Innaallagiaq, Imeq kiassarnerlu

2023-mi naatsorsuutit
Atuisimanernut naatsorsuutit imminut kiffartuussivimmi apriilip 27-aniit 2023-mi takusinnaalissavatit. Atuinermut naatsorsuutit ukioq kingulleq iluatsilluartutut digitaliusumik saqqummiuteqqissavagut.

Najugaqartut NemID atorlugu isersinnaajunnaarnikut ini@ini.gl-imut attaveqarlutik imaluunniit 9.00-ip 12.00-illu akornanni 70 10 00-imut sianerlutik isernissamut ikiorneqarsinnaapput.

Najugaqartut allanik peqquteqarlutik isissutissaqanngitsut allatigulluunniit ikiugassaasut tassungattaaq attaveqarsinnaapput. 

Attartorunnaarsimasut innuttaasullu digitalimik allangarsisarunnaarsinneqarnikut naatsorsuutit allakkatigut tigussavaat.  

Innaallagiaq, imeq kiassarnerlu

Iserternermi atuisunngorneq  

Inigisarni nammineq uuttuuteqarpat, inimut iserternermi Nukissiorfinnut atuilerniarlutit nalunaassaatit.

Inip tigunerani atuisunngorniarluni nalunaarniarluni immersugassamik tunisissaatit. Immersorlugulu atsioriarlugu Nukissiorfinnut nassiutinngikkukku tunniutissavat.

Aamma www.sullissivik.gl-ikkut innaallagiaqarnermut, imermut kiassarnermullu atuisunngorniarlutit nalunaarsinnaavutit.

Nukissiorfinnut innaallagissamut, imermut kiassarnermullu atuisutut allatsigit

Inigisap tigunnginnerani ineqarfiup uuttuutit taamatissavai, illit innaallagiamik, imermik kiassarnermillu atuinerit ineqarfiup akilinnginniassammagit. Taamaattumik uuttuutitit Nukissiorfinnut nalunaarutiginissai pingaaruteqarpoq, taamaanngippat innaallagiaq imerlu matuneqaratarsinnaapput. Uuttuutippit nalunaarutiginissai illit nammineq akisussaaffigivat.

Nuunnermi naatsorsuusiorneq

Inigisat immikkut uuttuuteqarpat nuunnermi Nukissiorfinni taamatissavatit.
Uuttuutitit taamatinngikkukkit nooreernerpit kingorna innaallagiamut, imermut kiassarnermullu akiliissaatit.

Inissiaq attartukkat soraarukkukku atuisuujunnaarnissamut immersugassarnik tunisissaatit, immersorlugulu atsioriarlugu Nukissiorfinnut nassiutinngikkukku tunniutissavat.

Aamma www.sullissivik.gl-ikkut innaallagiaqarnermut, imermut kiassarnermullu atuisuujunnaarniarlutit nalunaarsinnaavutit.

Nukissiorfinni innaallagiamik, imermik kiassarnermillu atuisuujunnaarit

Inigisat qimanniarlugu nalunaaruit aamma ulloq taannaqqissaaq kallerup inneranik atuiunnaarniarlutit nalunaassaatit. Soorlu assersuutigalugu juunip naggataanut aniniarlutit nalunaarputit aamma ulloq taanna innaallagiamik atuiunnaarniarlutit nalunaassaatit, sioqqulluguluunniit qimanniaraluarukku.

Inissiat attartorneqanngitsut inissiaatileqatigiiffiup innaallagiaqarnikkut, imeqarnikkut kiassarnikkullu isumagisarpai, suliariartorneqariassagaluarpata piareersimatillugit.

Imeqarnermut kiassarnermullu akiligassinneqartarneq

Inissiat attartortittakkat amerlanerit immikkut uuttuuteqartinneqanngillat, taamaammat inissiat ataasiakkaat atuineri immikkut naatsorsorneqarsinnaasaratik. Najugaqarfiup immikkoortortaqarfianut aningaasartuutit inissiat angissusai naapertorlugit agguataarneqartarput.

Inissiamili najukkanni uuttuuteqarpat, ininni atuinerit eqqorlugu uuttortarneqartarpoq.

Ukiumut ataasiarluta attartortitsisoq sinnerlugu imeqarnermut kiassarnermullu akiligassatigut naatsorsuusiortarpugut.

Imeqarnermut kiassarnermullu a contomik akiliisarneq

Qaammatikkaartumik imeqarnermut kiassarnermullu a contortartussaaguit, qaammammut ataasiarlutit aaliangersimasumik akiligassinneqartassaatit.

•          A conto annertussusilerneqartarpoq, inissiap angissusaa imermullu akigititat tunnngavigalugit  naatsorsorneqarluni. Imermut akigititat illoqarfimmiik illoqarfimmut nikerarput imermik atuinerit aamma inissiaqarfimmiik inissiaqarfimmut nikerartuupput.

•          A conto annertussusilerneqartarpoq, inissiap angissusaa inissisimanera kiisalu kiassarnermut akigititat uuliallu akii, aallaavigalugit.

Imeqarnikkut kiassarnikkullu akinik allannguisarnerit

A conto, erngup ikummatissap uuliallu akiinut naleqqussarneqartarpoq, qulakkeerniarlugu imeqarnernut kiassarneqarnernullu akiliinaartoornallu akiliinikippallaannginnissat.

Akinik allannguissagaangatta qaffanissaq sap. ak. pingasunik sioqqullugu nalunaaruteqartarpugut.

Ukiumoortumik imeqarnikkut kiassarnikkullu atuisimanermik naatsorsuusiortarneq

Ukiumut ataasiarluta, imeqarnermut kiassarnermullu akiliutigisimasarnik utertoorutissaqarnersutit akiligassaqarnersutilluunniit, naatsorsuusiortarpugut. Naatsorsuusiornitsinni inissiaqarfippit immikkoortortaani imermut kiassarnermullu ataatsimut atuisimanisi, init angissusaannut agguataarlugit, tunngavisarpagut. Assersuutigalugu, inissiami 120 kvadratmeterisut angitisisumiittut inissiami 90 kvadratmeterisut angitigisumiittunit, annertunerusumik akiliuteqassaaq.

Naatsorsuusiornermi aamma apeqqutaatinneqartarpoq qanoq sivisutigisumik tassani najugaqarsimanersutit. Assersuutigalugu juunimi anisimaguit, januarimiik juunip tungaanut atuisimanerpiaannaat akilissavat.

Kingusinnerpaamik aprilip ulluisa 27-at, imminut kiffartuussivikkut nalunaaruteqartoqartarpoq ukiumut inissiaqarfissinni ataatsimoorlusi kiassarnikkut atuisimanisi katillugit naatsorsuusiat malillugit, ukiumut akilersimasarnik utertoorutissaqarnersutit akiligassaqarnersutilluunniit.

Akiligassiissuteqaqqittarneq akiliivallaaruteqarsimanerlu

Imermut kiassarnermullu akiliivallaarsimaguit, majimi attartornermut akiligassannut matussutigineqassapput. Attartornermut akiliutigisartakkannit annertunerusumik pissaqaruit, attartornermut akiligassanut tulliuttunut matussutigineqartassapput, akiliivallaarutigisimasavit nungunnissaasa tungaannut.

Akiliinikippallaarsimaguit, majip qaammataanut attartornermut akiligassamut ilanngullugit akiligassiissutigineqassapput.

Akilersugaqareersut atuivallaarsimanerminnut akiligassaminnik akilersuisinnaatitaanngillat, tak.

Inissianik attartortitsisarneq pillugu Inatsisartut peqqussutaat kap. 11, § 74, imm. 6.

Uani paasisaqarnerugit: 

Inissianik attartortitsisarneq pillugu Inatsisartut peqqussutaat

Naammagittaalliorneq

Imermut kiassarnermullu atuinermut ukiumoortumik naatsorsuusiatsinni kukkuneqarsorigukku naammagittaalliornissamut periarfissaqarputit. Naammagittaalliuut allaganngorlugu tunniunneqartariaqarpoq, minnerpaamillu paasissutissat uku ilaassapput:

•           Atuisup normua (assersuut 36-163-0001-02)
•           Atit najukkallu
•           Postnormu
•           Naammagittaalliornermi naatsorsuusiami immikkoortut suut akuerineqannginnersut          erseqqissarneqassaaq

Ukiumoortumik naatsorsuutit nassiussatta saqqaata ilanngunnissaa aamma eqqaamassavat.
Naammagittaalliuutit kingusinnerpaamik aggustip aallaqqaataani tigoreersimassavarput.

Naammagittaalliuut ini@ini.gl-imut nassiussinnaavat ornigullutilluunniit INImut tunniullugu.