Siunnersuutit

Kiassarnermut imermillu atuininnut sipaarfissatut siunnersuutit

Nuna tamakkerlugu kommunet Namminersorlutillu Oqartussat inissiaataasa amerlanersaat kiassarnermut uuttortaatilersugaanngillat. Tamatuma kingunerisaanik attartortut imermik kissartumik inissiallu kiassarnerannut atuinertik naapertoqqissaarlugu akiliineq ajorput, inissialli kvadratmeterinngorlugu annertussusaat naapertorlugu akiliisarlutik. Inissiani uuttortaatilersukkani attartortut atuisimanertik naapertorlugu imermut kiassarnermullu akiliisarput. Uuttortaateqaraanni uuttortaateqanngikkaanniluunniit akiligassat qaffasissinnaapput appasissinnaallutilluunniit. Atuisutut atuinerit qanoq killilersimaarniarsarisinnaanerit quppersakkami uani takusinnaavat.

 

1. Silaannarissaasarit

Inissiami silaannaq isugutakkaangat inissiaq kiassaruminaannerusarpoq, inissiamilu silaannaq isugutanngikkaangat kiassaruminarnerusarluni. Ullormut arlaleriarlutit sivikitsumik noqqoruutsitsillutit silaannarissartarit. Sivisunerpaamik minutsini qulini noqqoruutsitsillutit silaannarissartarit. Sivisunerusumik silaannarissaraanni inissiap sannaa iigaalu nillertissammata. Taamaattumik aamma sivisuumik igalaamik ikersisimatitsinissaq innersuutigineqarneq ajorpoq.
Silaannarissalinnginninni kiassaatit qamikkallarnissaat eqqaamasassavat, kiassaatinik nutaaliaanerpaanik, igalaamik ammasoqartillugu nammineq qamittartunik, kiassaateqanngikkuit.

 

2. Kiassaatit sakkortussusaat assigiisikkit

Inissiami silaannaap kissassusaa sapinngisamik assigiissaartiguk. Inissiami init ilai allaniit nillernerugaangata suertitsilertarput, silaannarlu kissartoq inimut nillertumut pigaangat isugutatsitsilertarpoq oqoqalernissamullu qanillisaataasinnaalluni. Taamaattumik kiassaatit tamarmik assigiimmik inisseqqatinneqartassapput, imminut akilersinnaalluarnerummat inini tamani kiassaatit assigiimmik inisseqqatikkaanni, kiassaatip ataasiinnaap ikumatinneraninngarnit. Kissasuseq 3-mut kiassaatip inissinneqarnissaa innersuutigineqarpoq inimi silaannaap kissassusaa 21 graderimiinniassammat.

 

3. Pequttat kiassaatip saavaniissanngillat

Kiassaatip saavani pequteqarpat kiassaatip kiassaaniarnera ajornakusoornerussaaq. Taamaattumik pequtit kiassaammiit 15-20 cm missaanni ungasitsigisarnissaat innersuussutaavoq.

 

4. Saagut unnukkut saagoqqatittakkit

Unnukkut unnuakkullu saagut saagoqqatillugit, inip silaannaa kissartoq inip iluaniilluarnerusinnaavoq. Ullukkut igalaat saagueqqikkukkit seqernup qinngorneri inimik kiassaaqataassapput.

 

5. Isersimaffiginerusartakkat natersualeruk

Natersuaq kiannerulersitsisutut misigisitsisarpoq isigaalernannginnerutitsisarlunilu.

 

6. Imeq kissartoq sipaaruk

Imeq kissartoq akisuvoq.Uffarfimmi uffarluni kuutsitsissut sipaartitsinerusumik taarseruk. Uffarluni kuutsitsissutip imermik sipaarnartullip imermik kissartumik atuineq affaannanngortissinnaavaa. Imermik sipaarniutitalik atorlugu uffaraanni minutsimut imeq 10 literit missaat atorneqartarpoq. Uffarfimmi kinisimaarfimmut badkarimut uffarneq imermik 180 literit tungaannut atuiffiusarpoq.

 

7. Kiassaat sakkukilliimiuk

Illup iluani kissassuseq nalinginnaasoq 19 aamma 21 gradit missaanniittussaavoq. Kiassarneq 1 graderimik apparaanni kiassarnermut akiligassaq 5 procentit missaanni appariaallassaaq. Ukiumut aningaasat sipaagassarpassuusinnaapput. Aasaanerani silap kiatsinnera ilutigalugu kiassaatit sakkukinnerpaaffissaaniitinneqarsinnaasarput.

Acceptér cookies fra dette site

Denne hjemmeside bruger cookies til af forbedre din oplevelse af sitet
Du kan altid slette cookies via de avancerede indstillinger i din browser

Acceptér ikke cookies Acceptér kun funktionelle cookies Acceptér alle cookies