Ulloq 5. november 2019 Inatsisartut inissiani najugaqarnermut inatsisip allanngornissaa akuersissutigivaat, akuerineqarsinnaasunngortillugu Namminersorlutik Oqartussat kommuunillu inissiaataanni uumasuuteqarsinnaanissaq. Inatsimmut allannguutip 1. januar 2020 -imiit atuuttussanngornissaata tungaanut INI A/S-p najugaqarfiit immikkoortortaqarfiini siulersuisut uumasuuteqarsinnaaneq pillugu aaliangiinissaannik ikiorniarpai. INI A/S-illu najugaqarfiit immikkoortortaqarfiini siulersuisoqanngitsuni attartortut taasitinneqarnissaannik ikiussavai. Tassami attartortut tassaapput inissiani uumasuuteqarsinnaanermik aaliangiinissami aaliangiisuusussat. Taasisitsinermi najuullutit peqataasinnaanngikkuit, piginnaatitsissusiamik immersuisinnaavutit taamallu sanilit illit taasininnik tunniussisinnaanngorlugu. Piginnaatitsissutissaq INI-p saaffiginnittarfianut pineqarsinnaavoq imal. ini@ini.gl.-mut allalluni piniarneqarsinnaalluni.

 

Attartortutulli uumasuuteqalersinnaaneq pitinnagu, piumasaqaatit pingasut tulliuttut naammassineqarsimassapput:

 

1.      Najugaqarfigisami uumasuuteqarnissaq akuerisaanersoq misissorneqassaaq.

2.      Kommunimut uumasuuteqarnissamik akuersissummik piniarnissaq akuersissutillu INI A/S-mut nassiunnissaa.

3.      Qaammatit pingasut attartornermut akiliutip annertoqqataata immikkut qularnaveeqqutip akilernissaa.

 

Qulaani piumasarineqartut Inatsisartunit aalajangigaapput.

 

Najugaqarfiup immikkoortortaqarfiani akuersissut

Uumasuuteqarnissaq pissappat, siullermik tamanna najugaqarfiup immikkoortortaqarfiani akuerineqaqqartussaavoq. Attartornermi inatsit naapertorlugu tunngaviusumik uumasuuteqarsinnaaneq akuerisaavoq.  Najugaqartunilli amerlanerusunit uumasuuteqarsinnaaneq itigartinneqarpat, taava uumasuuteqartoqarsinnaanngilaq. INI A/S-ip 1. januar 2020 inatsisip allannguutissaa pilersinnagu, najugaqarfiit immikkoortortaqarfiinik aggersaanikkut allannguut taasititsissutigissavaa.

 

Attartortup nammineq akisussaaffigivaa misissussallugu, najugaqarfimmini immikkoortortaqarfimmi uumasuuteqarsinnaanermut akuersisoqarsimanersoq. Tamannalu INI A/S-p nittartagaani takuneqarsinnaavoq imal. paasiniarneqarsinnaalluni najukkami immikkoortortaqarfiup siulersuisui imaluunniit sumiiffigisami INI A/S-imut saaffiginnittarfiit paasiniaaffiginerisigut.

 

Malugeqquneqarpoq, kommunit maleruagassiaat naapertorlugit, qimmit qimuttut matumani ilaanngimmata. Tassa imaappoq, qimmit qimuttut inissiani INI A/S-ip allaffissuussaani uumasuutigeqqusaanngillat.

 

Kommunimit akuerisaaneq

Uumasuutitaartigani kommunimit akuersissummik piniaqqaartoqartussaavoq. Taannalu taava uppernarsaatitut INI A/S-imut nassiunneqarluni ingerlatinneqassaaq.

 

Kommunimit akuersissut uumasumut ataasiinnarmut atuuttuuvoq, taamaattumik uumasumik allamik piniarnermi kommunimut akuersissummik nutaamik piniartoqaqqaassaaq.

 

Tassa imaappoq, qitsuk pigisaq aapperniaraanni, taava akuersissummik kommunimut piniaqqinnissaq pisariaqarpoq.

 

Immikkut qularnaveeqqusiussaq

Uumasuutitaartinnani immikkut qularnaveeqqut akilerneqaqqaassaaq.  Immikkut qularnaveeqqutip angissuserivaa qaammammut inissiamik attartornermi akiliutip pingasoriaataa (tassani ilaanatik imermut kiassarnermullu akiliutaasartut). Akiliut uumasuuteqarnermi ajoqutaalersimasinnaasunut matussutissatut sillimmasiussaavoq.

 

Immikkut qularnaveeqqut pineqartoq uumasuutitaartinnani INI A/S-imu akilerneqassaaq. Immikkullu akiliutissaq naafferartumik akilersorneqarsinnaanngilaq.

 

Immikkut qularnaveeqqut pineqartoq utertinneqassaaq, attartukkamit aninerup kingorna inissiaq misissorneqareerpat ajoqusikkallu iluarsaanneqareerpata. Tamatuma kingorna immikkut qularnaveeqqusiussap naliginnaasumillu qularnaveeqqusiussap matussusiinerisa kingorna sinneruttut tiguneqarsinnaanngussapput.

 

Ileqqorissaarnissamut maleruagassat

Ileqqorissaarnissamut malerugassat nittartakkami atuarneqarsinnaapput. Inatsisissatullu allannguut 1. Januar 2020-mi atuutilerpat ileqqorissaarnissamut malerugassat nutarterneqassapput.

 

Sanilerisap INIp ileqqorissaarnissamut malerugassat malinngippagit, taava saniliusoq allakkatigut maalaaruteqarsinnaatitaavoq.

 

INI-p ammasarfiisa avataatigut sanilerisamit nipiliornikkut annertuumik ajoqusersorneqaruit, taava INI-p oqarsuaatikkut piareersimatitaanut sianersinnaavutit, tassanngalu nipiliortoqarnerit allatullu iluaalliornartumik pisoqarnerit uppernarsaasigaasumik nalunaarutiginnissaannik ikiorneqarlutit.

 

Ileqqorissaarnissamut malerugassat INIp uani atuarsinnaavatit.

 

Apeqqutit akissutillu

Uani takusinnaavatit uumasuuteqarnermut atatillugu apeqqutigikulaneqarnerusut akissutaallu:

 

Qimminik qimuttunik uumasuuteqartoqarsinnaava?

Naamik, qimmit qimuttut inissiani INI A/S-imit allaffissuunneqartuni uumasuutigineqaqqusaanngillat. Tamanna qimmit qimuttut pillugit kommunit maleruagassiaanni aaliangigaavoq, taakkununngalu inatsimmik allannguineq sunniuteqassanngilaq. 

 

Taamaallaat qimmit qitsuillu uumasuutiginiaraanni qinnuteqartoqassava?

Aap, qinnuteqarnissami taamaallaat pineqarput qimmit qitsuillu. Sulimi qinnuteqarnertaqanngitsumik uumasuutigineqarsinnaapput aalisagaaqqat, timmiaaqqat, uumasut kikkaasut, saaniluit allallu ineqartinneqartut.

 

Qassinik uumasuuteqartoqaqqusaava?

Inatsimmut allannguummi uumasuutigerusutanik amerlassusiliisoqarnikuunngilaq. Kisianni piumasaqaataavoq kommuni uumasunut ataasiakkaanut immikkut akuersissuteqartassasoq aammalu uumasumut ataatsimut immikkut qularnaveeqqut qaammatit pingasut attartornermi akiliutip annertoqqataa akilerneqarsimassasoq.

 

Kommunimit akuersissut uumasumut ataasiinnarmut atuuttuua?

Aap, uumasumut ataasiinnarmut atuutsitaavoq, aammalu taamaallaat uumasumut akuersissummik piniunneqartumut. Tassa imaappoq, soorlu assersuutigalugu, qitsuutit toquppat, taava nutaamik pisaarniaruit kommunimut akuersissummik nutaamik qinnuteqaqqeqqaassaatit.

 

Kikkut taasinermi peqataasinnaappat?

Kikkut tamarmik 18-inik ukioqalereersimasut, inissiami INI A/S-imit allaffissuunneqartumi najugaqartut, taaseqataasinnaatitaapput. Inoqutigiilli najugaqartut qassiugaluarunilluunniit inoqutigiinni ataasiinnaq taasisinnaatitaavoq.

 

Qanormi ippa taasisinnaagaluarluni taasisitsinermi peqataasinnaanngikkanni?

Taasisitsinermi najuullutit peqataasinnaanngikkuit, piginnaatitsissusiamik immersuisinnaavutit taamallu sanilit illit taasininnik tunniussisinnaanngorlugu. Piginnaatitsissutissaq INI-p saaffiginnittarfianut pineqarsinnaavoq imal. ini@ini.gl.-mut allalluni piniarneqarsinnaalluni.

 

Taasisitsinermi inernerit sumi paasiniarneqarsinnaappat?

Taasisitsinerit inerneri INIp nittartagaatigut avammut saqqummiunneqassapput, unalu toorlugu alakkarterneqarsinnaallutik.

 

Qaqugukkut immikkut akiligassiissut utertinneqarsinnaava?

Immikkut qularnaveeqqusiussaq inissiamit attartukkamit anereernermi utertinneqarsinnaavoq. Anilernermi inissiaq misissorneqareerpat, iluarsagassallu iluarsarneqareerpata immikkut qularnaveeqqusiussap matussutigineqareernerani sinneqarsimappat sinnerusut utertinneqarsinnaapput.

 

Arlalinnik uumasuuteqarniaraanni taava immikkut qularnaveeqqummut akiligassaq annerussalissava?

Aap, tassami uumasuutitaarnermi immikkut akiligassiissut uumasumut ataasiinnarmut attuuttuvoq. Tassa imaappoq, marlunnik uumasuutitaarniaraanni, taava immikkut qularnaveeqqummut akiligassat marluk akilerneqartariaqarput.

Uumasuutigisalli toquppat, allamillu pitaarniaruit, taava immikkut qularnaveeqqut atuutiinnassaaq.