit allanngortinnissaannut, isumakkeerfigineqarnissaannut allatulluunniit aaqqissuunnissaannut suut periarfissarinerlugit paasiniakkit, taamaalillutit najugaqaannarnissannut akissaqalissagavit.

Qaammatit tamaasa akiliisarneq

Boligstøttemut nammineerlunilu illulianut ernialikkanik taarsigassarsialinnut 1. maj 2009-miit akiligassat qaammatikkaartumik nassiussuunneqartalerput.
Akiliisoqarpat tapiissutit 30 procentiusut meeqqanullu tapiissutit ilanngaatigineqartarput. Akiliinermi kissaatigigukku Boligstøttekontop nalunaarsornera piumasinnaavat (kontoudtog).

Akiliisinnaanernut pitsanngorsaatissatut periarfissat pitsaasut arfinillit

1. Taarsigassarsiat sinnerisa kinguaattoorutillu allanngortinneri:

Inoqutigiit ukiumut 180.000 kr. inorlugit isertitaqarussi taarsigassarsiat sinnerisa akiligassallu kinguaattoorutit akilersorunnaarlugit erniaarullugillu allanngortinnissaannut qinnuteqarsinnavusi.

Aaqqissuussineq ilinnut inoqutinnullu illumi najugaqarallarnissinni taamaallaat atuuppoq. Nuukkussi taarsigassarsiat tamarmik ataatsikkut akiligassanngortinneqassapput.

Qinnuteqaatit maannakkut siunissamilu isertikkumaagassatit tunngavigalugit nalilersuiffigineqassaaq.

2. Taarsigassarsiat sinnerisa kinguaatoorutillu aaqqisuuteqqinneqarneri:

Akiligassavit annertunerujussui peqqutigalugit malinnaasinnaajunnaruit, taarsigassarsiavit sinnerisa akiitsuillu aaqqissuuteqqinneqarnissaannik qinnuteqarsinnaavutit.

Maannakkut siunissamilu isertikkumaakkatit aammalu maannakkut ineqarnermut aningaasartuutigisartakkatit tunngavigalugit qinnuteqaatit nalilersorneqassaaq.

3. Akiliinngitsoorallarneq:

Isertitatit assigiinngitsunik peqquteqarlutit, soorlu suliffissaarukkallarneq, napparsimaneq, ilinniartuuneq assigisaallu peqqutigalugit appariarpata, akiligassannullu malinnaasinnaajunnarallarlutit, akiliinngikkallarnissamik qinnuteqarsinnaavutit.

Akilersueqqileruit naafferartumik akilersuinissamut isumaqatigiissusiussaatit akiitsorilikkatit tamaasa ataatsikkut akilernianngikkukkit.

4. Inoqannginnerminngaanniit attartortillugu pitsaaneruvoq:

Suliffik, ilinniarneq imaluunniit allamik peqquteqarlutit nunaqarfik illoqarfilluunniit najukkat boligstøttemik imaluunniit nammineerluni illuliaq pigisat qimassimasariaqarukku INI akuersiseqqaassavat illup piffissami aalajangersimasumi inoqartinnagu qimassimanissaanut allanulluunniit attartortinnissaanut.

Akiligassat akilersorneqaannassapput, illulu sillimmateqaannassaaq, taamaanngippat taarsigassarsiat akiligassanngortinneqassammata, akilerneqanngippatalu illu Naalakkersuisunut utertinneqassaaq.

5. Naafferartumik akilersuinissamut isumaqatigiissuteqarneq:

INI naafferartumik akilersuinissamik isumaqatigiissuteqarfigineqarsinnaavoq.

Aningaaseriviit isumaqatigiissuteqarfigiuk illit kontonninngaanniit aningaasat aalajangersimasut nuunneqartarlersillugit.

6. Akiitsutoqqat isumakkeerfigineqarnissaat:

Illu utertissimagukku imaluunniit piginnittut nikinnerat aqqutigalugu illu allap pigilersimappagu illillu akiitsorilikkatit piffissap sivisoorsuunngitsup ingerlanerani akilersorsinnaanngikkukkit, taava akiitsutoqqat isumakkeerfigineqarnissaannut qinnuteqarsinnaavutit.

Qinnuteqaatit maannakkut siunissamilu isertitassatit tunngavigalugit nalilerneqassaaq.

Kissaatigigukku inooqatigisat, qitornatit imaluunniit allat boligstøttemit imaluunniit nammineerlutit illuliannik piginneqataalissasut, tamanna pisinnaavoq piginneqataalersitsinermik akuersinikkut.

Piginneqataalernissamik akuersineq:
Inuk piginneqataalernissamut akuersiguni, inuup tassuma illu eqqarsaatigalugu siullermik piginnittutulli pisinnaatitaaffiit pisussaaffiillu pigilissavai.

Piginneqataalernissamik akuersinermut piumasaqaatit:
Taarsigassarseqataanermut piginneqataalernissamilu akuerineqarnissamut pineqartoq boligstøttemit imaluunniit nammineerluni illuliamik peqariissanngilaq. Pineqartoq inissiamut imaluunniit boligstøttemit imaluunniit nammineerluni illuliamut akiitsoqassanngilaq. Pineqartorlu ineqarnermut tunngasumik allamik akiitsoqassanani.

Piginneqataalernissamut akuersissummik qinnuteqaat:
Piginneqataalernissamut qinnuteqaatitut immersugassamut allakkatigut uppernarsaatit makku ilanngunneqassapput:

• Qinuteqartup kommunimut ineqarnermut tunngasunik akiitsoqannginneranut uppernarsaat (konto naqitanngorlugu)
• Qinuteqartup Nukissiorfinnut akiitsoqannginneranut uppernarsaat (konto naqitanngorlugu)
• Ukiuni akileraarfiusuni kingullerni qinnuteqartup isertitai akileraarusigassat pillugit Akileraartarnermut immikkoortortaqarfiup paasissutissiissutai
• Qinnuteqartup akissarsiaasa / isertitaasa allagartai kingulliit pingasut
• Kuisimanermik allagartaq immaqalu katissimanermik allagartaq
• Najugaqarnermut uppernarsaat

Taarsigassarsiaqateqarnissat kissaatigissagukku, INIp boligstøttemut immikkoortortaqarfianut saaffiginnissinnaavutit taavalu qinnuteqaammik immersuinissamut ikiortillutit. Siullermik immersukkat – originalit – atsioriikkat kiisalu ilanngutat (assilisat) ALLAKKATIGUT nassiunneqassapput.

Piginneqataanermit tunuarneq:
Avinneq, inissiamut allamut nuunneq allaluunniit peqqutigalugu piginneqatigisat taarsigassarseqataanermit piginneqataanermiillu tunuarnissaq kissaatigippagu, tamanna pisinnaavoq.

Akiitsut, tassa terminimut akilersukkat, tunuarnissap ullua tikillugu akileriigassat, inuup taarsigassarseqataanermit tunuartup akilertussaassavai.

Piginneqataanermit tunuarnissaq pillugu qinnuteqaat:
Tunuarnissamik kissaateqaruit, boligstøttemut immikkoortortaqarfimmut saaffiginnissinnaavutit qinnuteqaammillu immersuinissamut ikiortillutit.

Tunuarnermut avinneq peqqutaappat, avinnermut uppernarsaatit qinnuteqaammut ilanngunneqassapput.

Allaaserisap talerpiani kipparissumit tungujortumit qinnuteqarnermi immersugassat immiussinnaavatit.

Allami najugaqarallartussanngussaguit, illuit attartortinnissaanik periarfissaqarputit. 
Illut attartortinniarukku INImut saaffiginnillutit akuersissummik qinnuteqassaatit.

Attartortitsinissamut akuersissut
Ilinniarneq, sulineq, pineqaatissinneqartunut inissiisarfimmut inissinneqarneq, napparsimaneq allalluunniit peqqutigalugit nuukkallassaguit, illuutivit attartortinnissaanut akuersissummik pisinnaavutit.

Attartortitsinissamut akuersissut ukioq ataaseq atuuttussanngorlugu tunniunneqartarpoq. Attartortitsinerpit ukioq ataaseq sinnerlugu sivitsortinnissaa kissaatigissagukku akuersissummik kingumut qinnuteqassatit.

Ilinniartuuguit, ilinniarneq tamakkerlugu illu attartortinneqarsinnaavoq.

Ataavartumik imaluunniit sivisunerusumik allami najugaqaleruit, illu utertissavat imaluunniit piginnittuunerit allamut tunniullugu.

Attartortitsinermi illit akisussaffitit
Attartortitsinermi immikkoortut uku illit akisussaaffigaatit:

• Illup sillimmasersornerata ingerlatiinnarnissaa
• Illup aserfallatsaaliornissaa
• Terminut akilersuutit akilerneqartarnissaat

Tassa illit akisussaaffigissavat terminimut akileeqqsusissutit attartortitsinerup nalaani akilerneqartarnissat.

Ineqarnermut tapiissutit aammalu meeqqanut ineqarnermut tapiissutit 
Inuup boligstøttemit imaluunniit nammineerlutit illuliannik attartortup kommunimit ineqarnermut taperneqarnissani qinnutigisinnaavaa, naak illit piginnittutut ineqarnermut taperneqarsinnaanngikkaluartutit.

Attartornerup nalaani attartortumut imaluunniit illumik piginnittumut meeqqanut ineqarnermut tapiisoqassanngilaq.

Boligstøttemit aamma nammineerluni illuliamik attartortitsinissamik qinnuteqaat
Boligstøttemit imaluunniit nammineerlutit illuliannik attartortitsiniaruit, qinnuteqaat INImut nassiutissavat. Qinnuteqaat paasissutissanik makkuninnga imaqassaaq:

• Piffissaq illup attartortinnissaa
• Attartortitsinerup peqqutaa
• Illit adresset nutaaq
• Attartortitavit kinaanera inuttullu normua allallugu
• Attartortup akissarsiaasa allagartai kingulliit pingasut
• Ineqarnermut tapiissutinik kommuni tunniutaqarpat allagartaasa assilineri
• Illumut sillimmasiissutit kingulliit akilernerisa allagartaat
• Attartortitsinerup nalaani aserfallatsaaliinermut pilersaarut, aserfallatsaaliinermut akiliutissat ilanngullugit

Allaaserisap talerpiani karsiusamit tungujortumit qinnuteqarnermi immersugassaq immiussinnaavat. Immersugassaq ilanngutassartai ilanngullugu scannerneqarsinnaavoq taavalu e-mailikkut, faxikkut allakkatigulluunniit nassiullugu.

Qinnuteqaatit INImi suliarineqareerpat, attartortitsinissaq akuerineqarnersoq pillugu nalunaarfigineqassaatit. Attartortitsinissaq akuerineqarpat, attartornermik isumaqatigiissut tigussavat, taannalu illit attartortitsivigisallu atsiussavarsi taavalu INImut utertillugu nassiullugu. Attartornermik isumaqatigiissutip assilinera tigummissallugu isumatusaarnerussaaq.

Attartortup akiliinera giro atorlugu pisinnaavoq imaluunniit illumik piginnittup aningaaserivimmi kontoanut ikisinikkut. Terminimut akiligassat attartortumut nassiunneqartanngillat.

Piffissap iluani illumik inuttaqartitsinnginneq

Maleruagassat nutaat malillugit, illumik piginnittup ilinniarneq, suliffik imaluunniit allat peqqutigalugit illu qimallugu allami najugaqartup, illu inuttaqartinnagu qimakkallarsinnaavaa (sivisunerpaamik ukiut ataasiakkaarlugit). Illumik piginnittup illu inuttaqartinnagu qimatsinissaa sioqqullugu INI akuersissuteqassaaq.

Illumik piginnittup illumut pisussaaffii allannguuteqassanngillat, illu inuttaqanngikaluarpalluunniit. Assersuutigalugu illup ikuallattoornissamut, anorersuarmiillu ajoquserneqarsinnaaneranut sillimmasersornera, illup nakkutigineqarnera aammalu terminimut ingerlaavartumik akilersornera ingerlaannassapput.

 

Assersuutigalugu illoqarfimmut imaluunniit illumut allamut nuunneq peqqutigalugu, boligstøttemit illuutivit najornissaa kissaatigiunnaarukku, periarfissaqarputit illu Namminersorlutik Oqartussanut v/INI utertissallugu.

Illu aatsaat utertinneqarsinnaavoq:

• Tunniussinissamik qinnuteqaat BS-18 piginnittunit tamanit atsiorneqarpat
• Illu pequtinik imaarneqarsimappat
• Matuersaatit INImut imaluunniit nunaqarfimmi kommunip allaffianut tunniunneqarpata

Eqqaamallugu:

• Illup sillimmasernerata atorunnaarsinnissaa
• Innaallaagissamik imermillu pilersuinerup Nukissiorfinnut matutinnissaat
• Solarimik pilersuinerup unitsinnissaa
• Kommunip teknikeqarfianit imaluunniit allaffianut eqqaavilerinerup unitsinnissaa

OBS: Unitsitsinerit pinissaasa tungaannut, kiffartuussissutit taarsigassarsisup akilersussavai.

Tunniussinissamik qinnuteqaatit immersorneri
Immersugassami allaffissat tamarmik eqqortumik akineqassapput taavalu ullulerneqarlutillu, atsiorneqarlunilu.
Illup utertinnissaanik eqqartuussaanermi kingornalu illumik qimatsinissami BS-18-imik immersuinissaq pisariaqanngilaq.

Utertitsinerup kingorna
Illu Namminersorlutik Oqartussanut v/INI utertinneqareerpat, makku pissapput:

• Illup utertinnerata kingorna imaluunniit nunaqarfimmut tikeraarnermi siullermi INIp illu nalilersussavaa
• Illu utertinneqareerpat nalilersorneqareerpallu, piginnittuunikumut naatsorsuusiortoqassaaq

Akileriigassatut aammalu akiitsut sinnerinik kiisalu kinguaattoorsimasinnaasunik Namminersorlutik Oqartussat piumasaat ilanngaatigineri piffissaliullugu illup teknikikkut – aningaasaqarnikkut nalinga aningaasatigut pisussaaffittut naatsorsorneqassaaq. Nikingassutit taarsigassarsisumut akilerneqassapput.

Taarsigassarsiat akilerneri:

Taarsigassarsisoq qaqugukkulluunniit immikkut akilersuutinik akiliisarsinnaavoq, utertitsilluni akilersuinermik sivikillisitsisunik. Immikkut ittumik akilersuutit Namminersorlutik Oqartussanit tapiissutinik pisinnaatitsipput.


Nammineerluni illuliamik utertitsineq
Nammineerluni illuliat Namminersorlutik Oqartussanut tunniunneqartarneri nalinginaasuunngilaq, taarsiulluguli piumasaqaatit allanngortinnagit piginnittut nikinneri innersuussutigineqassaaq. Taamaattoq immikkut pisoqarnerani INIp taarsigassarsisoq illumik tuniniaanerani ikiorsinnaavaa.

Inatsisitigut sillimmasersimanissamik piumasaqaatit

Inatsisartut Peqqussutaat nr. 11, 19. november 2007-imeersoq tunngavigalugu illuutillip isumagissavaa minnerpaamik illup anorersuarmut ikuallattoornermullu sillimmasersimanissaa. Ikuallattoqarpat illuutillip sillimmasiisarfik ingerlaannaq attaveqarfigissavaa, illullu annerusumik ajoqusinnginnissaa isumagissallugu. Sillimmasiisarfimmut nalunaarutip INImut nassiunneqarnissaa INIp qinnutigisarpaa, qatserisartut aammalu ajornanngippat politiit nalunaarusiaat ilanngullugu.

Sillimmasiisarfimmiit taarsiissutit
INIp Namminersorlutik Oqartussat sinnerlugit isumagisussaavaa, sukkulluunniit illup nalingata taarsigassarsianut qularnaveeqqutitut atorneqartup matussutissaqarnissaa, illumi qularnaveeqqusiussat nalinginut. Taamaattumik INIp Namminersorlutik Oqartussat sinnerlugit piumasaraa illumik piginnittup, sillimmasiisarfiup kiisalu INIp akunnerminni sillimmasiisarfimmiit suut taarsiiffigineqassanersut isumaqatigiissutigisassagaat.

Illu nungulluni ikuallappat
Illup ikuallattup nutaamik taarserneqarnissaata qulakkeernissaa aallaavigineqassaaq, taassuma kingorna taarsigassarsiat ingerlareersut illumi nutaami qularnaveeqquteqarlutik ingerlaannartussaammata. Illup ikuallannikup sinneri toqqavialu Sillimmasiisarfimmit isumagineqartumit peerneqassapput.

Nutaamik illuliornissaq illup sillimmataata matussusersinnaanngippagu Namminersorlutik Oqartussat taarsigassarsiat pioreersut qaavatigut taarsigassarsititseqqissinnaanngillat.

Sillimmasiisarfiup illumik piginnittut illumik allamik pisoqaanerusumik angissutsimigut sananeqaammigullu ikuallannikumut sanilliunneqarsinnaasumik taarsissallugu neqeruussappat, Sillimmasiisarfiup Namminersorlutik Oqartussanut INIkkoorlugu allakkatigut uppernarsassavaa taarsigassarsiat qularnaveeqqutaat illumi taartaasumi matussuserneqarsinnaasut, tamanna taarsigassarsiatoqqat qularnaveeqqullu pioreersoq illumi nutaami ingerlaqqiinnartussaanerannik peqquteqarpoq.

Illuliornerup nalaani imaluunniit iluarsaassinerup nalaani inissiigallarnissaq
Illup taartissap sananerata imaluunniit illup iluarsaannerata nalaani inissiigallarnissaq pisariaqarpat tamanna illumik piginnittup Sillimmasiisarfiullu akornanni isumaqatigiissutigineqassaaq, INImullu nalunaarutigineqarluni, INIp allaffissornikkut sullissisutut sukkulluunniit nalussanngimmagu illuutilik sumi najugaqarallartinneqarnersoq.

Ajoqusernerit minnerusut
Illu annikitsuinnarmik ikuallannermii ajoqusersimappat illumik piginnittup tamatigut ajoquserneq piaarnerpaamik iluarsineqassasoq qulakkiissavaa, illumi taarsigassarsianut qularnaveeqqummut atorneqartut sukkulluunniit nammattumik matussutissaqartinnissaat qulakkeerniarlugu.

Qaamammoortumik akiligassat ingerlaannassapput
Illumik piginnittup eqqumaffigissavaa qaammatikkaartumik akiligassiissutit illu ikuallassimagaluarpalluunniit ingerlaannartussaammata. Akiliinngitsoorneq taarsigassarsianik paarsinerlunnertut isigineqassaaq. Taamaattumik piginnittup akiligassat akilersortuartussaavai illu ikuallassimagaluarpalluunniit.

Illu sillimmasersimanngippat imaluunniit amigartumik sillimmaateqarpat
Illu amigartumik sillimmateqarpat imaluunniit sillimmaserneqarsimanngippat taarsigassarsinermi piumasaqaataasunik paarsinerlunnertut isigineqassaaq (takuuk Boligstøttemut Peqqussutip § 35 imm. 3.). Taamaattumik taarsigassarsiat sinneri ingerlaannartumik akiligassanngussapput, illuutilillu taarsigassarsiat sinnerini tamakkerlugit akiligassamik akiitsoqarpallu taakku ilanngullugit nassinneqassaluni.

Attavissaq:

INIp Boligstøttemut immikkoortortaqarfia
Box 1020
3911 Sisimiut

Mail: BS-afdeling@ini.gl
Oqarasuaat: 70 10 00, 1 tooriarlugu 2 toorlugu
Fax: 86 57 00

Regine Lennert: Kujataaniit Kangaatsiaq ilanngullugu.

Naja Nielsen Storch: Qeqertarsuaq, Ilulissat, Uummannaq, Nunattalu kangia.

Evelyn Frederiksen: Aasiaat, Qasigiannguit, Upernavik, Qaanaarlu. 

Acceptér cookies fra dette site

Denne hjemmeside bruger cookies til af forbedre din oplevelse af sitet
Du kan altid slette cookies via de avancerede indstillinger i din browser

Acceptér ikke cookies Acceptér kun funktionelle cookies Acceptér alle cookies