Innaallagiaq, Imeq kiassarnerlu

Innaallagissamut, imermut– kiassarnermullu namminerisamik uuttortaatilimmi najugaqaruit, imermut- kiassarnermullu atuinernut qaammatit tamaasa toqqaannartumik Nukissiorfimmut akiliisarputit. Aammattaaq innaallagissamut, imermut kiassarnermullu atuisuulissaguit atuiunnaassaguilluunniit nammineq nalunaarutigissavat.

Imermut- kiassarnermullu namminerisamik uuttortaateqanngitsumi najugaqaruit, imermut kiassarnermullu akiligassaq ineqarnermut ilanngullu qaammatit tamaasa akiliisinneqarallartassaatit (aconto). Imermut kiassarnermullu akiliivallaaruteqarsimanersutit akiliinikippallaarsimanersutilluunniit, INI A/S-ip ukiumoortumik naatsersuusiorneratigut paasiniarneqartarpoq.

Imermut, kiassarnermut ikummatissallu akii nikerartarput, taamaattumillu akiliutigigallartinneqartoq allannguuteqarsinnaasarpoq.

Imeqarnermut kiassarnermullu akiliutigitinneqarallartartoq eqqunngitsuusorigukku, maalaaruteqarnissamut periarfissaqarputit.

 

Nuunnermi nalunaarutiginninneq

Inissiamut nuunninni, inigisat namminerisamik uuttortaateqarpat, Nukissiorfimmut atuisuulernerit nalunaarutigissavat.

Inimut iserternermi illit immersugassannik tunineqassaatit, atsioriarlugu nassiussinnaavat imaluunniit Nukissiorfimmut tunniukkiartorlugu.

Aammattaaq innaallagissamut, imermut kiassarnermulluunniit www.sullissivik.gl aqqutigalugu atuisunngornerit nalunaarutigisinnaavat.

 

Innaallagissamik, imermik kiassarnermillu atuilernerit Nukissiorfimmut nalunaarutigikkit

Inissiamut isertinnginninni, najugaqatigiiffiup uuttortaatit atuisuuffigiunnaarlugit nalunaarutigissavai, taamaasilluni najugaqatigiiffik illit innaallagissamik, imermik kiassarnermillu atuinerit najugaqarfiup immikkoortortaqarfiata akilissanngilaa. Taamaattumik pingaaruteqarpoq, atuinermut uuttortaatit Nukissiorfimmut nalunaarutiginissaat, taamaasiunngikkaanni innaallagissamut imermullu qamitaanermik kinguneqarsinnaammat. Atuisuulertussaaguit uuttortaatit nammineq nalunaarutigissavatit.

 

Nuunnermi naatsorsuineq

Najugaqarfik namminerisamik uuttortaateqarpat, najukkap qimannerani uuttortaatinik atuiunnaarneq Nukissiorfimmut nalunaarutigineqassaaq.

Uuttortaatit atorunnaartutut Nukissiorfimmut nalunaarutiginngikkukkit, inissiamiit nuunnerpit kingorna innaallagissamut, imermut kiassarnermullu atuinermut akiliisinneqarsinnaavutit.

Inissiap qimannerani, atuiunnaarnermut nalunaarsuivimmik tunineqassaatit, atsioriarlugu Nukissiorfimmut nassiussinnaavat ornigullutilluunniit tunniussinnaallugu.

Innaallagissamut, imermut kiassarnermullu www.sullissivik.gl aqqutigalugu atuiunnaarnerit nalunaarutigisinnaavat.

 

Innaallagissamut, imermut kiassarnermullu atuiunnaarnerit Nukissiorfimmut nalunaarutigiuk

Najugaqarfimmik ulloq qimatsiffissaq atorlugu, uuttortaatinik atuiunnaarnerit nalunaarutigissavat. Assersuutigalugu inissiaq ulloq 30. Juni qimattussanngorsimagukku, uuttortaatit aatsaat 30. Juni atorunnaartutut nalunaarutigissavatit, ullorluunniit taanna sioqqullugu inissiaq qimassimagukku ulloq taanna atuutissaaq.

Najugaqarfiup inoqannginnerani, innaallagissamut, imermut kiassarnermullu atuineq najugaqarfiup immikkoortortaqarfianut nalunaarsorsimalissaaq, suliarinnittussat inissiami sulinissaat eqqarsaatigalugu.

 

Imermut kiassarnermullu naatsorsuutit

Namminerisamik uuttortaatilinni najugaqaruit, imermik, kiassarnermillu atuinerit qaammatit tamaasa Nukissiorfimmut toqqaannartumik akilertassavatit.

Inissiat ilaat namminerisamik uuttortaateqanngillat, taamaattumillu init ataasiakkaat imermut- kiassarnermullu atuinerat uuttortarneqarsinnaanani. Taamaattumik atuinerit naapertorlugu akiliisinneqarnak, imermut kiassarnermullu qaammammut akiliisinneqarallartarputit.

Akiliutaagallartut Nukissiorfiit sinnerlugu imermut kiassarnermullu ukiumoortumik akiliutaagallartunik INI A/S naatsorsuusiortarpoq.

Kingusinnerpaamik 30. april imermut kiassarnermullu naatsorsuutit nanisinnaalissavatit. Malugiulli naatsorsuutit najugaqarfiup immikkoortuanoortuummata, attartukkanut ataasiakkaanoornatik.

Kingusinnerpaamik 15. juni naatsortuutit attartukkannut tunngasut allakkatigut nassiunneqassapput.



Imermut kiassarnermullu akiliigallartarneq

Imermut kiassarnermullu akiliigallarnermi, qaammatit tamaasa aalajangersimasoq akilertassavat.

  • Imermut akiliigallartarneq najugaqarfivit angissusaa naapertorlugu akigititaasut naatsorsorneqartarput. Imermut akigititat illoqarfimmiit illoqarfimmut, najugaqarfimmiillu najugaqarfimmut assigiinngillat.
  • Kiassarnermut akiliigallartarneq najugaqarfivit angissusaa, sumiiffia, kiassarnermut akit kiisalu ikummatissap akia naapertorlugu naatsorsorneqartarpoq.

 

Imermut kiassarnermut akit allanngorneri

Imermut, kiassarnermut ikummatissanullu akit apparaangata, akiliigallartarneq imermut kiassarnermullu atuineq naapertorlugu nalimmassarneqartarpoq, akiliivallaannginnissat akiliinikippallaarnissalluunniit qularnaarniarlugu.

Akigititanik qaffaanissamut allannguuteqartoqassatillugu, allannguutit atuutilernissaat sapaatit akunneri pingasut sioqqullugit INI A/S nalunaaruteqartarpoq.

 

Imermik kiassarnermillu atuinerup ukiumoortumik naatsorneqartarnera

Imermut kiassarnermullu akiliivallaaruteqarsimanersutit akiliinikippallaarsimanersutilluunniit  paasiniarlugu INI A/S ukiumut ataasiarluni naatsorsuusiortarpoq. Najugaqarfik tamakkiisoq naapertorlugu imermut kiassarnermullu atuisimaneq ataatsimut naatsorsorneqartarput, inillu angissusaat naapertorlugu agguataarneqartarlutik. Tassa imaappoq, ataatsimut naatsorsuusiamiit inissiaq 120 kvadratmeteri 90 kvadratmeterimiit annerusumik akiligassinneqassaaq.

Naatsorsuusiornermi inissiami qanoq sivisutigisumik najugaqarsimanerit aallaavigineqartarpoq. Soorlu juni-mi najugaqarfik qimassimagukku, akilersinneqartussaq januar-imiit juni-mut atuisimaneq akilersinneqassaaq.

Ukiup ingerlanerani najugaqarsimanerit naapertorlugu kingusinnerpaamik 30. April INI A/S-imiit, ineqarnermut kiisalu najugaqatigiiffiup ataatsimoortumik kiassarnermut naatsorsuutai naapertorlugit akiliivallaaruteqarsimanersutit akiliinikippallaarsimanersutilluunniit allakkatigut ilinnut nalunaarutigineqassaaq.

 

Akiligassaq utertoornerluunniit

Imermut kiassarnermut akiliisitsigallarnermi, akiliisinneqarpallaarsimaguit akiliivallaarutigisatit utertinneqassapput. Ineqarnermulli akiligassaqaruit akiliivallaarutigineqarsimasut utertinnginnerini akiligassannut ilanngaatigineqassapput.

Utertinneqartussat aningaaserivimmi konto-nnut utertinneqassapput. Taamaattumik pingaaruteqarpoq, kontonormuit sumiiffigisami INI A/S-p allaffeqarfianut nalunaarutiginissaa. Najukkamik allannguiguit, allannguineq INI A/S-imut nalunaarutigissavat.

Imermut kiassarnermullu akiliigallarnermi, akiliinikinaarsimaguit, akiligassamik (girokorti)-imik aningaaserivimmi allakkerivimmiluunniit akiligassannik nassinneqassaatit.

 

Naammagittaalliuteqarneq

Imermut kiassarnermullu INI A/S-ip ukiumoortumik naatsorsuusiai kukkuneqarsorigukkit naammagittaalliuteqarnissannut periarfissaqarputit. Naammagittaalliutit allakkatigut tunniutissavat, minnerpaamik ukuninnga imalik:

  • Atuisutut normu (soorlu 36-163-0001-02)
  • Ateq najugarlu
  • Illoqarfiup normua

 

Eqqaamassavattaaq naatsorsuusiap saqqaa, INI A/S-imit ukiumoortumik nalunaarutaaneersoq ilanngutissallugu.

Naammagittaalliut INI A/S-imit tiguneqarsimassaaq kingusinnerpaamik 1. August.

Naammagittaalliut ini@ini.gl -mut nassiutissavat, imaluunniit najukkanni INImut ornigullutit tunniullugu.