Immersugassat

INI A/S attaveqarfiginiarukku, Saaffiginnissuteqarnermi immersortagaq immersorsinnaavat.

Immersugassaq ini@ini.gl -mut nassiuneqarsinnaavoq sumiiffigisanniluunniit INImut tunniunneqarsinnaalluni.

Inissarsiortutut utaqqisut allattorsimaffiannut ilanngunnissannut qinnuteqarniaruit, immersugassaq Inissarsiorluni utaqqisut allattorsimaffiannut allatsinneq immersussavat.

Immersugassaq ini@ini.gl -mut nassiuneqarsinnaavoq sumiiffigisanniluunniit INImut tunniunneqarsinnaalluni.

Illoqarfinni nunaqarfinnilu tamani inissianik inoqanngitsoqarneq ajormat, utaqqisut allattorsimaffianni allatsissimanissaq pingaaruteqarpoq. Utaqqisut allattorsimaffianiinnerup siunertaraa, sivisunerpaamik allatsissimasup qinnuteqarnermini siulliulluni inissiamik tunineqarnissamut neqeroorfigineqarnissaa.

Inissiap piffissaq inoqannginnissaa sivikillisinniarlugu, inissarsiortutut inissianik inoqanngitsunik, soqutigisinnaasannik qinnuteqartartussaassaatit. Qinnuteqartut akornanni sivisunerpaamik utaqqisimasoq inissiamut neqaroorfigineqassaaq.

INI-p imminut kiffartuussiviani, sumiiffinniluunniit allaffeqarfiup attaveqarfigineratigut utaqqisuni allattorsimaffimmi normu qassimiinnerlutit paasisinnaavat.

Utaqqisutut allattorsimaffimmiinnermut akiliut

Namminersorlutik Oqartussat kiisalu kommunet inissiaataannik INI A/S allaffissuussisuuvoq. Utaqqisut allattorsimaffianniinnermut illoqarfimmi suliffeqarfimmut ataatsimut (Namminersorlutik Oqartussanut kiisalu kommunenut) allassimaffissatut kissaatigisannut ataatsimut 100 koruuneqarpoq.

Assersuutigalugu Namminersorlutik Oqartussat kommunellut Sisimiuni iniutaanni allatsinnissat kissaatigisimagukku, tassani utaqqisut allattorsimaffianniinnermut akiliut 200 koruuniussaaq. Nuummi allatsinnissamut kissaateqaruit utaqqisut allattorsimaffianniinnermut akiliut 100 koruuniuvoq, Namminersorlutik Oqartussat Nuummi iniutaat kisiisa INI A/S-ip allaffissuussarimmagit, kommunit iniutaat pinnagit. Sisimiuni Nuummilu ataatsikkut suliffeqarfiit allatsiffiginiarukkit ukiumut akiliut 300 koruuniuvoq, pissutigalugu Sisimiuni suliffeqarfiit illugiissillugit akiliiffigissagakkit (Namminersorlutik Oqartussat kiisalu kommunet) Nuummilu suliffeqarfik (Namminersorlutik Oqartussat).

Utaqqisut allattorsimaffiannut akiliut, ukiumoortuuvoq. Tassa imaappoq, januar-imi oktober-imiluunniit allatsinneq apeqqutaanani, 100 koruuneqarpoq.

Ukiumoortumik uppernarsaaqqinneq

Utaqqisut allattorsimaffianni akiliut ukiumoortuummat, utaqqisut allattorsimaffianniiginnarnissaq ukiut tamaasa uppernarsaqqittagassaavoq.

Utaqqisut allattorsimaffianniiginnarnissat kissaatigigukku, akiligassaq girokortitalik allakkatigut/e-mailikkulluunniit INI A/S-imut nassiussissaaq akilerneqassaaq.

Utaqqisut allattorsimaffianiinnermut akiliutissaq piffissaagallartillugu akilerneqanngippat, utaqqisut allattorsimaffianniit peerneqassaatit, taamaasillutit inissarsiortutut allassimanerpit sivisussusaa annaassavat. Utaqqisut allattorsimaffianniinnermut akiligassap akilerneqannginneranut nukingisaarummik nassiussisoqartussaannginnera eqqumaffigiuk.

Akiligassaq ukiup nutaap aallartinnerani nassiunneqartarpoq, akiligassap kingusinnerpaamik akilerneqarnissaa 1. Marts-imut inissinneqartarpoq, tassanilu inissarsiortutut killiffimmik uppernarsaaqqinneq pisarpoq.

Allakkat apuuffissaminnut apuutinngitsoorlutik utaqqisut allattorsimaffiannit peerneqannginnissat qulakkeerniarlugu, najukkamik e-mailimilluunniit allannguisimaguit INI A/S-imut nalunaaruteqarnissat pingaarutilerujussuuvoq.

Inissiamik inoqanngitsumik qinnuteqarniaruit, taava immersugassaq Inissiamut inoqanngitsumut qinnuteqaat immersussavat. Aammattaaq INI-p imminut kiffartuussivia aqqutigalugu qinnuteqarsinnavutit.

Immersugassaq ini@ini.gl -mut nassiunneqarsinnaavoq sumiiffinniluunniit INImut tunniussinnaavat.

Aatsaat siullerpaamik inissarsiortuuguit utaqqisut allattorsimaffianniilernissamut ukiumoortumik akiligassap akilerneqarnissaanik qinnuigineqassaatit. Qinnuteqaatit INI A/S-imut tunniukkukku, bankimi, netbankikkut allakkerivimmiluunniit akilerneqarsinnaasumik akiligassamik tunineqassaatit. Akiligassaq akilerukku, inissarsiorlutit utaqqisut allattorsimaffianni allassimalissaatit. Imminulli kiffartuussivik aqqutigalugu aatsaat siullerpaamik inissarsioruit, utaqqisutut allatsissimaffimmut ilanngunneqarnissannut akiligassat imminut kiffartuussivikkut akilersinnaavat.

Immersugassami makku nalunaarutigissavatit:

• Inissiap qinnutigisavit qanoq angitiginera, malugiuk inoqutigiit amerlassusaat naapertorlugu inissiaq angissuseqassammat
• Inissiap sumiinnissaa
• Illoqarfimmut nunaqarfimmulluunniit sorlermut qinnuteqarniarnerit

Nivinngakkat takuneqarsinnaanerallu

Inissiat inoqanngitsut INI-p nittartagaani imminut kiffartuussivimmi, INI-lluunniit allaffeqarfiini nassaarisinnaavatit.

Eqqumaffigiuk INI A/S aqqutigalugu inissianik inuttassarsiukkanik nammineq qinnuteqartussaagavit aammalu inissiat qinnutigisatit kisimik neqeroorutigineqarsinnaammata. Taamaasiornikkut inissiap inoqannginnissaa sivikinnerutinneqarsinnaammat. Inissianik attartortitsisarnermut inatsit naapertorlugu, qinnuteqartut akornanni sivisunerpaamik utaqqisut allattorsimaffianniissimasoq inissiamut neqeroorfigineqartarpoq.

Inissiap inoqanngitsup inuttassarsiorneranut piukkunnartunut ilaassaguit, inoqutigiillusi qaammatini kingullerni pingasuni akissarsiarisamassi allagartaat qinnuteqarnermi ilanngullugit tunniutissavasi.

Inissiamik paarlaasseqatigiinnissamut qinnuteqarniaruit, immersugassaq Inissianik paarlaaqatigiikkumalluni qinnuteqarneq immersussavat.

Immersugassaq ini@ini.gl -mut nassiunneqarsinnaavoq sumiiffinniluunniit INImut tunniussinnaallugu.

Inissiamik paarlaaqateqarsinnaassaguit, pisussaaffiit uku naammassineqarsimassapput.

• Inissiap nuuffigerusutavit angissusaa inoqutigiit amerlassusaannut tulluutissaaq. Tassa imappoq, kisimiittuuguit sisamanik initalimmik paarlaateqatiginninniarsinnaanngilatit
• Attartornermut isumaqatigiissutit paarlaasseqatigiinniartunit tamanit eqqortinneqarsimassapput
• Attartornermut isumaqatigiissutit atorunnaarsinneqarsimassanngillat
• Paarlaateqatigiinniat INI A/S-ip inissiaataanut akiligassaqassanngillat
• Paarlaateqatigiinniat inigisaminnik attartortitsisimassanngillat

Inissianik paarlaannermi periuutsit

Periuutsit marluk atorlugit inissianik paarlaattoqarsinnaavoq

1. Ineqarnermut isumaqatigiissutinik nutaanik isumaqatigiissusiortoqarsinnaavoq
2. Paarlaasseqatigiittut isumaqatigiissutit atoriikkatik ingerlatiinnarsinnaavaat

Paarlaasseqatigiinniartut ineqarnermut isumaqatigiissutitik atorunnaarlugit nutaanik attartornermut isumaqatigiissusiornissaq toqqarpassuk, inissiat misissorneqassapput - soorlu inissiamik qimatsisoqartillugu iliuuserineqartartartut malillugit. Soorlu qularnaveeqqutinut akiliutivit utertinneqartinneqannginnerini, iluarsartuussinernut ilanngaasoqaqqaassaaq. Inissiallu nutaap tigunerani, ineqarnermut isumaqatigiissut nutaaq atsiorneqassalluni.

Paarlaateqatigiinniat inissiarisaminni sivikinnerpaamik qaammatini 36-ni najugaqarsimatillugit, ineqarnermut isumaqatigiissutit ingerlatiinnarnissaa toqqarneqarsinnaavoq. Tamanna isumaqarpoq, paarlaateqatigisassi ineqarnermut pisussaaffii akisussaaffiilu tigussagisi.

Tassa imaappoq:

• Nuuffigisassinni ineqartuusimasup inissiamiinnerata nalaani aserorsimasai akisussaaffigilissavasi
• Imermut kiassarnermullu paarlaateqatigisap akilertagai tiguneqassapput. Tamanna isumaqarsinnaavoq illit kiassarnermut akiliinerulersinnaasutit, paarlaateqatigisarlu akiliutinik utertooruteqarsinnaalluni – tassani atuineq qanoq innersoq apeqqutaalluni.
• Ineqarnermut qularnaveeqqut inissiamut najukkamut tunngasuuvoq, paarlaaqatigisimasavillu qularnaveeqqut akilersimasaa inissiaq qimakkukku ilinnut utertinneqassaaq, naliginnaasumik iluarsartuussereernerup kingorna ilanngaassisoqareerpat. Qularnaveeqqummut akiliutigineqartut angissusaat assigiinngissuteqarpata, paarlaateqatigiittut akunnerminni tamanna isumaqatigiissutigineqarnermikkut iluarsissavaat.

Aammattaaq inissiamut iserternermi, inissiat iluarsartuunneqassanngillat, attartortuusimasup qimatsineratut isikkoqartillugu tigussavarsi.

Inissiamik qulakkeerinninnissat qinnutiginiarukku, immersugassaq Inissiamik qulakkeerinninnissamik qinnuteqaat immersussavat.

Immersugassaq ini@ini.gl -mut nassiunneqarsinnaavoq sumiiffinniluunniit INImut tunniussinnaallugu.

Inissiamik qulakkeerinninniarlutit qinnuteqarsimaguit, inissiamik qulakkeerinninnissamut allattorsimaffimmut ilanngunneqassaatit. Inissiamik qulakkeerinninniarluni allattorsimaffimmi nalunaarsorsimaneq ukiumut 100 koruuneqarpoq.

Inissiamik qulakkeerinninnermik sivitsuineq

Inissiamik qulakkeerinnittoqarsinnaavoq tunngaviusumik ukioq ataatsimi, taamaattorli inissiamik qulakkeerinninnerit sivitsortissinnaavat, peqannginnerit ukunannga peqquteqarpat:

• Ilinniarneq
• Napparsimaneq
• Nuutsitaagallarneq
• Pinerlussimasunut inissiisarfimmiitinneqarneq

Inissiamik qulakkeerinninnissavit qulakkeerinninnissavit sivitsornissaa, imaasiornikkut uppernarsaqqissinnaavat:

• Sooq peqannginninnut uppernarsaatinik ini@ini.gl - mut nassiussinikkut imaluunniit sumiiffigisanni saaffiginnittarfimmut tunniussinikkut
• Sivitsueqqinnissamut akiligassap akilerneratigut

Malugiuk: inissiamik neqeroorfigineqaqqinnissat qaammatinik pingasunik sioqqullugu allakkatigut INI A/S nalunaarfigissagakku.

Inissiamut allamut nuukkumallutit qinnuteqarniaruit, immersugassaq Inissiamut allamut nuukkumalluni qinnuteqarneq immersussavat.

Immersugaq ini@ini.gl -mut nassiussinnaavat imaluunniit sumiiffigisanni INImut tunniussinnaallugu.

Utaqqisut allattorsimaffiat

Nuunnissamut kissaateqartut allattorsimaffianni nalunaarsorsimassagaanni, ukiumut 100 koruuneqarpoq.

Nivinngakkat takuneqarsinnaanerallu

Inissiat inoqanngitsut INI-p nittartagaani imminut kiffartuussivimmi, saaffiginnittarfinniluunniit nassaarisinnaavatit.

Imminut kiffartuussivimmi una aqqutigalugu inissiamik qinnuteqarsinnaavutit, imaluunniit immersugassap Inissiamut inoqanngitsumut qinnuteqaatissaq immersorlugu. Immersugassaq ini@ini.gl -mut nassiunneqarsinnaavoq sumiiffigisanniluunniit saaffiginnittarfimmut tunniussinnaallugu.

Inissamik inoqanngitsumik pissarsissagaanni, inoqutigiit qaammatini kingullerni pingasuni akissarsiaasa allagartaasa tunniunnissaat pisariaqarpoq.

Maluginiaqqussavarput, qinnuteqassagaanni utaqqisut allattorsimaffianni nalunaarsorsimasariaqarmat. Inissiamut ataatsimut qinnuteqartut arlariiusimappata, Inissianik attartortitsisarnermut inatsit naapertorlugu inissiaq sivisunerpaamik utaqqisut allattorsimaffianniittumut tunniunneqassaaq.

Malugiuk: Nuunnissamut kissaateqartut akornanniit tunineqarsinnaagavit, aatsaat ineqarneqarnermut allatigulluunniit INI A/S-imut akiligassaqanngikkuit.

Suliffik aqqutigalugu inigisanniit inissiamut allamut qinnuteqarniaruit, immersugassaq Atorfimmut atatillugu inigisamit nuukkumalluni qinnuteqarneq immersussavat.

Immersugassaq ini@ini.gl -mut nassiunneqarsinnaavoq sumiiffigisanniluunniit INImut tunniussinnaavat.

Tunniussinissamik qinnuteqarniaraanni, immersugassaq Saaffiginnissuteqarnermi immersugassaq immersorneqassaaq allalluniluunniit qinnuteqartoqarluni.

Immersugassaq allalluniluunniit qinnuteqaat ini@ini.gl -mut nassiunneqarsinnaavoq sumiiffigisamiluunniit INImut tunniussinnaavat.

Qinnuteqaatinnut ilanngullugu inuup tunniussiviginiakkavit najugaqarnermut uppernarsaataa tunniuteqquneqartarpoq. Najugaqarnermut uppernarsaatip takussutissavaa tunniussiviginiakkat sivikinnerpaamik ukiuni marlunni najugaqatigisimagit, uppernarsaallu kommunemut aaneqarsinnaavoq.

Qinnuteqaatit INI A/S-imit suliarineqareerpat, allakkatigut akissuteqarfigineqarumaarputit.

Tunniussinissamik qinnuteqarnissat pitinnagu, piumasaqaatit makku naammassineqarsimassapput:

• Inuk tunniussivigisassat meerarissavat, qatanngutigissavat, inooqatigissavat inooqatiginikuusimalluguluunniit imaluunniit illoorarissavat
• Inuk tunniussivigiumasat sivikinnerpaamik ukiuni marlunni ineqatigisimassavat
• Inuk tunniussivigisat 18-nileereersimassaaq

Suliffik aqqutigalugu inigisamik tunniussiniarluni qinnuteqarniaraanni, immersugassaq Saaffiginnissuteqarnermi immersortagaq immersorneqassaaq imaluunniit allalluni qinnuteqartoqassalluni.

Immersugassaq allalluniluunniit qinnuteqaat ini@ini.gl -mut nassiunneqarsinnaavoq sumiiffigisanniluunniit INImut tunniunneqarsinnaavoq.

Piumasaqaatit

Suliffik aqqutigalugu inigisat ukiut tallimat sinnerlugit najoreersimagukku, nalinginnaasumik attartuganngortissinnaavat. Suliffik aqqutigalugu inigisat, suliffiit assigiinngitsut aqqutigalugit najugaqarfigereersimassagaluarukkuluunniit.

Taamatuttaaq suliffik aqqutigalugu inigisat nalinginnaasumik inigisatut tigusinnaavat, utaqqisut allattorsimaffiat aqqutigalugu neqeroorfigineqarsimaguit.

Utoqqalinersiuteqalernermi tigusineq

Utoqqalinersiaqalernissat peqqutigalugu, suliffik aqqutigalugu inigisat naliginnaasumik attartukkatut allanngortissagukku, inigisami tassani sivikinnerpaamik ukiuni pingasuni najugaqareersimassaatit. Tamannali allaasumik allannguineq pisinnaavoq aatsaat:

• Utoqqalinersiaqalertussanngorsimaguit
• Naalagaaffimmi atorfilittatut utoqqalinersiaqalertussanngoruit
• Siusinaartumik sulisinnaajunnaarnersiuteqalertussanngoruit

Malugiuk

Pisortatut najukkat, aalajangersimasumik atorneqartussatut inissiat, suliffik aqqutigalugu immikkut inissiat kiisalu inissiat inniminnikkat nalinginnaasumik attartugassanngortinneqarsinnaanngimmata. Taamanna inissianut ukununnga tunniunneqarsimasunut aamma atuuppoq:

• Naalagaaffiup ataani atorfillit
• Naalakkersuisuni ilaasortat
• Namminersorlutik Oqartussani pisortat
• Peqqinnissaqarfiup sulisunut iniutigisaat, Peqqinnissarfik inimik tunniussisinnaatitaappat

Tunniussinermi

Inissiap tigunissaanut periarfissinneqaruit, ineqarnermut isumaqatigiissummut ilassummik INI A/S peqatigalugu atsiussaatit. Tamatuma saniatigut inigisaq suliarineqaranilu misissorneqassanngilaq, taamaattumillu inimut qularnaveeqqummik utertitsisoqassanngilaq.

Inigisavit attartortikkallarnissaa qinnutiginiarukku, immersugassaq Attartortitsigallarnissamik qinnuteqaat immersussavat.

Immersugassaq ini@ini.gl -mut nassiunneqarsinnaavoq sumiiffigisanniluunniit INImut tunniunneqarsinnaalluni.

Immersugassaq makkuninnga imaqartinneqassaaq:

• Inigisat kimit attartorneqassanersoq
• Inissiami qassit najugaqassanersut
• Attartortitsineq qanoq sivisutigissanersoq
• Attartortitsinermi qanoq akeqartitsisoqassanersoq
• Ineqarnermut qularnaveeqqumut qanoq akiliisoqassanersoq
• Inivit attartortinnerani, illit sumi najugaqarnerit

Piumasaqaatit

Inigisat sivikinnerpaamik qaammatini pingasuni, sivisunerpaamillu qaammatini aqqaneq marlunni attartortikkallarsinnaavat. Taamaattorli qaammatinit aqqaneq marlunnit sivisunerusumik attartortikkallarnissaanut periarfissaqarputit, uku peqqutigalugit peqanngittussaasimaguit:

• Ilinniarneq
• Napparsimaneq
• Nuutsitaagallarsimaneq
• Pineqaatissinneqarsimasut inissiisarfianiitinneqarneq

Inivit attartortikkallalinnginnerani, INI A/S-miit akuerineqaqqaassaatit. Suliffik aqqutigalugu inigisaqaruit, inivit attortikkallarneqarnissaanut sulisitsisoq akuersisussaavoq.

Ineqarnermut akiliut kiisalu qularnaveeqqut

Inigisat attartortikkallarsimagukku, ini tamakkiisumik suli akisussaaffigissavat. Akisussaafigisatillu assersuutigalugu makkuupput:

• Ineqarnermut kiisalu kiassarnermut- imermullu akiliutissat piffissaq eqqorlugu akilerneqarnissaat
• Inissiami, ineqartumit aserorneqarsimasut iluarsartinnissaat
• Inimut akiliutigisartakkatit sipporlugit, attartortumut akiliisitsiniassanngilatit, inissiarli tamakkiisumik pisatsersorsimappat, inimut akiliutigisartakkavit qaavatigut 10%-imik pisattanik attartornermut akiliisitsisinnaavutit.

Aammattaaq ineqarnermut qularnaveeqqummik akiliisitsinissat pisinnaatitaaffigaat, ineqartoq inissiami aseruisimatillugu matussutissanik. Qularnaveeqqutit ineqarnermullu akiliutaasartut annerpaamik qaammatit arfinillit amerlaqatigissavaat.

Inigisannik attartortitsigallarnissamut akuerineqarsimaguit, attartortitsigallarnissamut isumaqatigiissummik, illit attartorlugu atsiugassassinnik tunineqassaatit.

Inigisanni suliffeqarfimmik ingerlatsinissamut qinnuteqarniaruit, immersugassaq Inissiami suliffimmik ingerlatsinissaq pillugu qinnuteqaat immersussavat.

Immersugassaq ini@ini.gl -mut nassiunneqarsinnaavoq sumiiffigisanniluunniit INImut tunniunneqarsinnaalluni.

Errorsivimmik, panersaavimmik erruivimmilluunniit inissiami ikkussinissamik akuersissummik qinnuteqarniaruit, immersugassaq Errorsivimmik/erruivimmik/panersaammik ikkusinissamut akuersissut immersussavat.

Immersugassaq ini@ini.gl - mut nassiunneqarsinnaavoq sumiiffigisamiluunniit INImut tunniunneqarsinnaavoq.

Innaallagissamut tunngassutillit eqqortumik ikkussorneqarnissaat qularnaarniarlugu, erruivimmik, errorsivimmik kiisalu panersiivimmik ikkussuisitsinissamut akuersissummik qinnuteqassaatit. Innersuussutigissavarputtaaq innaallagissamut ikkussuinissamut akuerisaasunut ikkussuititsissasutit. Namminerli ikkussuunniarukkit tamanna illit nammineq akisussaaffigissavat, ajutoortoqarpallu taarsiisussanngortinneqaratarsinnaavutit.

INI-p attartortitaaniikt nuussaguit, atorunnaarsitsinerit nalunaarutigissavat. Taamaasiussaatillu immersugassap Attartornermi isumaqatigiissummik atorunnaarsitsineq immersorlugu.

Immersugassaq ini@ini.gl -mut nassiunneqarsinnaavoq sumiiffigisanniluunniit INImut tunniunneqarsinnaavoq.

Attartukkap atorunnaarsinnissaanut nalunaarut

Inissiap qimannissaa qaammammik ataatsimik sioqqutsillutit nalunaarutigissavat. Soorlu assersuutigalugu inissiaq 17. Juni qimanniarukku, juunip sinnera akilissavat aammattaaq qaammat juuli ilanngullugu. Tamannattaaq atuutissaaq, 1. Juli aallarnerfigalugu inissiamut allamut iserteruit.

Attartuleqqinneq

Inissiap iserterfigineqarnissaa piareerniariarpat, attartorteqqilerniarnissaa INI A/S-ip pisussaaffigaa. Assersuutigalugu inissiaq 17-ani atorunnaartutut nalunaarutigisimagukku juunillu 30-ani qimallugu, taava INI-p 15. Juli attartulerseqinniartussaavaa imaluunniit nuuffigineqariaannanngorsimappat 1. Juli attartulerseqqinniarsinnaallugu. Tamanna iluatsissagaluarpat, attartortunngortussap nuunnissaata tungaanut taamaallaat attartornermut akiliuteqartinneqassaatit.

Eqqiaaneq

Inissiaq qimakkukku eqqiarnissaa isumagissavat. Minnerpaamik makku isumagissavatit:

• Kissarsuut, qaavaniittut ristitaalu eqqiarluarneqassapput
• Kissarsuutip tunua eqqiarneqassaaq
• Skaaviit matui iluilu eqqiarneqassapput
• Aalamut milluaasoq, filteritaalu eqqiarneqassapput
• Igalaat qillarissarneqassapput
• Nerriviusat ilitsiviillu tamarmik, matut ilanngullugit, matserfiit kiisalu naqqup killingisa listitai eqqiarneqassapput
• Uffarfeqarfik sukumiisumik eqqiarneqassaaq
• Nateq sukumiisumik eqqiarneqassaaq
• Qui imaarneqarlunilu sanerneqassaaq

Inissiaq qimatat nakkutilliisumit misissorneqalerpat sukumiisumik eqqiarneqarsimanersoq nalilerneqarumaarpoq. Taamaasiorsimanngikkuit ilinnut akiligassiarineqartussamik INI A/S-ip eqqiaasunut eqqiartitassanngornissaa inniminnissavaa.

Naliginnaasumik iluarsartuussineq

Inissiamut iserternerpit nalaani inissiaq naliginnaasumik iluarsartuuteriigaavoq, aammattaaq inissiaq qimakkukku iluarsartuunneqartussaalluni. Tamanna isumaqarpoq:

• Ikkat tamarmik qilaaq ilanngullugu qaqortumik qalipanneqassapput
• Naqqit tamarmik lakkerneqarsimasutut ilersinneqassapput

Inissiaq nammineerlutit iluarsartuussinnaavat. Iluarsartuussassat ilaat nammineq isumagisimagukku misissorneqarnerani akuerineqarsinnaasunngorlugu naammassisimassavat, taamaasilluni inimik qimatsineq akuerineqarsinnaaniassammat.

Aammattaaq iluarsartuussinissamut sanasunik INI A/S inniminniisissinnaavat. Sanasunut akiligassaq qularnaveeqqummut akiliutinniit ilanngaatigineqassaaq, tamannalu nuunnermi aningaasartuutini takuneqarsinnaajumaarpoq.

Misissuinermi nalunaarut

Inissiap qimannerani naliginnaasumik iluarsartuunneqarsimassaaq, soorlu iserterfigigakku aamma taamaattoq. Inissiap naliginnaasumik iluarsartuunneqarnissaanut qanoq iliortoqarnissaa pillugu, INI A/S-imi nakkutilliisumit misissorneqassaaq. Misissuisitsinissap qaqugu pinissaa nammineerlutit sumiiffigisanni saaffiginnittarfimmut isumaqatigiissutigissavat.

Anilernermi misissuinermi nakkutilliisoq peqatigalugu inissiaq misissorneqassaaq. Nakkutilliisup misissuinermi nalunaarusiaq suliarissavaa, taamaasilluni iluarsartuunneqarsimasutut isikkoqaleqqissappat suut suliarineqassanersut allanneqarniassammata. Iluarsartuussinermi nalunaarusiat naliginnaasumik iluarsartuussinermut, nungullarnernut pisoqalisimasunut paarineqarlunneqarsimasunullu nalunaarusiornernik imaqartinneqassaaq.

Nutsernermi nalunaarusiaq ajoqutinullu nalunaarsuut nakkutilliisup misissuinerminut sanillersuutereerunigit, aningaasartuutit qanoq agguataarneqassanersut nalilersussavai.

Misissuinermi nalunaarusiaq nakkutilliisoq peqatigalugu atsiorneqassaaq. Tassa imaappoq, atsiukkat makkununnga attuumassuteqassaaq:

• Misissuinermi peqataasimassaatit
• Iluarsartuunneqartussat suut akilissanerlugit akuerisimassavatit
• Inip ullormi misissorneqarfiani ini qimareersimassavat, inimilli qimatsinermi piffissaliussaasumut ineqarnermut akiliuteqartussaassaatit

Misissuinermi allattuiffimmut ilanngunneqareersimanngippata uku allassavatit allassavatit:

• Najukkat nutaaq, taamaasilluni sulissisup nuunnermi aningaasanut tunngassutillit najukkamut eqqortumut nassiussinnaaniassammagit
• Kontonormut, taamaasilluni iluarsartuussisoqareernerata kingorna qularnaveeqqut akilikkat sinneqarsimappat tigusassarnik, INI A/S-imit tunniunneqarsinnaaniassammata

Nakkutilliisumit aamma apeqqutigineqassapput:

• Innaallagissamut, imermut kiassarnermullu atuiunnaarsimanersutit, tamanna illit akisussaaffigisussaagakku
• Inigisimasat uuliamik kiassartuuppat, ulikkaarlugu immerneqarsimanersoq
• Inigisimasat imermik immertakkamik peqarsimappat, imiisivik immerneqarsimanersoq

Malugiuk

Misissuisimanermi nalunaarusiaq kingusinnerusukkut allanngortinneqarsinnaanngimmat. Inissiap misissorneqarnissaani peqataasinnaanngikkuit, isumassarsiatsialaassaaq ikinngutigisat qanitarisalluunniit alla misissuinermi peqataatinnissaanut qinnuigissagukku.

Misissuinissami peqataasimanngikkuit illillu sinnerlutit peqataatitassaqarsimanngikkuit, allamik misissueqateqarnissaq nakkutilliisumit isumagineqassaaq. Tamannalu isumaqarpoq, misissuinermi nalunaarut illit peqatiginak immersorneqassaaq.

Nungullarnerit nalinginnaasut imaluunniit paarinerluineq

Misissuinermi nalunaarusiami nalinginnaasumik nungullarnerit inillu pisoqalisimanera kiisalu paarinerluineq/aserorterinerit immikkoortinneqartarput. Tamanna qanoq annertutigisumik akiliinissannut aalajangiisuusarpoq.

Nungullarnerit nalinginnaasut inissiallu nutaanngilisimanera

Soorngunami aamma inissiani nungullaattoqarlunilu pisoqalisoqartarpoq. Taamaattoqartillugu iluarsartuussineq inissiaatileqatigiiffimmit akilerneqartarpoq.

Inissiami najugaqarninni qaammatit tamaasa, najugaqarfiup immikkoortortaqarfia 1%-mik iluarsartuussassanut akiliisarpoq. Soorlu assersuutigalugu ukiut marluk affarlu (qaammatit 30)-it najukkanni ineqarsimaguit, iluarsartuussassanut tunngasut 30%-ii najugaqarfiup immikkoortortaqarfiata akilertarpai. Inissiaq nammineerlutit iluarsartuutissagukku, iluarsartuussinermut atortussanik, soorlu assersuutigalugu qalipaasiutinik qalipaatinillu pisininnut akiliutivit 30%-inik ilanngaanneqassaatit.

Inimi qaammatini 100-ni najugaqarsimaguit, iluarsartuussinissamut aningaasartuutigineqartussat, najugaqarfiup immikkoortortaanit 100%-imik akilerneqassapput, taamaasilluni akilertinneqarsinnaasut taamaallaat ukuussallutik:

• Ineqarnermut akiligassat kinguaattorutit
• Inissiamik paarsinerlussimaneq kiisalu aserorterineq

Inissiami najugaqartillutit, illup iluata aserfallatsaalinissaanut akisussaasuuvutit. Tamanna isumaqarpoq, paarsinerlunnerup asersorterinerulluunniit kingunerisaanik innarlikkat illit nammineerlutit akilissavatit.

Paarsinerlunneq aserorterinerillu assersuutigalugu, makkuusinnaapput:

• Matut asersorsimasut
• Erruivimmik ikkussuinermi igaffimmi skaavinnik piiaasimanerit
• Anartarfiit kalkeqalersimasut
• Igalaamerngup aalisakkanik uumatitsiviup ussiillisimanerata malitsigisaanik, imermik ajoqusertoqarsimanera

Inimi najugaqarnerpit nalaani, allanit paarinerlunneqarsimasut aserorterneqarsimasulluunniit illit akisussaaffigaatit. Soorlu assersuutigalugu meeqqavit pulaartuilluunniit piaarinaatsornikkut igalaaq aserorsimappagu, aserorsimasup iluarsartuunnissaa illit nammineerlutit akilissavat.

Najukkamik qimatsinermi naatsorsuusiorneq

Inissiaq nuuffigineqarnissaanut piareersarneqareerpat, INI A/S-ilu sanasuniit akiligassamik tigusaqaruni, najukkamik qimatsinermi naatsorsuusiorneq sullissisunniit isumagineqassaaq.

INI A/S-imiit naatsorsuusiornermi akiligassat iluarsartuussinermilu aningaasartuutit ineqarnermut qularnaveeqqummut akiliutinniit akilersinneqassapput. Akiligassat ilaatigut makkuusinnaapput:

• Ineqarnermut akiligassat
• Eqqiaaneq
• Iluarsartuussineq
• Asersorterneqarsimasunik inissiamilu paarinerlunneqarsimasunik iluarsartuussineq

Nuunnermi naatsorsuusiami takuneqarsinnaassaaq, iluarsartuussereernerup kingorna aningaasanik tigusassaqarnersutit. Aningaasanik tigusassaqarsimaguit, kontonnut ikineqassapput. Ineqarnermut qularnaveeqqut tamakkiisumik tigoqqissinnaavat:

• Inissiaq nammineerlutit iluarsartuussimagukku
• Iluarsartuussineq nakkutilliisumit akuerineqarpat
• Allanik aningaasartuuteqanngippat
• Akiligassaqanngikkuit

Ineqarnermut qularnaveeqqutitut akiliutigisimasanniit iluarsartuussineq akisunerusimappat, aningaasartuutigineqarsimasut nikingassutaannik akiligassamik nassinneqarumaarputit.

Malugiuk

Kiassarnermut- imeqarnermullu missingersuusiat aatsaat ukiup naanerani inaarutaasumik naatsorsuisoqaraangat suliarineqartarput. Tamanna isumaqarpoq, imermut kiassarnermullu naatsorsuusianik kingusinnerusukkut pissarsinissannik. Taamaattumik nuussimaguit eqqaamaqquarput najukkavit nutaap INI A/S-imut nalunaarutiginissaa.

Inissiaq namminerisamik uuttortaateqarpat, inissiap nuuffiginerani Nukissiorfimmut atuisuulernerit nalunaarutigissavat.

Inissiamut iserternermi atuisuulernermut immersugassamik tunineqassaatit, immersorlugulu atsioriarlugu Nukissiorfimmut nassiutissavat tunniukkiartorluguluunniit. Atuisuulernermi immersugassaq uani aamma nassaarisinnaavat.

Inaallagissamut, imermut kiassarnermullu atuisuulernerit www.sullissivik.gl aqqutigalugu aamma nalunaarutigisinnaavat.

Taamatut iliornerup assinganik iliuuseqarlutit aamma uuttortaatinik atuiunnaarnerit Nukissiorfimmut nalunaarutiginissaa nammineq akisussaaffigaat.

Atuiunnaarnermut immersugassaq uani nassaarisinnaavat. Uuttortaatinik ulloq atuiunnaarfiit, inissiap ullormi qimanneqarfia atorlugu nalunaarutigisavat. Assersuutigalugu inissiaq 30. Juni qimattussanngorsimagukku, uuttortaatit 30. Juni aatsaat atorunnaartussatut nalunaarutigissavat – ullorluunniit taanna sioqqullugu inissiaq qimassimagaluarukku.

Inissiap inoqannginnerani, sanasut inissiami suliaqarnissaat eqqarsaatigalugu, innaallagissamut- imermut kiassarnermullu atuineq inissiaatileqatigiiffik atuisutut nalunaarutiginnissaaq.

Inigisanni oqoqalersimasoq paasissagaluarukku, immersugassaq Saaffiginnissuteqarnermi immersortagaq immersussavat.

Immersugassaq ini@ini.gl -mut nassiunneqarsinnaavoq imaluunniit sumiiffigisanni INImut tunniunneqarsinnaalluni.

Ineqarnermut malittarisassat eqqaamiorisannit malinneqanngippata najugaqarfigisanniluunniit inerteqqutaasunik iliuuseqartoqarpat naammagittaalliuuteqarsinnaavutit.

Immersugassaq Eqqaamiorisat pillugu naammagittaalliuut ini@ini.gl -mut nassiunneqarsinnaavoq sumiiffigisanniluunniit INImut tunniunneqarsinnaalluni.

Katerisimaartarfimmik atorniarniaruit immersugassaq Ininik ataatsimoorfiusartunik attartorneq immersussavat.

Immersugassaq immersoreerukku ini@ini.gl-imut imaluunniit INImut ornigullutit tunniussinnaavat. 

Katerisimaartarfiit sumiinneri, isersimasinnaasut amerlassusaat akiilu paasisaqarfiginerorusukkukkit alakkarsinnaavatit ugguuna.

Pisortani aalajangersimasumik atorfeqartut ilaat suliffimmut atatillugu ineqartitaanissamut pisinnaatitaaffeqarput. Suliffimmut atatillugu ineqartitaanissamut pisinnaatitaaffeqaruit inissiamik inniminniisimanermut uppernarsaat sulisitsisuit INI-p najukkami allaffeqarfianut nassiutissavaa. Illit nammineerlutit suliffimmut atatillugu ineqartitaanissamut qinnuteqarsinnaanngilatit.

Inissiamik inniminniinissamut immersuiffissaq ugguuna aasinnaavat. 

Pisortani aalajangersimasumik atorfeqartut ilaat suliffimmut atatillugu ineqartitaanissamut pisinnaatitaaffeqarput. Suliffimmut atatillugu ineqartitaanissamut pisinnaatitaaffeqaruit inissiamik inniminniisimanermut uppernarsaat sulisitsisuit INI-p najukkami allaffeqarfianut nassiutissavaa. Illit nammineerlutit suliffimmut atatillugu ineqartitaanissamut qinnuteqarsinnaanngilatit.

Inissiamik inniminniinissamut immersuiffissaq ugguuna aasinnaavat.