Oquk pillugu

Inissiarpassuarni oquk ajornartorsiuutaajartuinnarpoq, Naalakkersuisullu innuttaasunut kajumissaarutigaat, oquup siaruarnissaanut pitsaaliuinermi peqataaqqullugit.

Illit najukkanni oqummut akiuunnermi suut iliuuserisinnaallugit uani atuakkit.

 

Pitsaaliuineq

Inuit sisamat ilaqutariittut ulloq unnuarlu anersaartornerminni, uffartarnerminni, igasarnerminni erruisarnerminnilu imermik 15 liiterimik pilersuisartut nalunngiliuk? Oquk isugutattumi naasartoq nalunngiliuk? Inissianni uffareernerup kingorna uffarfiup iigaasa naqqatalu ujarattai allartertarlugit, illup iluani errortanik manisinaveersaarlutit ullullu tamaasa ullormut pingasoriarlutit minutsini pingasuni silaannarissaasaruit, oquk naatinngitsuussavat.

 

Eqqiaaneq

Qaqorsaatit immikkut ittut atorlugit oquk piuneerutsissinnaallugu nalunngiliuk? Rodalon, Klorin imaluunniit Miller Afrens uffarfimmi, igalaat saavini aammalu igaffimmi errorsisarfimmilu isugutattuni oquk asallugu peersissinnaavat. Oqummik asaalluni piiaaneq ulorianartortaqanngilaq. Namminneerlutit taamaaliorsinnaavutit. Eqqiluisaarnerup oquk unitsissinnaavaa.

 

Nammineerluni akisussaaffik

Illit nammineerlutit, inoqutivit imaluunniit pulaartuit illersorneqarsinnaanngitsumik pissusilersorneq peqqutigalugu taarsiisussaaneq illit akisussaaffigaat. Oqummik naasoqalernera nammineerlutit pisuussutigisinnaavat. Silaannarissarfittut ammanerit matoorneqassanngillat taavalu errorsivik erruivillu ilinniarsimasumit ikkunneqarnissaat isumagissavat.

 

Isugutak ingalassimatiguk

Oquk isugutammi naalluartarpoq. Illup iluani atisanik manisinaveersaaruit, uffarnerup kingorna iikkat naterlu allartertarukkit kiisalu inigisat ullormut marloriarlugu silaannarissartarukku, oqummut akiuullualereersimassaatit.

 

Oquit pinngorfii tassaapput oquit mikisuararsuit, naatsiiassatik atorlugit silaannakkut siaruartartut. Naatsiiassat isugutattumi oqunngorsinnaapput. Tassa allatut oqaatigalugu; oquk isugutattumi naalluartarpoq.

Oquk naasunut assingutinneqarsinnaavoq. Naasutulli issumiittumi iikkani, qilaani igalaallu saavini itisuunik sorlanittarpoq. Oquk qaavatigut takusinnaasarput qorsuppaluttui tassaapput ”sikkerneri”. Oquup ”sikkerneri” pinngortitami naasutulli allatut, silaannakkut naatsiiassanik siammarterisarput.

Oquup naatsiiassai ulorianartuupput. Naatsiiassat silaannarmiittut amerliartortillugit ulorianarnerulissapput. Taamaattumik silaannarissaanerinnaq iluaqutaassaaq. Taamaaliornikkut inissiap ilua silaannarississaaq naatsiiassartaqanngitsoq. Arlaata qaava minnerusumik oquttaqartoq nammineerlutit bakteriaajaammik, soorlu klorinimik Rodalonimillu, salissinnaavat. Annerusumik oquttut ilinniarsimasumit isumagineqassapput.

 

Oqoqarneranik pasitsaassimasaqarpit?

Najukkanni oqoqartoq pasitsaassimagukku, tamanna INI-mut saaffiginnissutigisariaqarpat.

Nittartakkatsinni qarasaasiatigut immersugassaq immersorlugu, oqoqarneranik pasitsaatigisat nalunaarutigisinnaavat (takuuk qulaani talerpiatungaani immersugassaq) – imaluunniit INI-mut sianerlutit sanaartukkanik nakkutilliisumik oqaloqatiginninnissat qinnutigalugu. 

Nalunaarutivit qanoq suliarinissaanut INI-mi aalajangersimasumik suleriaaseqarpugut: 

1. Illup immikkoortuanit oqoqarsorisannit misiliummik tigusiniarluta najukkannut ornigutissaagut. Misiliut kiliortuinikkut naqitsinikkulluunniit tiguneqassaaq. Ilutigitillugu oquup qanoq annertutiginera nalilissavarput. 

2. Misiliut Teknologisk Institutimut naggorissagassanngorlugu misissugassanngorlugulu nassiutissavarput, misiliutip sumit tiguneqarneranik oquttullu qanoq annertutigisinnaaranik nassuiaatit ilanngullugit.

3. Sap. Ak. 3 – 4 kingorna Teknologisk Institutimit akissut tigussavarput. Akissummi misiliut ilumut oquunersoq ilisimatitsissutigineqassaaq. Ammattaaq akissummi allassimassaaq oquk sorliunersoq aammalu qanoq annertutiginersoq. Naggasiutitullu Teknologisk Institutip innersuutigissavaa, iliuuserisassat suut aallartinneqassanersut.

4. Tamatuma kingorna iliuuserisassatut inassutigineqartut INI-p aallartissavai. Iliuuserisassat assigiinngitsuusinnaapput; klorinimik asaanermiit sanaartornermi atortunik taarsersuinermut. Inip suliarineqarnerani immikkut pisoqartillugu suliat ingerlannerini inissikkallarneqarnissaq INI-p isumagisinnaavaa. 

2007-imi ukiaanerani INI-p sanaartukkanik nakkutilliisui oquk pillugu pikkorissaanermi Teknologisk Institutimit immikkut ilisimasalinnit ingerlanneqartumi peqataapput. Taamaattumik sanaartukkanik nakkutilliisut oqummik nalunaarnerit pillugu ilinniarsimarpalaartumik naammassisaqarfiusumillu iliuuseqassallutik ilinniarsimasuupput.

 

Acceptér cookies fra dette site

Denne hjemmeside bruger cookies til af forbedre din oplevelse af sitet
Du kan altid slette cookies via de avancerede indstillinger i din browser

Acceptér ikke cookies Acceptér kun funktionelle cookies Acceptér alle cookies