Inuiaqatigiinnut akisussaaffik (CSR)

Isumaqarpugut, inuiaqatigiinnut akisussaaffilittut suliffeqarfiussalluta pingaaruteqartoq illoqarfimmilu innuttaasunut tapersersuisoq, INI A/S Namminersorlutik Oqartussanit pigineqarnera tunaartaralugu. CSR pillugu pilersaarusiukkamik suliaqartuuvugut naalagaaffeqatigiillu piujuartitsilluni ineriartortitsinermi nunarsuarmi anguniagaa pillugu suliaqartuulluta.

Sumiiffinnuttaaq tapersersuivugut, INI A/S-ip piginnaasaqarfiini kiisalu pigisaqarfiini, kiisalu inissiaatileqatigiiffiup tunniussinissamut pingaaruteqarfiani. Taamaasilluni CSR INI-p pilersaarusiorneranut suliffeqarfiuneranullu ilaalersinneqarpoq. Taamaasiornikkut, pitsaanerusumik sunniuteqarluartumillu tunniussaqarnissarput upperaarput.

Naalagaaffeqatigiit piujuartitsilluni ineriartortitsinermi nunarsuarmi anguniagaa tunaartaralugu, INI-p CSR-mi politikkia sanarfisaavoq, INI-llu suliai pingaarnerit ukuupput:





Inoqarfiit piujuartitsiffiusut (nunarsuarmut anguniagaq 11)

Inissiaatileqatigiiffiup inoqarfiit piujuartitsiffiusut pillugit peqataarusunnera paasiuminartorujussuuvoq, taamaattumik INI A/S sulianik annertuunik tamakkununnga attuumassutilinnik sulianik ingerlataqarpoq. Ilisimasagullu matumani attartortunullu attuumassuteqarnerput iliuuseqarsinnaanerpullu pingaaruteqarpoq.

Suliniut nutaanerpaaq meeqqat oqartussaanerannut tunngasuuvoq, Sisimiuni immikkoortoqarfimmi 2020-mi suliniutitut ingerlanneqarpoq. Suliniutip siunertaraa meeqqat najugaqarfimminni atukkaminnik pitsanngorsaanissaq siunertaralugu aalajangeeqataasinnaallutillu sunniuteqaqataalersinneqarnissaat.

Najugaqartut oqartussaaqataanerat – meeqqat oqartussaaqataanerannisulli – najugaqartut sunniuteqaqataanissaannik siunertaqarpoq. Suliniulli taanna meeqqanut sammisuunngilaq  Kalaallillu Nunaanni illoqarfinni tamani ingerlanneqarluni.

Inoqarfiit piujuartitsiffiunissaannut suliniarnikkut tapersiinitta aamma ilagaat, najugaqartunik ineqarnermut akiliuteqarnikkut unammilligaqalersimasunut aningaasaqarnikkut siunnersuineq. Aningaasaqarnikkummi unammillerneqarsimasunut ikiuunnerput taakkununnga iluaqutaassaaq.

Ilinniartitaaneq (nunarsuarmut anguniagaq 4)

Ilisimasagut suliffeqarfittullu misilittakkagut pillugit avitseqateqarusuppugut, inuusuttunillu ilinniarluarsimasunik suliffeqarfittut soqutiginnilluta.

Taamaattumillu ilaatigut meeqqat atuarfianni atuartunut, sulinermik misileraasussanut periarfissiivugut. Qaqisa-mi suliniummut peqataavugut meeqqat atuarfiinit inuusuttuaqqat amerlanerit, sulinermi inuussutissarsiutinut ilinniaqqittarnissaannut kajungilersinneqarnissaat siunertaralugu, meeqqat atuarfiisa suliffeqarfiillu akunnerminni attaveqarnerulernerannut suliniutaasumut.

Mind Your Own Business-ip aamma tapersersugaraarput, inuusuttut aallarnisaanissamut piginnaasaminnik misileraaffiat. Suliniutip siunertaraa inuusuttut sulinermi inuussutissarsiornissami aallarnisaanissamilu soqutigisaminnut saapiissuseqaleqarnissaat, kiisalu suliassanik unammillernarsinnaasunik tigusaqartalernissaannut imminut tatigilernissaat. Inuussutissarsiornikkut tapersersortinik INI A/S atukkiisarpoq, inuusuttut ingerlaarnerminni avitseqateqarfigisinnaasaannik.

INIp suliniutaa meeqqat oqartussaaqataanerat suliniutaavoq inuusuttuaqqat allatut sunniuteqarfigisinnaanissaannut, akisussaassusermik sunniuteqaqataasinnaanissamillu ilinniartinnissaat pillugu. Meeqqat oqartussaaqataalerpata, inersimasut isumassarsiaannut tusarnaassapput. Tamanna ilinniartitseriuseq meeqqanut oqartussaaqataasunut misilittagaqarnerulersitsisinnaavoq, oqartussaaqataanikkummi piginnaasaasa inerisarnissaannut kiisalu sunniuteqaqataanissamut aaliangeeqataasinnaanissamullu inuunerminni peqataanerulernissaannut iluaqutaallualertussaassaaq. 

Avatangiiseq (nunarsuarmut anguniakkat 6 aamma 12)

Najugaqarfinni kiisalu INI-p allaffeqarfiini piujuaannartitsinissaq siunertaralugu aaliangeeqataasinnaavugut.

Taamaattumik najugaqarfinni eqqaaveqarfinnik INI pilersitsinikuuvoq, najugaqartut eqqagassaatimik anginerit iginnissaannut periarfissaginnerulerniassammata. Taamatuttaaq INI A/S Sisimiuni kommune suleqatigalugu, containerinik igalaaminernut immikkoortiterivinnik ilioraanikuuvoq.

Najugaqarfiillu immikkoortoraqarfiini siulersuisut peqatigalugit saliinissamut najugaqarfinni suliniuteqartarpugut (Saliineq) aammalu suliffeqarfinnik suleqatiginnilluni saleeqatigiinnermut (Saligaatsoq) peqataasarluta.

Tamatumap saniatigut attartortut sulisullu pappialarsornerat annikillisinniarlugu, qarasaasiatigut sullissineq annertusarniarlugu suliaqarpoq.

Ilaasortaaffiit

INI A/S CSR Greenland-imut kiisalu Transparency International Greenland-imut ilaasortaavoq.