Boligstøttemi immikkoortortaqarfik

Postboks 1020

3911 Sisimiut


Mail bs-afdeling@ini.gl

Oqarasuaat 70 10 00

Fax 86 57 00


Immikkoortortaqarfimmi sulisut

Regine Lennert: Kujataaniit Kangaatsiaq ilanngullugu.

Naja Nielsen Storch: Qeqertarsuaq, Ilulissat, Uummannaq, Nunattalu kangia.

Evelyn Frederiksen: Aasiaat, Qasigiannguit, Upernavik, Qaanaarlu. 


Boligstøttehuse aqqutigalugu illuutit

Inissialiornermut tapiissuteqartarneq aqqutigalugu illuut tassaavoq illu, inissialiornermut tapiissuteqartarnermik aaqqissuussineq atorlugu sananeqarsimasoq.

Tassa imaappoq illumik piginnittoq Namminersorlutik Oqartussanit illumik sananissamut aningaasanik taarsigassarsisimassaaq, taakkulu Namminersorlutik Oqartussanut utertillugit akilersortussaallugit. Illut amerlanerpaartaat 1950-ikkunni aamma 1960-ikkunni sanaajupput. 

Inissialiornermut tapiissuteqartarneq aqqutigalugu illuutinut taarsigassarsiniarnermik aaqqissuussinerit pingasut pigineqarput: 

• Aaqqissuussinerit siullianni, akilersuinermut atugassanik Namminersorlutik Oqartussaniit tapiissutinik pissarsisinnaavutit

• Aaqqissuussinerit aappaani, akilersuinermut atugassanik tapiissutinik pissarsisinnaanngilatit. Paarlattuanik illumik piginnittutut kiffaanngissuseqarnerussaatit. Taanna tunngavigalugu illuutit ikittuinnaat sinnerunnikuupput

• Aaqqissuussinerit pingajuanni, taarsigassarsiarisatit erniaqassanngillat aamma taarsersugassaassanngillat, assersuutigalugu nammineerluni aamma sanaqateqarluni illuutinik sananermi kiisalu taarsigassarsiat taarsersugassaajunnaarlugit allanngortinnerini 

Akiligassat akilersorneranni Namminersorlutik Oqartussat ikiuuttarmata, Namminersorlutik Oqartussanut arlalinnik pisinnaatitaaffeqarlutillu pisussaaffeqarputit.

Namminersorlutik Oqartussat sinnerlugit inissialiornermut tapiissuteqartarneq aqqutigalugu illuutinut taarsigassarsiat INI-mit aqunneqarput. Tamatuma kingunerisaanik taarsigassarsiat pillugit suliassat amerlanerit INI-mit isumagineqartarput, assersuutigalugu:

• Taarsigassarsiat nutarterneri

• Taarsigassarsiat allanngortinneri

• Taarsigassarsiat akiligassartaannik nassiussineq

• Akiligassanik akilerneqanngitsunik tuavisaaraluni akileeqqusissutinik nassiussineq

• Tuniniaaneq aamma atuisunut tunniussineq

• Taarsigassarsianik isumakkeerfiginninneq 


Malugiuk

Inissialiornermut tapiissuteqartarneq aqqutigalugu illunut nutaanut ukiuni kingullerni taarsigassarsisitsisoqartarsimanngilaq. Taamaakkaluartoq inissialiornermut tapiissuteqartarneq aqqutigalugu illuummik suli piginnittunngorsinnaavutit, piginnittut nikinnerat aqqutigalugu taarsigassarsinermilu atugassat allannguuteqartinnagit illuummik pioreersumik tigusiguit.

Inissialiornermut tapiissuteqartarnermi atugassarititaasut atorlugit inissialiornermut tapiissuteqartarneq aqqutigalugu illuummik inoqanngitsumik tigusisinnaanngilatit, tassa inissialiornermut tapiissuteqartarneq aqqutigalugu illuutit inoqanngitsut tamanut tuniniarneqartarmata, qaffasinnerpaamik akiliuteqartoqarnissaa siunertaralugu. 


Naliginnaasumik paasissutissiinerit

Inissialiornermut tapiissuteqarneq aqqutigalugu illuliat piginnittuisa nikinnerat periutsit arlallit atorlugit pisinnaavoq. Piginnittulli nikinnera taarsigassarsinermi piumasaqaatit allanngortinnagit pigajuppoq. Tassa imaappoq, illit illumik tigusisutut taarsigassarsiat sinneruttut kiisalu piginnittuusimasup pisussaaffii pisinnaatitaaffiilu allanngortinnagit illu pigilissavat.

Inissialiornermut tapiissuteqartarneq aqqutigalugu illuliaq piumasaqaatai allanngortinnagit pigilissagukku innaallagissamik, imermik aamma kiassarnermik uuttuutinik atuisunngornerit Nukissiorfimmut nammineerlutit nalunaarutigissavat taavalu sillimasertinnissat isumagalugu.


Piumasaqaatit

Piumasaqaatit allanngortinnagit inissialiornermut tapiissuteqartarneq aqqutigalugu illuliamik piginnittunngorniaruit:

 • Inoqutigiit isertitaat ukiuni akileraarfiusuni kingullerni marlunni katillugit 180.000 koruuninik amerlanerussapput

 • 18-inik ukioqalereersimassaatit

 • Inissialiornermut tapiissuteqartarneq aqqutigalugu illuliamik peqariissanngilatit

 • Illumi najugaqalissaatit

 • Ikuallattoornermut aamma anorersuarneranut sillimmateqarnermut akiliisinnaassaatit

Inissialiornermut tapiissuteqartarneq aqqutigalugu illut allamut pigilertinniarukku, qaammatikkaartumik akiligassannut kinguaattoorsimassanngilatit aamma illumik piginnittussaasoq INI-mut, kommunimut Nukissiorfimmullu ineqarnermut tunngatillugu akiitsoqarsimassanngilaq.

 

Qinnuteqarneq

Inissialiornermut tapiissuteqartarneq aqqutigalugu illumik piginnilernissaq soqutigigukku, qinnuteqarnermi immersugassaq immersussavat. Immersugassami qinnuteqaammut ilanngullugit suut ilanngutissanersut allaqqavoq. Illumik piginnittuugallartorlu piginnittuulernissamut uppernarsaat immersussavarsi.


Illumik piginnittut nikinneranni piginnittuunermut qinnuteqarnissamut immersuiffissaq


Piginnittuunermut uppernarsaat allaqqaagaq ilanngussallu attuumassuteqartut tamaasa ilanngullugit najukkanni INI-mut imaluunniit nunaqarfimmi allaffimmut tunniutissavatit imaluunniit nassiutissavatit. Piginnittuunermut uppernarsaatip immersornissaanut ikiorneqarumallutit allaffeqarfimmut saaffiginnissinnaavutit.

Ilanngussat eqqortut tamaasa ilanngussimanissaat eqqaamassallugu pingaaruteqarpoq. Qinnuteqaativit tunniunneqarneranit sapaatit-akunneri sisamat qaangiutereersut ilanngussat tamaasa INI-mut tunniunneqarsimanngippata, qinnuteqaativit suliarineqarnera unitsinneqassaaq.


Qinnuteqaatip akuerineqarnera

Piumasaqaataasut tamaasa naammassisimagukkit, piginnittuunerup nikinnera INI-mit akuerineqassaaq. Tamatuma kingorna piginnittuunermut uppernarsaat kiisalu pisinnaatitaaffik nalunaarsugassanngorlugit Nalunaarsuisarfimmut INI-mit nassiunneqassapput. Tamanna ima paasineqassaaq, illumik illit piginnittutut nalunaarsugaalissaatit kingornagullu qaammartikkaartumiik akiligassanik nassitsittalissallutit. Piginnittut nikinnerat pillugu INI-mittaaq kommunimut nalunaarutigineqassaaq.


Naliginnaasumik paasissutissiineq

Inissialiornermut tapiissuteqartarneq aqqutigalugu illuliaq tassaavoq inissialiornermut tapiissuteqartarneq pillugu aaqqiissummit aningaasaliisoqarneratigut sanaartorneqartoq. Tassa imaappoq, illup sanaartornissaanut illumik piginnittoq Namminersorlutik Oqartussanut aningaasanik taarsigassarsisimavoq, taamaalillutillu Namminersorlutik Oqartussat illumut qularnaveeqqusiipput. Taarsigassarsiat nalikillilerneqarnissaasa imaluunniit akilerneqarnissaasa tungaannut Namminersorlutik Oqartussanut aalajangersimasunik pisussaaffilersuisoqarpoq.

Inissialiornermut tapiissuteqartarneq aqqutigalugu illuliornermut aaqqiissut Namminersorlutik Oqartussat sinnerlugit INI-mit aqunneqarpoq taamaattumillu taarsigassarsinermi assigiinngitsunut tunngasut isumagisaralugit, assersuutigalugu taarsigassarsititsineq taarsigassarsianillu allanngortitsineq, akiligassanik nassiussineq nukingisaarinerlu kiisalu illunik tunniussineq aamma taarsigassarsianik isumakkeerinninneq. Tamanna ima paasisariaqarpoq, inissialiornermut tapiissuteqartarneq aqqutigalugu illuliamik pigisaqartutut illit INI attaveqarfigisassarivat. 

Namminersorlutik Oqartussat akiligassat akilersornissaannik akilersuisarmata, Namminersorlutik Oqartussanut tunngatillugu arlalinnik pisinnaatitaaffeqarlutillu pisussaaffeqarputit.

Matumani pisinnaatitaaffitit aamma pisussaaffitit pillugit atuarsinnaavatit, matumani ikuallattoornermut aamma anorersuarmut sillimmatit isumaqatigiissusiorfigineri, oqummik piiaaneq kiisalu innaallagissamut, imermut kiassarnermullu atassuteqalernissamut nalunaaruteqarneq akilersuinerlu ilanngullugit.


Pisinnaatitaaffiit

Inissialiornermut tapiissuteqartarneq aqqutigalugu illuliamik pigisaqaruit, makkuninnga pisinnaatitaaffeqarputit:

 • Nammineerluni nalunaarsuiffinnit erniat akilerneqartut peernissaat

 • Inoqutigiiususi ukiumut 180.000 koruunit inorlugit isertitaqarpata pitsanngorsaanissamut tapiissutinik qinnuteqarneq

 • Meeqqamut ataatsimut 18-it inorlugit ukiulimmut 7,5 %-imik ineqarnermut meeqqanut tapiissutisineq, taamaattoq amerlanerpaamik meeqqat arfiniliussapput

 • Aneerasaartarfimmik, altanimik imaluunniit aniingasumik sananeq. Taamaattoq illit kommunimut nunaminertamik atuinissamut aamma sanaartornermut akuersissummik qinnuteqassaatit taavalu suliap aallartinnginnarani INI-mut akuersissummik qinnuteqassallutit

 • Taarsigassarsinermi piumasaqaataasut allanngortinnagit piginnittut allanngortinnissaanut kissaateqassaguit, illumik kina piginnittuulissanersoq siunnersuuteqarneq

 • Illit assersuutigalugu utoqqarnik paaqqinniffimmut nuussaguit katissimasat imaluunniit inooqatigisat illumi najugaqaannarsinnaasoq. Inooqatigiikkaanni inooqatigisaq illumik piginneqataassaaq imaluunniit piginnittut nikinnerani piginnittuuneq inooqatigisamut tunniunneqarsinnaavoq

 • Toqukkut qimagukkuit kingornussassanngortitassat imaluunniit katissimasat piginnittuulersinnaavoq imaluunniit Namminersorlutik Oqartussat illumik utertitsisinnaapput illulu aalajangersimasumik najugaqarfissatut atortussanngortillugu

 • Taarsigassarsiat akilersuutaat immikkut akilerlugit imaluunniit akiitsut tamaasa ataatsikkut akilerlugit

 • Taarsigassarsiat tamaasa akilereerukkit illu qanorluunniit pisinnaallugu piginnittuunermullu allagartaq Kalaallit Nunaanni Eqqartuussivimmit nalunaarsukkatut peerlugu

 • Taarsigassarsinissamut tapiissutinillu nutaanngilisunut qinnuteqarneq

 • Taarsigassarsiat allanngortinnissaannut aamma tapiissutinik nutaanngilisunik qinnuteqarneq

 • Illu utertinneqarsimappat qangali akiitsorisimasanik isumakkeerfigineqarnissamut qinnuteqarneq

 • Illoqarfimmi nunaqarfimmiluunniit allami najugaqarallarniaruit illu attartortillugu

 • Illoqarfimmi nunaqarfimmiluunniit allami najugaqarallarniaruit illu piffissami aalajangersimasumi sivisunerpaamillu ukiumi ataatsimi inoqanngissinnaavoq

 • Akiitsut pillugit akilersuinissamik isumaqatigiissuteqarnissamut imaluunniit akilersuutissat kinguartikkallarnissaannut qinnuteqarneq

 • Illu Namminersorlutik Oqartussanut tunniullugu


Pisussaaffiit

Taarsigassarsiavit tamaasa akilerlugit utertinnissaasa tugaanut illit inissialiornermut tapiissuteqartarneq aqqutigalugu illuliamik piginnittutut Namminersorlutik Oqartussanut aalajangersimasunik pisussaaffeqarputit:

 • Illut taarsigassarsianut sallunaveeqquseqqusaanngilat

 • Illu isateqqusaanngilat

 • Illup ilaa tamaalluunniit INI-mit akuersissummik pisimanngikkuit attartorteqqusaanngilat. Attartortitsissagaanni piumasaqaataasut INI-mit akuersissutigineqartut taamaallaat tunngavigalugit pissaaq

 • Illup ilaa tamaalluunniit INI-mit akuersissummik pisimanngikkuit allanngorteqqusaanngilat. Allanngortitsissagaanni piumasaqaataasut INI-mit akuersissutigineqartut taamaallaat tunngavigalugit pissaaq

 • Illu Namminersorlutik Oqartussanit inummut akuerineqartumut taamaallaat tunniuteqqusaavat. Tunniussinermi piumasaqaataasut Namminersorlutik Oqartussanit akuersissutigineqarsimassapput

Taarsigassarsineq pisussaaffimmik sumiginnarneqartutut isigineqassaaq imatut pisoqarpat:

 • Piffissaq eqqorlugu erniat akilersuutillu akiertanngikkukkit

 • Illu illersorsinnaasumik aserfallatsaalinngikkukku

 • Inissiaq ikuallattoornermut anorersuarmullu sillimmasersimanngikkukku

 • Inissiaq isatersimagukku

 • Illumit inuussutissarsiorlutit ininik ingerlatsiguit INI-mit akuerineqanngitsumik

 • Namminersorlutik Oqartussat akuerinngisaanik illumit nuukkuit imaluunniit attartortitsiguit

 • Illumi qularnaveeqqusiilluni taarsigassarsiguit, namminerli illuliat illulioqatigiillunilu sanaat matumani atuutinngillat

 • Inissiap alakkarnissaanut Namminersorlutik Oqartussat itigartikkukkit

 • Namminersorlutik Oqartussanit tapiiffigineqarnikkut tapiissutit siunertaanut alliliinngikkuit imaluunniit pitsanngorsaanngikkuit

 • Sanaartornerup ingerlanneqarnera inaarniarneqarneralu pisariaqanngitsumik kinguarsarukku

 • Illu aalajangersimasumik najugaqarfittut atunngikkukku

Taarsigassarsiaqarnerit sumiginnarukku taarsigassarsiassatit tamaasa ataatsikkut akileratarsinnaavatit. Ajornerpaatillugu naggataatigut illumit anisitaasinnaavutit.


Innaallagissamut, imermut kiassarnermullu atuilernermut atuiunnaarnermullu nalunaaruteqarneq

Inissialiornermut taarsigassarsisarneq aqqutigalugu illuliat namminneq innaallagiaqarlutillu, imeqarlutillu kiassarnermut uuttuuteqartarput, illillu atuinerit nammineerlutit akilersugarissavat. Tamatuma kingunerisaanik inissialiornermut tapiissuteqartarneq aqqutigalugu illuliamut iserterninni illup innaallagissamut, imermut pisariaqarpallu kiassarnermut Nukissiorfik aqqutigalugu atassuteqalersitsissaatit. Aammattaaq inissialiornermut tapiissuteqartarneq aqqutigalugu illuliamit nuukkuit uuttuutinik atuiunnaarnerit nalunaarutigissavat.

Innaallagissamik, imermik pisariaqarpallu kiassarnermik atuinerit toqqaannartumik Nukissiorfimmit naatsorsorneqartarpoq qaammatikkaartumillu akiliisassallutit.


Ikuallattoornermut anorersuarmullu sillimmatit

Inissialiornermut tapiissuteqartarneq aqqutigalugu illuliamik pigisaqaruit, ikuallattoornermut anorersuarmullu sillimmasiornissannut pisussaaffeqarputit. Sillimmateqarnermi makku matussuserneqassapput:

 • Illumi ikuallattoornermut anorersuarmullu patajaallisaaneq

 • Pisariaqarpat utaqqiisaa unnuisarfisssamut inissinneqarneq, tassa aseruatiternerit patajaallisarneqarnerisa nalaani.


Najugarigallakkat INI-mut nalunaarutiginissaa eqqaamassavat

Sillimmasiinermi akiliut aatsaat akilereersimalerukku sillimmasiissut atuutilissaaq.

Illut aseruatitersimappat aseruatiternerit iluarsaanneqarnerisa nalaanni taarsigassarsiavit akilersornera qaammatikkaartumik ingerlatiinnassavat. Akiliinngitsoornerit sumiginnaasutut isigineqassapput. Sumiginnaanerit ima kinguneqartarput, taarsigassarsiatit tamaasa ataatsikkut akiitsoqaruillu ilanngullugit akilerneranik.


Ikuallattoornermi aseruatiternerit

Illu ikuallassagaluarpat piaartumik illit:

 • Illup annertunerusumik aseruatiternerunnginnissaa qulakkeerniassavat

 • Sillimmasiisarfik attavigalugu aseruatiterneq nalunaarutigissavat

Tamatuma saniatigut INI attavigissavat taakkununngalu ilanngutissavat:

 • Sillimmasiussap nalunaarutigineqarnerata assilinera

 • Ikuallattoornermut taavalu politiinit nalunaarutip assilinera, politiit nalunaarusiorsimappata


Anorersuarmut aseruatiternerit

Illu anorersuarmit aseruatitersimappat illit:

 • Illup annertunerusumik aseruatitinnginnissaa qulakkeerniassavat. Eqqumaffigissavat anorersuartoqarsimaneratigut illup qalia, igalaat imaluunniit illup ilaa aseruatitersimanissaa

 • Sillimmasiisarfik attavigissavat aseruatitersimanerlu nalunaarutigalugu

 • INI attavigissavat aseruatiternerillu annertussusaat nalunaarutigalugit



Taarsiiffigitinneq

Inissialiornermut tapiissuteqartarneq aqqutigalugu illumut taarsigassarsiatit isumannaatsuunissaat isumagiuartassavat. Taamaaliussaatillu illumi qularnaveeqqusiinikkut. Illu aseruatitersimatillugu naleqassusia annikillissammat, INI-mit piumasarineqartartoq tassaavoq, aseruatiternerit suut sillimmasiinikkut matussuserneqassasut sillimmasiisarfiup INI-llu akornanni isumaqatigiissutaassasoq.

Illu annikitsuinnarmik aseruatiterneqarpat, qularnaveeqqut ajorseriannginnerussammat aseruatiternerit annikitsut piaarnerpaamik iluarsaanneqarnissaat isumagissavat.

Illu ikuallalluni nunguppat, taarsiiffigitinnikkut illumik nutaamik sanaartortoqarnissaa qulakkiissavat. Tamatuma kingorna illu nutaaq inissialiornermut tapiissuteqartarneq aqqutigalugu illuliatut taarsigassarsiatut isumannaarneqarsimassaaq.

Illup nutaap sanaartorneqarneranut aningaasartuutit sillimmasiinikkut matussuserneqanngippata, aningaasartuutaanerusussat illit nammineerlutit aningaasalersussavatit. Illup sanaartoqqinnissaanut Namminersorlutik Oqartussanut saniatigut tapiiffigitinnissamut taarsigassarsisinnaanngilatit. Illumut allamut issusaanut angissusaanullu assingusumut nuunnissat sillimmasiisarfiup neqeroorfigippatit, sillimmasiisarfiup ilinnut INI-mullu illup naleqassusia qularnaveeqqutitigut naammattumik taarsigassarsiannut naleqqiullugu isumannaallisagaanersoq allakkatigut qulakkiissavaa.


Oquk

Oquk taannaavoq pujoralaasaararpassuit siammarterneqartartut peqqissutsimut navianaateqartut. Illuni isugutattuni oquk takussaakkajuttarpoq taavalu qalipaatai qernertuullutik, kajortuullutik qorsorpaluttuullutilluunniit pisinnaapput. Oquk makkunaniikkajuttarpoq:

 • Tapetip qaavani ataaniluunniit

 • Teqeqquni

 • Kiilerini

 • Illup ilaani isugutakkajuttuni

Oquk ukiuni kingullerni ajornartorsiutaaleraluttuinnarpoq aamma inissiat illuliallu arlallit oqoqartut takusareerpavut. Aammattaaq inissialiornermut tapiissuteqartarneq aqqutigalugu illulianik piginnittut arlallit oqoqarnissaannik pasitsaassaqartut takussaapput – pingaartumik illuni nutaannginnerusuni. 

Inissialiornermut tapiissuteqartarneq aqqutigalugu illuliamik piginnittutut illup aserfallatsaaliornissaanut pisussaaffeqarputit, matumani oqoqarnersoq misissortillugu taavalu peqassappat peernissaanut nammineq akilerlugu.



Pitsaaliuineq

Oquk pitsaanerpaamik pitsaaliorsinnaavat illup isugutannaveersaartinneratigut. Ilaatigut illit imaaliorsinnaavutit:

 • Silaannarissarlutit taavalu uffarfik igaffillu silaannarissarfilersorlugit

 • Sapinngisamik atisat illup iluani panersernaveersaarlugit

 • Ermup silamiit illup iluanut kuunnginnissaa isumannaarlugu

 • Ermup aqqutai erngannginnersut isumannaarlugit. Assersuutigalugu kuuffimmeersinnaavoq, perusuersartarfimmeersinnaavoq, erruivimmeersinnaavoq imaluunniit errorsivimmeersinnaavoq

Inini kiassarneqanngitsuni isugutattoqakkajuttarnera eqqumaffigissavat.


Oquttoqarneranik pasitsaassaqarneq

Illumi oqoqarneranik pasitsaassaqaruit, najukkanni INI-mut attaveqarsinnaavutit. Suliffeqarfimmut illumik misissuisussamut INI-p innersuussinnaavaatit. Tamatuma kingorna allakkap puussaa ilitsersuutitalik misissuinissamut atugassap kalaallisut danskisullu nassuiaatitaqartoq ilinnut nassiunneqassaaq. Illit nammineerlutit misissugassamik ilanngaariarlutit allakkap puussaanut ikeriarlugu suliffeqarfimmut nassiutissavat, tamatumalu kingorna akissutisissaatit. Misissugassamik ilanngaavigisat assilisinnaavat nassiussassamullu ilanngullugu. Oqoqarneranik misissuineq qanoq ilinnut akeqassanersoq suliffeqarfiup nalunaarfigissavaatit.

Illumi oqoqassappat peerneqassaaq. Tamanna ima kinguneqarsinnaavoq:

 • Oqoqarfiusoq oquiarneqassasoq klorinimillu assallugu

 • Sanaartornermi atortut taarserneqarneranik

 • Illu nutarsarneqassasoq


Naammagittaalliuteqarneq

Inissialiornermut tapiissuteqartarneq aqqutigalugu illuliamik piginnittutut suliamik INI-p suliarineranut tunngatillugu naammagittaalliuteqarnissannut pisinnaatitaaffeqarputit. Assersuutigalugu aalajangernerit makkununnga tunngasuusinnaapput:

 • Piginnittut nikinnissaanut qinnuteqarneq

 • Taarsigassarsinissamut qinnuteqarneq

 • Tapiiffigitinnissamut qinnuteqarneq

 • Akiitsut pillugit naafferartumik akilersornissaannut qinnuteqarneq

INI-mi aalajangikkamik naammagittaalliuteqarniaruit allakkatigut naammagittaalliuteqassaatit. Naammagittaalliut minnerpaamik ima imaqartinneqassaaq:

 • Ilinnut attaveqarnissamut paasissutissat

 • Aalajangerneq naammagittaalliutigisat pillugu nassuiaat

Tamatuma saniatigut suliamut tunngasut allakkiat tamaasa ilanngunneqarsimassapput. Taakkulu tassaasinnaapput:

 • Qinnuteqaatit siulleq

 • Aalajangerneq naammagittaalliutigiumasat

Naammagittaalliut ilanngussallu attuumassuteqartut tamaasa najukkanni INI-p allaffeqarfianut imaluunniit nunaqarfimmi allaffeqarfimmut nassiutissavatit imaluunniit tunniutissavatit.

Naliginnaasumik paasissutissiineq

Inissialiornermut tapiissuteqartarneq aqqutigalugu illuliannit piffissami sivikinnerusumi nuussaguit, illut attartortissinnaavat. Illuit attartortinnerata nalaani qaammatikkaartumik akiligassat akilernissaannut tunngasut suli ilinnut nassiunneqartartussaapput illillu sillimatai nammineq suli akilertassallugit. Taamaaliussaatit pissutigalugu illu illit pigigakku, aamma illu suli akisussaaffigigakku taavalu qaammatikkaartumik akiligassat akilertarnissaat akisussaaffigalugu.

Inissialiornermut tapiissuteqartarneq aqqutigalugu illuliavit attartortinnissaanut utaqqiisaa peqannginnerit assersuutigalugu makkuninnga peqquteqassaaq:

 • Ilinniagaqarneq

 • Illoqarfimmi allami sulineq

 • Anstaltimi inissinneqarneq

 • Allamik peqquteqarneq

Illumik attartortup attartornermut isumaqatigiissutip kommunimut takutinneratigut ineqarnermut tapiissummik qinnuteqarsinnaavoq.


Piumasaqaatit

Inissialiornermut tapiissuteqartarneq aqqutigalugu illuliap attartortinnissaanut pisariaqarpoq:

 • Attartortitsineq INI-mit akuersissutigineqarsimanissaa

 • Illup sillimmaserneqarsimanissaa taavalu ukiumut pineqartumut sillimasiissutip akilerneqarsimanissaa

 • Taarsigassarsiat akiitsoqarfigissanngilatit

Inissialiornermut tapiissuteqartarneq aqqutigalugu illuliat ukioq ataasiakkaarlugu taamaallaat attartortissinnaavat. Attartortitsineq sivitsorusukkukku ukiut tamaasa attartornermut isumaqatigiissutip nutarternissaanut qinnuteqartassaatit. 

Allami ilinniagaqarnermut atatillugu attartortitsinermi akuersissut ilinniagaqarnerup nalaa tamaat akuerineqarsinnaavoq ilaatigut ilinniarfeqarfimmit uppernarsaatinik takutitsinikkut. 

Aallaaviatigut illu sivisunerpaamik ukiuni pingasuni attartortissinnaavat, attartornerullu nalaani ineqarnermut meeqqanut tapiissutissanik tunniussisoqartanngilaq.

Inissialiornermut tapiissuteqartarneq aqqutigalugu illuliat imaluunniit nammineq illuliat attartortinniarukku, allakkatigut qinnuteqaat nassiutissavat najukkanni INI-p allaffeqarfianut imaluunniit nunaqarfimmi allaffeqarfimmut tunniunneqartussaq.

 Qinnuteqarnermi makku allassavatit:

 • Illu qaqugumiit qaqugumut attartorneqassanersoq

 • Sooq illu attartortinneqassanersoq

 • Najukkat nutaaq

 • Illumik attartortussap aqqa inuuialu

 • Illit aningaaserivimmut normuit paasissutissartai


 Qinnuteqaammut ilanngussavatit:

 • Illup ukiumi pineqartumi sillimmataasa akilersimasut uppernarsaataat kingulliit


Qinnuteqarneq

Attartornerup annertussusia INI-mit naatsorsorneqassaaq taannalu illit attartortullu atsiussavarsi INI-mullu imaluunniit allaffeqarfimmut imaluunniit nunaqarfimmi allaffeqarfimmut tunniullugu.


Naliginnaasumik paasissutissiineq

Inissialiornermut tapiissuteqartarneq aqqutigalugu illut pigisat imaluunniit nammineerluni illuliat alliniarukku pitsanngorsarniarluguluunniit, aningaasartuutaasut matussusernissaannut amerlanerpaamik 150.000 koruuninik qinnuteqarnissannut periarfissaqarputit.

Assersuutigalugu makkununngaasinnaavoq:

 • Kiassaateqarfik

 • Ukioq naallugu imeqarnermut atassusiineq

 • Kuuffissuarmut attavilersinneq

 • Uffarfimmik sananeq

 • Oqorsarneq

Nalinginnaasumik aserfallatsaaliinermik suliassanut aamma atortorissaarutinut inuulluataarutinik taaneqarsinnaasunut tapiiffigineqarsinnaanngilatit, assersuutigalugu makkununnga:

 • Qalipaanermut

 • Naternik taarsersuinernut

 • Illup iluani matunik taarsersuinernut

 • Nillataartitsivinnut qerititsivinnullu, uffarfinnut qalaliasunut (SPA) assigisaannullu

 • Aneerasaartarfimmik sananermut


Piumasaqaatit

Illunnik alliliinermut pitsanngorsaanermullu taamaallaat tapiissutisisinnaavutit siunertanut taakkununnga aningaasanut inatsimmi aningaasanik immikkoortitsisoqarsimappat.

 Qinnuteqarnermi piumasaqaatit assigiinngitsut atuupput:

 • Inissialiornermut tapiissuteqartarneq aqqutigalugu illut pitsanngorsarnissaannut tapiissutit


Inissialiornermut tapiissuteqartarneq aqqutigalugu illut pitsanngorsarnissaannut tapiissutit

Pitsanngorsaanissamut iluarsartuussinissamullu tapiiffigineqarniaraanni:

 • Inoqutigiit isertitaat ukiunit kingullerni akileraarfiusuni marlunni ukiumut 180.000 koruunit inorlugit agguaqatigiisillugit amerlatigissapput. Inoqutigiit meertaqartilluni meeraq ataaseq 4.000 koruunimik amerlineqassapput. Assersuutigalugu pingasunik meerartaqaruit inoqutigiinni isertitat amerlanerpaamik ukiumut 192.000 koruuniusussaapput

 • Ukiuni kingullerni 5-ni tapiissutinik pissarsisimassanngilatit

 • Illu ikuallattoornermut anorersuarmillu ajoquserneranut sillimmasersimassaaq


Aningaasartuuteqarnerunermut saniatigut tapiissutit

Tapiissutit amerlanerpaamik 150.000 koruuniussapput illillu ukiut 5-t ingerlanerini ataasiarlugit amerlanerpaamik tapiissutisisarsinnaavutit.

Tapiissutinik akuerineqareersimaguit saniatigut aningaasartuutaanerusunut tapiissutisisinnaavutit imaattoqarpat:

 • Iluarsartuussinissamut pilersaarutaaqqaartoq pillugu aningaasartuuteqarneruneq

 • Qinnuteqaammi siullermi aningaasartuutaanerusussat ilanngunneqareersimassapput

 • Tapiissutit katillugit 150.000 koruuninit amerlanerussanngillat


Qinnuteqarneq

Inissialiornermut tapiissuteqartarneq aqqutigalugu illuit imaluunniit nammineq illuliavit allilernissaanut imaluunniit pitsanngorsarnissaanut tapiiffigitinnissamut soqutiginnikkuit, qinnuteqarnissamut immersuiffissaq immersussavat. 


Inissialiornermut tapiissuteqartarneq aqqutigalugu illuit imaluunniit nammineq illuliavit allinissaanut imaluunniit pitsanngorsarnissaanut tapiiffigitinnissamut qinnuteqarit


Immersugassami allaqqavoq qinnuteqaammut suut ilanngunneqassanersut

Qinnuteqaat ilanngussallu tamaasa ilanngullugit najukkanni INI-mut imaluunniit nunaqarfimmi allaffimmut tunniutissavatit imaluunniit nassiutissavatit. Qinnuteqaatip immersornissaanut ikiorneqarumallutit allaffeqarfimmut saaffiginnissinnaavutit.


Akuersissuteqarneq

Qinnuteqaatit akuerineqarsimappat INI-mit nalunaarfigineqassaatit. Illit sanasussallu akornissinni isumaqatigiissut INI-mit suliarineqassaaq taannalu marluullusi atsiussavarsi INI-mullu utertillugu.


Qinnuteqaatit akuerineqarsimanngippat, qinnuteqaatit sooq akuerineqarsimanngitsoq nassuiaatilerlugu allakkatigut nalunaarfigineqassaatit.


Illit nammineerlutit akisussaaffigivat:

 • Suliap nakkutiginissaanut. Aamma illit sinnerlutit suliamik nakkutilliisussamik peqassasoq aalajangersinnaavat. Tamatumunnga nakkutilliinermut aningaasartuutit matussusernissaannut qinnuteqaammut ilanngunneqarsinnaapput

 • Sanaartornermut akuersissut nunaminertamillu atuinissamut tunngasoq pisariaqarpat kommunimut pissarsiarinissai

 • Suliaq inerpat INI nalunaarfigissallugu

 • Sanasup suliani naammassippagu, akiligassamik ilinnut ingerlateqqitassamik suliaqassaaq, taannalu illit akuerisussaavat atsiorlugulu taavalu INI-mut nassiullugu. Tamatuma kingorna illit sinnerlutit INI-p sanasut suliai pillugit akilissavai.

Naliginnaasumik paasissutissiineq

Inissialiornermut tapiissuteqartarneq aqqutigalugu illuliamik piginnittoq toqukkut qimaguppat, toqusoqarnerani pigisanik nalilersuinissaq INI-mit nalunaarutigineqassaaq makku pillugit:

 • Toqukkut qimaguttup taarsigassarsiai. Assersuutigalugu tassaasinnaapput taarsigassarsiat erniaqanngitsut akitsuuteqanngitsullu, taarsigassarsiat allat, taarsigassarsiat allanngortitat, nammineq illuliornissamut imaluunniit illulioqataanissamut taarsigassarsiat imaluunniit nalinginnaasumik erniaqartumik taarsigassarsiat

 • Taarsigassarsiat sinneruttut

 • Peqarpat akiitsut

 • Peqarpat piginneqataasut

Toqukkut qimaguttup ilaqutai imaluunniit piginneqatai illumi suli najugaqarpata, toqusoqarnerani pigisanik nalilersuineq pigisanut illumullu nalinginnaasumik akisussaassapput. Toqusoqarnerani pigisanik nalilersuinermi kiap illu kingornussaneraa ilaatigut misissorneqassaaq. 

Inissialiornermut tapiissuteqartarneq aqqutigalugu illuliamik kingornussaqarniaruit, illuliamik taama ittumik piginninnissamut peqqussummi piumasaqaataasut naammassisimaneritit INI-p misissussavaa kingornagut illumik piginnittuulersinnaaniassagavit. Assersuutigalugu illit imaassinnaavutit:

 • Najugaqarnissamut piumasaqaatit naammassisinnaagitit imaluunniit naammassiumagitit

 • Taarsigassarsiat erniai akitsuutaalu akilersorsinnaagitit taavalu illumut sillimmatit akilersorsinnaallugit

 • Namminersorlutik Oqartussanit taarsigassarsinikkut inissialiornermut tapiissuteqartarneq aqqutigalugu illuliamik pigisaqariinngitsutit

 • Toqukkut qimaguttoqarneratigut kingornussisussaanersutit imaluunniit katissimasatut kingornussisussaanersutit

Toqusoqarnerani pigisanik nalilersuinikkut suliami ima naliliisoqarpat INI nalunaarfigineqassaaq:

 • Piginneqataasoq pigisamik nikittoqarnerani piginnittuussanersoq

 • Kingornussisussat illumik piginnittuulissanersut

 • Illu Namminersorlutik Oqartussanut tunniunneqassanersoq

 Illit piginneqataasutut imaluunniit kingornussisussatut illumik piginnittunngussaguit, qaammatikkaartumik akilersugassanik ilinnut nassiussisoqartalissaaq.

Naliginnaasumik paasissutissiineq

Inissialiornermut tapiissuteqartarneq aqqutigalugu illuliamik pigisaqaruit najugarerusukkunnaakkannik, illut Namminersorlutik Oqartussanut tunniussinnaavat.

Nuunnermi eqqiaaneq, innaallagissamik, imermik kiassarnermillu atuiunnaarneq kiisalu sillimmatinik atorunnaarsitsineq eqqarsaatigalugit arlalinnik eqqumaffigisassaqarputit.

Inissialiornermut tapiissuteqartarneq aqqutigalugu illuliap utertinnerata kingorna taarsigassarsiat INI-mit naatsorsorneqassapput, tassanilu paasiniarneqassaaq aningaasanik ilinnut utertitsisoqassanersoq imaluunniit sumiginnaaneq taavalu illup niuernikkut nalinganik naliliinerup kingunerisaanik akiligassamik nassinneqassanersutit.


Piumasaqaatit

Inissialiornermut tapiissuteqartarneq aqqutigalugu illulianik piginnittut tamangajammik illuminnik Namminersorlutik Oqartussanut utertitsisinnaapput.

Illumik kapitali 6-imik taaneqartartumik pigisaqaruit qaammatikkaartumillu tapiissutinik pissanak, illu Namminersorlutik Oqartussanut utertissinnaanngilat. Akerlianik illumik piserusuttumik illumullu akiitsunik akisussaarusuttumik pissarsiussaatit.


Qinnuteqarneq

Inissaliornermut tapiissuteqartarneq aqqutigalugu illuit Namminersorlutik Oqartussanut tunniunnissaa soqutigigukku, piginnittuunermut uppernarsaat immersussavat (tunniussinermut takussutissaq). 


Inissialiornermut tapiissuteqartarneq aqqutigalugu illuit utertinnissaanut qinnuteqarneq


Piginnittuunermut uppernarsaat najukkanni INI-p allaffeqarfianut imaluunniit nunaqarfimmi allaffeqarfimmut nassiutissavat imaluunniit tunniutissavat. Aamma qinnuteqaatip suliarinissaanut allaffeqarfimmut saaffiginnissuteqarnikkut ikioqqusinnaavutit.

Illu utertikkukku tunniutissavatit:

 • Illumut piginnittuunermut uppernarsaat. Illit piginnittuuteqatitillu piginnittuunermut uppernarsaatip atsiornissaa eqqaamassaaq

 • Illumut matuersaatit najukkanni allaffeqarfimmut imaluunniit nunaqarfimmi allaffeqarfimmut tunniutissapput

Tamatuma kingorna piginnittuunermut uppernarsaat INI-mit Nalunaarsuisarfimmut nalunaarsukkanit peerneqarnissaq anguniarlugu nassiussissaaq. Piginnittuunermut uppernarsaat Namminersorlutik Oqartussat piginnittutut nalunaarsorsimalerpat, illit/ilissi illumik piginnittutut inissisimajunnaassaasi.


Nuunnissaq

Illumit nuunnissaq pitinnagu makku isumagissavatit:

 • Illu pequtaajarsimassaaq

 • Illu eqqiarneqarsimassaaq peqarpallu eqqagassat igillugit

 • Illu aseruatiternermut qularnaarsimassaaq

 • Illumi innaallagissamik, imermik peqarpallu kiassarnermik Nukissiorfimmut atuiunnaarnissamut nalunaarutigalugu

 • Sillimmasiutivit sillimmasiisarfimmut atorunnaarnissaa

Illumut matuersaatit INI-mit tiguneqariarpata, illu aseruatiternernut allanut INI-p qulakkiigassai tassaapput:

 • Kiassarnerup ermullu imaarnissaa

 • Igalaat matoorusersornissaat

 • Namminersorlutik Oqartussat sinnerlugit innaallagissamut, imermut kiassarnermullu uuttuutinut atuilernermut nalunaaruteqarnissaq.


Taarsigassarsianut naatsorsuineq

Illu Namminersorlutik Oqartussanut tunniutereerukku, aningaasanik ilinnut utertoqassanersoq imaluunniit akileeqqusaassanerlutik paasiniarlugu taarsigassarsianut naatsorsuutit INI-mit suliarineqassapput.

Siullermik niuernikkut illu nalilerneqassaaq. Tassa imaappoq, illu niuernikkut akimik nalilerneqassaaq. Tamatuma kingorna sinneruttunik akiitsoqassappat akiitsullu niuernikkut akimit ilanngaatigineqarlutik.

Taarsigassarsiat INI-mit naatsorsorneqareerpata, niuernikkut naliliinerup assilinera ilanngullugu ilinnut nassiunneqassaaq:

Akileqqusaaguit akiitsumik isumakkeerfigineqarnissannut qinnuteqarnissat periarfissaqarputit. Taarsigassarsiat naatsorsorneqarnerisa kingorna kingusinnerpaamik qaammat ataaseq qaangiuppat akiitsunik isumakkeerfigineqarnissannut qinnuteqareersimassaatit. Qaangiutsinnagu qinnuteqanngikkuit, akiitsup pinngitsaaliissummik akilernissaanut INI-p akiliisitsiniartartumut nalunaarutigissavaa.