Inissarsiortutut allattorsimaffik

Inissarsiulertinnak utaqqisunut allatseqqaassaatit.

Utaqqisunut allattorsimaffik illoqarfinnut/nunaqarfinnut immikkoortortanullu agguagaavoq, Nuummi utaqqisunut allattorsimaffeqarpoq, utaqqisunut allattorsimaffik alla Sisimiunut attuumavoq, utaqqisullu allattorsimaffiata pingajua Qaqortumut allassimalluni il.il. Illoqarfinnittaaq utaqqisunut allattorsimaffik immikkoortortanut agguagaavoq. Namminersorlutik Oqartussat kommunellu inissiaataannut INI A/S allaffissuussisuuvoq, taakkulu immikkoortortat immikkut utaqqisunut allattorsimaffiuteqarput. Tassa imaappoq, Namminersorlutik Oqartussat Sisimiuni utaqqisunut allattorsimaffeqarpoq taamatullu kommuni Sisimiuni utaqqisunut allattorsimaffiuteqarluni.

Utaqqisut allattorsimaffianiilernissamut imatut iliussaatit

Uumap immersugassap Utaqqisutallattorsimaffiannut qinnuteqarneq immersorneratigut utaqqisut allattorsimaffiannut allatsissinnaavutit. Qinnuteqaat ini@ini.gl -mut nassiunneqassaaq nammineerluniluunniit INImut saaffiginnilluni tunniunneqassaaq. Qinnuteqaatinni eqqarsaatigissavat illoqarfimmi sorlermi kiisalu suliffeqarfimmi sorlermi allatsinnissat. Soorunami illoqarfinni immikkoortortanilu arlariinni allatsissinnaavutit.

Qinnuteqaatit tigugutsigu, utaqqisuni allattorsimaffimmiinnissamut akiligassaq nassiutissavarput, akiligassarlu akilerneqareerpat utaqqisut allattorsimaffianniilissaatit.

Utaqqisut allattorsimaffianni inissisimanerit imminut kiffartuussivimmi takusinnaavat

Aki

Utaqqisut allattorsimaffiini allatsissimanerit tamarmik immikkut 100 koruuneqarput. Akiligassaq ukiumut ataatsimut atuuttarpoq. Tassa imaappoq, januarimi novemberimiluunniit allatsissimagaluaruit akiligassaq ataasiinnaavoq, utaqqisunullu allattorsimaffik ukiut tamaasa nutarterneqartarpoq.

Assersuutigalugu kommunep inissiaataani Sisimiuniittumut allatsissimaguit ukiumut 100 koruuneqarpoq. Namminersorlutik Oqartussat iniutaanut kiisalu kommunet iniutaannut allatsikkuit ukiumut 200 koruuneqarpoq, taakkulu saniatigut immikkoortortaqarfiit taaneqartut iniutaannut Maniitsumiittunut allatsikkuit ukiumut 400 koruuneqassaaq.

Ukiut tamaasa december/januarimi utaqqisunut allattorsimaffimmiinneq nutarterneqartassaaq. Taamaasiussaatillu akiligassap nassiutatta akilerneratigut. Akiligassaq akilerneqanngippat, utaqqisut allattorsimaffianni inissisimanerit annaassavat.

Inimik ujarlerneq

Utaqqisut allattorsimaffianniilersimaguit, inimik ujarlersinnaalissaatit. Malugiuk nammineerlutit inissiat inoqanngitsut qinnuteqarfigisussaagakkit. Inissiat inoqanngitsut nittartakkami, imminut kiffartuussivimmi kiisalu INImut nivinngaavimmi takusinnaavatit.

Immersugassap Inissiamut inoqanngitsumut qinnuteqaat –ip immersorneratigut qinnuteqassaatit. Qinnuteqaat ini@ini.gl -mut nassiunneqassaaq, nammineerluniluunniit INImut saaffiginnilluni tunniunneqassaaq.

Inimut immikkut piumasarisamut qinnuteqarsimasoq, utaqqisut allattorsimaffianni sivisunerpaamik allaqqasimasoq neqeroorfigineqassaaq.

Utaqqisuni allattorsimaffinni inissisimaneq

Imminut kiffartuussivimmi inissarsiortutut allatseqqanerit sumut killinnersoq takusinnaavat. Utaqqisuni allatseqqanerit allanngorarsinnaavoq. Taamaattumik ilai pingaarnersiuinermi allanit sallinngorlutik allattorsimaffimmiilersinnaasarput (inissianik attartortitsinermut atatillugu peqqussummi qinnuteqartut pingaarnersiugaasumik tulleriiarneqarnissaat allassimammat), inissarsiortut ilai initaaraangamik inissarsiortutulluunniit utaqqisuniiginnarnissartik uppernarsarlugu nutarsarnissaa kissaatigiunnaaraangamikku allattorsimaffimmiit peerneqartarput. Taamallu pisartut inissarsiortut tulleriiaannerannut allannguisitsisarput, allatsissimasut amerliartortillugit utaqqisuni inissisimanerit nikinneri annerulersarlutik.

Minnerunngitsumik ukiup aallartinnerani allattorsimaffimmiinneq nikeriangaatsiarsinnaasarpoq, inissarsiortutut utaqqisuniiginnarnissaq uppernarsarneqaraangat. Inissarsiortutut allatseqqaannarniarluni akiligassaq nassiussuunneqaraangat, utaqqisutut allattorsimaffimmiinneq ersikkunnaarallartarpoq, allattorsimaffimmiiginnarniarlunilu akiligassaq akileraanni allattorsimaffimmi inissisimaneq takuneqaqqissinnaalersarluni. Ullup akiliiffissatut ulluliussap qaangiunnissaata tungaanut, inissarsiortutut utaqqisuniinnermi inissisimaneq akiliisut amerlatsikkiartornerat ilutigalugu qaffaqqikkiartulertarpoq. Allattorsimaffimmiinerlu akileereernermi takuneqaqqissinnaalersarluni. Imaanngilarli allanit siulliulluni akiliigaanni, taava inissarsiorluni utaqqisutut allatseqqanermi siuariartoqarsinnaasoq.

Taamaammat ippassaammat normu 10-unerit ullumikkut 15-inngorsinnaavoq, tamannalu kukkunermik tunngaveqanngilaq. 

Inissiamut kissaatigisaminnut nuunniartut utaqqisutut allattorsimaffiat

Aamma inissiamut kissaatigalugu nuukkusuttunut utaqqisunut allattorsimaffeqarpoq. Inissiamik attartugaqareersimaguit, kissaatigalugulu inissiamut allamut nuukkusullutit taava kissaatigalugu inissiamut nuukkusuttut utaqqisutut allattorsimaffimmut ilanngunneqarsinnaavutit. Aamma suliffinniit ineqartinneqarsimaguit, kissaatigalugu inissiamut allamut nuunnissannut utaqqisunut ilanngunneqarsinnaavutit.

Taanna utaqqisutut allattorsimaffimmiinnerit ukiumut 100. kr-ineqarpoq.

Utaqqisutut allattorsimaffimmiissaguit taava INI A/S-imut inissiamut akiligassanik imaluunniit allanut akiligassaqassanngilatit.

Qasseriarlutilluunniit inissiamik neqeroorummut naaggaarsinnaatitaavutit, kinguneqartinneqanngitsumik.

Qinnuteqartut, inissianik marlunnik attartortut, inissiamik ataatsimik taarsiinniarlutik qinnuteqartut inissiamut kissaatigisaminnut nuunnissaminnut siulliullutik innersuunneqassapput.

Inissiamik najugassannik neqeroorfigineqassaatit, ilaqqutavit amerlassusiannut naleqqussakkamut. Ataani takussutissiaq assersuut takusinnaavat.