Inissarsiorit

Inissiani allaffissuussatsinni inissarsiornissat ajornannginnerulertipparput. Maannamiit inissarsioreeraangavit inissamut neqeroorummik nassiussinissarput utaqqiinnartalissavat.

Mailikkut inissamut neqeroorummik nassiussiumaarpugut – allamik iliuuseqartariaqanngilatit. 

Iliuusissaq siulleq: Utaqqisunut allatsigit

Inissarsiulertinnak utaqqisunut allatseqqaassaatit. 

Utaqqisunut allattorsimaffimmut allatsikkuit, illoqarfimmi allatsiffigisassatut toqqakkanni aamma nunaqarfittaanut allatsissaatit. Taamaattumik eqqumaffigissavat, neqeroorut tigusat illoqarfimmi nunaqarfimmiluunniit inissiamut neqeroorutaanersoq.

Imminut kiffartuussivikkut utaqqisunut allatsissaatit akiliillutit. Utaqqisut allattorsimaffiinut qanorsuaq amerlatigisunut allatsissinnaavutit.

Utaqqisunut allattorsimaffiit illoqarfinnut/nunaqarfinnut immikkoortortanullu agguagaapput. Tassa imaappoq Sisimiuni nunaqarfiinullu utaqqisunut immikkut allattorsimaffeqarpoq, Qaqortumilu nunaqarfiinullu aamma allamik immikkut utaqqisunut allattorsimaffeqarluni il. il. Namminersorlutik Oqartussat kommunillu inissiaataannut allaffissornikkut ingerlatsisuuvugut, taakkulu immikkoortortat immikkut utaqqisunut allattorsimaffiuteqarput. Tassa imaappoq, Namminersorlutik Oqartussat inissiaataannut Sisimiuni nunaqarfiinullu utaqqisunut allattorsimaffeqarpoq, taamatullu immikkut kommunit inissiaataannut Sisimiuni nunaqarfiinullu utaqqisunut allattorsimaffeqarluni.

Utaqqisunut allatseqqaneq allattorsimaffimmut ataatsimut ukiumut 100 kr.-neqarpoq. Akiliut ukiumut ilivitsumut tassa januaarip aallaqqaataaniit decembarip naanerata tungaanut atuuppoq. Tassa imaappoq januaarimi novembarimiluunniit allatsikkaluaruit aki ataasiuvoq, ukiumilu nutaami utaqqisuni allatseqqaneq nutartissaaq.

Iliuusissap aappaa: Inissiamik neqeroorfigineqarnissat utaqqiuk

Utaqqisunut allatsissimaguit inissiamik inoqanngitsumut attartorsinnaalernissarnut utaqqivutit. Assersuutigalugu kommunip inissiaataanut Ilulissaniittunut ataatsimoorussamik utaqqisut allattorsimaffiannut allatseqqaguit, taava aamma Ilulissat nunaqarfiini inissianut allatseqqasimassaatit allatut kissaateqarsimanngikkuit. Inissiamik neqeroorfigineqarnissat taava utaqqiinnassavat.

Inissiamik attartugassaqaleraangat inissiap immikkoortortaqarfiata utaqqisunut allattorsimaffiani allaqqasunut siullernut neqeroorutigisarparput. Neqeroorummut akuersisuni inissarsiortuni sivisunerpaamik allaqqasimasumut inissiaq tunniunneqartarpoq.

Inissiamut neqeroorut imminut kiffartuussivikkut nassiunneqartassapput. Mailikkuttaaq nalunaarutigineqassaaq imminut kiffartuussivimmi neqerooruteqalersimanera.

Inissiamut neqeroorut utaqqisunut arlalinnut ataatsikkut nassiuttassavarput, taamaaliortarpugut inissiat inoqanngitsut inissarsiortunut sukkanerusumik tunniussinnaaniarlugit. Tamanna initaarnissamut utaqqinermut sivikillisitseqataasarpoq.

Iliuusissat pingajuat:

Inimik neqeroorfigineqaraangavit ullut arfineq marlut iluanni akissaatit. Piffissarititaasup iluani akisimanngikkuit, inissiamik soqutiginninnginnertut paasineqassaaq.

Neqeroorut imminut kiffartuussivimmi ’Aap’ ‘Naamik’-luunniit toorlugu akineqassaaq.

Naaggarsimaguit allamik iliuuseqaqqittariaqanngilatit. Inissiamik kissaatigisarnik attartugassaqalerpat neqeroorummik nassiusseqqissaagut.