Boligstøtte-mit illuliat tassaapput illut Namminersorlutik Oqartussat aningaasaliissutaannik sananeqartut. Illumik piginnittoq Namminersorlutik Oqartussaniit aningaasanik taarsersugassanik attartortinneqartarpoq, taamaalillutik Namminersorlutik Oqartussat qularnaveeqqussiisuullutik. Taarsigassarsianut nalikilliliineq nungussimappat imaluunniit taarsigassarsiat tamakkerlugit akilerneqarnissaata tungaanut taarsigassinneqarsimasoq Namminersorlutik Oqartussanut pisussaatitaaffeqarpoq.

Namminersorlutik Oqartussat sinnerlugit boligstøtte-mit illuutinik allaffissornikkut ingerlatsisuuvugut. Tamaammat ilaatigut taarsigassarsianit assiginngitsunit ingerlataqarneq, soorlu taarsigassarsiat uninngasunngornissaat aammalu taarsigassarsiat sinnerinik akiitsuulersimasunullu aaqqissuusseqqineq, akiligassanut kinguaattornermi akileeqqusissummik nassiussineq aammalu illunik utertitsinerit Namminersorlutik Oqartussat sinnerlugit isumagisarlutigit. Tammaattumik boligstøtte-mik illuuteqaruit saaffigisartussaavatsigut.

Uani atuarsinnaavatit pisussaaffiit pisinnaatitaaffillu, soorlu ikuallattuussagaluaraanni ajoqusissagaluaraanniluunniit sillimmasiineq, oqummik piianeq aammalu innaallagissamut, imermut kiassarnermullu akiliisarnermut nalunaarut.

Pisinnaatitaaffiit

Boligstøtte-p illutaanik pigisaqaruit, makku pisinnaatitaaffigaatit:

• Erniat akilikkatit nammineerluni nalunaarsuiffimmi ilanngaatigissallugit pisinnaatitaavutit. Erniat ilanngaatiginissaannut allakkiamik ukiut tamaasa januaarip/februaarip qaammataani nassinneqartassaatit. Erniat ilanngaatiginissaannut allakkiaq nukingisaarutaanngilaq, nammineerlutilli nalunaarsuiffissannut uppernarsaatitut atugassaraat. Erniat ilanngaatiginissaannut allakkiaq qanoq atussanerlugu akileraaruseriffimmut aperissaatit.
• Ineqarnermut meeqqanut tapiissutinik, meeqqamut ataatsimut 18-it inorlugit ukioqartumut 7 ½ %-inik annertussuseqartumik pisinnaatitaaffeqarputit, taamaattorli meeqqanut amerlanerpaamik arfinilinnut. Taamaattumik inoqutinni meeqqat tamarmik inuit allattorsimaffiannut nalunaarutigineqarnissaat eqqaamassavat. Akerlianik aamma meeraq illumiik najukkassinnit nuuppat, tamanna Boligstøtte-qarfimmut nalunaarutigissallugu pisussaaffigaat.
• Illu sillimmasiisarfimmut, nammineerlutit toqqarsimasannut ataatsimoorussamik sillimmasersimagukku, ajoqusikkanik, soorlu anorip, erngup ikuallannerullu ajoqusigaannik iluarsaassinissamut aningaasartuutit matutissallugit pisinnaatitaaffeqarputit. Sillimmasiinissaq inatsisitigut pisussaaffiuvoq, illulu sillimmaserneqarsimanngippat pinngitsaaliissummik illu utertillugu arsaarinnissutigineqarsinnaavoq.
• Illup eqqaani aneerasaartarfimmik, altanimik quimilluunniit sananissaq pisinnaatitaaffigaat, tamatumanili nunaminertamik atuinissamut akuersissummik kommunimut qinnuteqassaatit.
• Illuutivit inummit allamit tiguneqarnissaa kissaatigigukku, allat piginnittunngornissaat qinnuteqaatigissavat.
• Taarsigassarsiallip toqunerani taarsigassarsiallip aappaa, taarsigassarsisumut aappaasutut nalunaarsorsimasoq, inooqataa kingornussisussaaluunniit taarsigassarsinissamut piumasaqaatit piffissarlu akilersuiffissaq allanngortinnagit taarsigassarsianut ingerlasunut akiitsulittut inississaaq.
• Taarsigassarsiat sinnerisa siusinaartumik akilernissaannut pisinnaatitaaffeqarputit.
• Taarsigassarsiallip taarsigassarsiaanut ingerlasunut aamma allannguinermut taarsigassarsiaanut piffissaq sioqqullugu taarsigassarsisup taarsigassarsianik inaaraluni akiliinerani, akiliutinut tapiinissamut piumasaqaatit malillugit taarsigassarsiaritinneqartunut akiitsut 30 procentinik nalikillisinneqassapput. Tamatuma kingorna akiitsut nalikillisat piffissami taarsigassarsiallip akiliinissamut allakkatigut qinnuteqarfigisaaniit aamma taarsigassarsiat sinneruttut akilersorneqarnissaannut piffissamut 6 procentinik kingumut erniaqartitsisoqassaaq, taamaattorli taarsigassarsiat akilerneqarneriniit siusinnerpaamik ukiut tallimat ingerlareerneranni.

Imm. 2. Akiitsut naatsorsornerini aallaqqaammut taarsigassarsiaasunit akiligassanngortinneqanngitsut, akiligassat akiligassanngortinneqartut, akiitsut akilerneqanngitsut, sillimmasiinermut akiliussigallarneq akiligassallu katinneqassapput.

Imm. 3. Meeqqanut angerlarsimaffimmi najugaqartunut, 18-it inorlugit ukioqartunut, najukkami inuit nalunaarsorsimaffianni nalunaarsorsimasunut, taamaattorli amerlanerpaamik meeqqanut pingasunut, akiitsut sinneri 1 procentinik nalikillisinneqassapput.

• Nammineq illuliat sanaqateqarlunilu illuliat taarsigassarsiaasa sinnerisa siusinaartumik akilerneranni, taarsigasarsiat sinneri tamarmik akilerneqassapput.
• Taarsigassarsiat sinneri akiitsullu akilerneqarpata nammineerlutit illu pigilissavat, qularnaaveeqqutaasorlu Kalaallit Nunaata Eqqartuussuviani nalunaarsuutaajagaareerpat, illu qanoq iliussanerlugu nammineq aalajangersinnaavat, assersuutigalugu tunisinnaallugu, qularnaveeqqusiussinnaallugu allatullu piumasassinnik killilersuutigissallugu.

Pisussaatitaaffiit

Boligstøtte-imik piginnittutut, taarsersugassanik akilersukkat akilerneqarnissaata tungaanut, Namminersorlutik Oqartussanut assigiinngitsunik pisussaaffeqarputit:

1. Illu qularnaveeqqusiunneqarsinnaanngilaq eqqartuussivitsigullu suliassanngortitsinermi qularnaveeqqutigineqarsinnaanani.
2. Illup isaterneqarnissaa nuunneqarnissaaluunniit inerteqqutaavoq.
3. Illumi allanngortitsinissaq, attartortitsinissaq illumilluunniit atukkiussinissaq aatsaat Naalakkersuisut akuersinerisigut, piumasaqaatillu taakkunannga akuerineqarnerisigut pisinnaapput.
4. Tunniussinissaq taamaallaat Namminersorlutik Oqartussanut, pisisussamulluunniit taakkunannga akuerineqartumut, piumasaqaatillu taakkunannga akuerineqartut malillugit pisinnaavoq.

BSU-mit taarsigassarsilluni illulianut tamanut taarsigassarsiat sumiginnarneqartutut isigineqassapput:

1. Taarsigassarsianut erniat akilersuutillu akilerneqarsinnaanngippata, aammalu taarsigassarsiallip akiligassat akilinngitsuukkat pigisamut aalaakkaasumik qularnaveeqqusiussaqarluni taarsigassarsinermi allagartaq, tak. Kalaallit Nunaanni qularnaveeqqusiisarnermut inatsit malillugu ernianut akilersuinermullu maleruagassat naapertorlugit piffissaliussap naannginnerani akiitsut akilinngitsuukkat akilersimanngippagit.
2. Taarsigassarsiallip inissiaq isumannaatsumik aserfallatsaalisimanngippagu, taamaalillunilu Naalakkersuisut qularnaveeqqusiiffigineqarnerat ajornerulersinneqartoq paasineqarpat.
3. Taarsigassarsiallip inissiaq ikuallattoornissamut ajoqusernissamullu sillimmasersimanngippagu.
4. Taarsigassarsiallip inissiaq isaterpagu.
5. Inissiami init inuussutissarsiorfittut iluarsaanneqarpata, imaluunniit inissiamiit inuussutissarsiutinik ingerlatsisoqarpat. Tassungali inuussutissarsiutit iluanaarutaannginnerusut ilaatinneqanngillat.
6. Taarsigassarsialik Naalakkersuisunit akuerineqaqqaarani inissiamit nuuppat imaluunniit inissiamik attartortitsippat.
7. Taarsigassarsialik inissiaq qularnaveeqqusiullugu taarsigassarsippat.
8. Taarsigassarsialik Naalakkersuisut inissiamik takuniaaneranni iseqqusinngippat.
9. Taarsigassarsiallip iluarsaassineq, alliliineq pitsanngorsaanerluunniit Naalakkersuisut taarsigassarsiissutigisaat naammassinngippagu.

Taarsersugassanut pisussaaffimmik naammassinninngitsoqarpat, akilersukkat sinneri akiligassallu tamaasa ataatsikkut akilersinneqarsinnaapput. Kingunerluutigisinnaasaallu anneq tassaavoq illumiit anisitaanissaq.

Boligstøtte-p illuutai namminerisamik innaallagissamut-, imermut- kiassarnermullu uuttortaateqarput, atuinerlu nammineq akilerneqartassaaq. Tassa imaappoq, illumut iserteruit innaallagissamut-, imermut- kiassarnermullu illup uuttortaatai Nukissiorfinnut nalunaarutigissavatit. Aammattaaq boligstøtte-p illuutaaniit aniguit uuttortaatit atorunnaarneri nalunaarutigissavatit

Innaallagissamut-, imermut- kiassarnermullu atukkatit Nukissiorfinniit qaammatikkaartumik naatsorsuusiorneqartassapput.

Inissialiornermut tapersiissuteqartarneq aqqutigalugu illuummik piginnittuuguit, ikuallattoornermut aamma ajoqusernissamut sillimmasiinermik peqartussaavutit. Sillimmasiinerup matussusertussaavai:

• Illumi ikuallattoornermi aamma ajoqusiinerit iluarsaannerat
• Ajoqusernerit, tamanna pisariaqassappat, iluarsaannerisa nalaanni utaqqiisaasumik ineqartitaaneq. Utaqqiisaasumik najugaqarfigisat INImut nalunaarutigissagakku eqqaamassavat
• Sillimmasiinermut akiliutissaq akilereerukku aatsaat sillimmasiineq atuussinnaalissaaq.

Taarsigassarsiannut qaammatikkaartumik akiliuteqartarnerit ingerlaannassaaq – aamma illup ajoqusernerisa iluarsaanneqarnerisa nalaani. Akiliinngitsoorneq isumaqatigiissutinik unioqqutitsinertut isigineqassaaq. Isumaqatigiissutinik eqquutsitsinnginnerup nassatarissavaa, akiitsut sinneri, taarsigassarsiat kiisalu kinguaattuussutaaratarsinnaasut ataatsikkut tamaasa illit akilertussanngussagakkit.

Ikuallattoornermi ajoqusernerit

Ajutoorneq pisimappat illulu ikuallannermit ajoqusersimappat, taava piaartumik:

• Illu isumannaassavat, annertunerusumik ajoquseqqunagu
• Sillimmasiisarfik attaveqarfigissavat ajoqusernerlu nalunaarutigalugu

Tamatuma saniatigut attaveqarfigissavatsigut, ukulu pissarsiarisussaassavagut:

• Sillimmasiisarfimmut nalunaarutip nuutsinnera
• Ikuallattoorneq pillugu nalunaarut aamma politiit nalunaarutaata nuutsinnera, politiit nalunaarutaat sananeqarsimappat

Illumit ajoqusernerit

Illut ajoqusersimappat, taava illit:

• Illu annertunerusumik ajoquseqqunagu isumannaassavat. Maluginiassavat illup qalissiaa, igalaat imaluunniit illup sannai allat ajoqusersimasinnaammata
• Sillimmasiisarfik attaveqarfigissavat ajoqusernerlu nalunaarutigalugu
• Attaveqarfigissavatsigut ajoqusernerullu annertussusaa nalunaarutigalugu

Taarsiissuteqarneq
Sukkulluunniit inissialiornermut tapersiissuteqartarneq aqqutigalugu taarsigassarsiatit qularnaveeqqusersinnaavatit. Taama iliorsinnaavutit illup nalinga qularnaveeqqutigalugu. Illu ajoqusernermigut nalikillisarmat, piumasarisarparput illit, sillimmasiisarfik uagullu peqatigaluta ajoqusernerit suut sillimmasiisarfimmit matussuserneqassanersut isumaqatigiissuteqassasugut.

Illut annikitsuinnarmik ajoqusersimappat, ajoqusernera sukkanerpaamik iluarsaanneqassasoq isumagissavat, taamaalilluni taarsigassarsianut qularnaveeqqutaasoq ajorseriannginniassammat.

Illut tamakkivilluni ikuallappat illumik nutaamik taartissaanik sanasoqarnissaa isumannaassavat. Matuma kingorna inissialiornermut tapersiissuteqartarneq aqqutigalugu taarsigassarsiannut illu nutaaq qularnaveeqqutinngussaaq.

Illup nutaap sananeqarnerani aningaasartuutit tamakkerlugit sillimmasiissutip matussusinngippagit, aningaasartuuteqarneruneq nammineerlutit aningaasalersugassaraat. Tassa illup sananeqarneranut Namminersorlutik Oqartussaniit aningaasanik amerlanerusunik taarsigassarsisinnaanngilatit. Sillimmasiisarfiup illup pitsaassuseqataa angeqqataalu ilinnut neqeroorutigippagu, ilinnut aamma uatsinnut sillimmasiisarfiup allaganngorlugu qulakkiissavaa, inissialiornermut tapersiissuteqartarneq aqqutigalugu taarsigassarsiannut naleqquttumik qularnaveeqqusiinissamut illu naleqarumaartoq.

Skimmelsvamp tassaavoq oquk, tassanngaanniillu pujoralaat tappiorannartut siammartertarput peqqissutsimut ajoqutaasinnaasut.

Oquk illuni isugutattuni nassaassaagajuppoq, qaleriaartumillu naasarpoq assigiinngitsorpassuarnik qalipaateqarluni, soorlu qernertuulluni, kajorujulluni qorsuulluniluunniit. Oquk nalinginnaasumik nassaassaasarpoq:

• Ungalitsap qaani ataaniluunniit
• Teqeqquni
• Naqqup ataani
• Illup ilaani allani, isugutserfiusartuni

Oquk ukiuni kingullerni ajornartorsiutaalersimavoq aamma illut inissiallu amerlasuut eqqugaasimallutik. Taamatuttaaq inissialiornermut tapersiissuteqartarneq aqqutigalugu illuutillit arlallit, illuutiminni oqummik – pingaartumik illuni pisoqaanerusuni – peqartoq pasitsaassisarput.

Nammineerlutit akiliissaatit, tassami illit nammineerlutit illu pigaat aserfallatsaalinissaalu pisussaaffigalugu.

Pinaveersaartitsineq

Oquup pinngitsoortinnissaa pitsaanerpaaq tassaavoq, illuvit isugutsinnginnissaa. Taama iliorsinnaavutit assersuutigalugu imaaliornikkut:

• Uffarfiup igaffiullu silaannarissartarnissaat isumagalugu
• Atisat illup iluani panersernissaat sapinngisamik pinaveersaarlugu
• Silamiit erngup isaasinnaanera eqqumaffigalugu
• Erngup aqqutaasa ussiissisinnaanerat nakkutigalugu. Assersuutigalugu tassaasinnaapput erngup kuuffiiniit, perusuersartarfimmiit, erruivimmiit imaluunniit errorsivimmiit ussitsoqartoq.
• Init kiassarneqanngitsut isugutsersinnaanerat aarlerinartoqarnerummat tamanna eqqumaffigiuk.

Oquk pillugu pasitsaassineq

Illuit oqoqarsinnaanera pasitsaakkukku, najukkanni INImut attaveqassaatit. Suliffeqarfik illit illuit oqoqarneranik misissuisinnaasoq innersuussinnaavarput. Matuma kingorna allakkat puuat ilitsersuummik kalaallisut qallunaatullu allassimasumik, misiliinermullu atortunik imalik ilinnut nassiunneqassaaq. Nammineerlutit misiligutissanik tigusissaatit allakkallu puuannut ikeriarlugu suliffeqarfimmut utertillugu nassiutissavat, kingornalu akissutisissaatit. Misiligummik tigusiffigisat aamma assiligukku ilanngullugulu nassiullugu tamanna iluaqutigisinnaavat. Oqummik misissuineq qanoq akeqassanersoq suliffeqarfiup ilinnut nalunaarutigissavaa.

Illit illunni oqoqarpat peerneqartariaqarpoq. Tamatuma kingunerisaanik:

• Oqoqarfiusoq klorin atorlugu asanneqassaaq
• Sanaartornermi atukkat taarserneqassapput
• Illu isaterneqassaaq

Qaammatikkaartumik akiligassat qaammatit tamaasa nassiuttarpagut. Akiligassat kingusinnerpaamik qaammatip aallartinnerani akilersimasussaavatit. Qaammatip ulluisa aallaqataat nalliuttuuppat arfininngornerulluniluunniit, akiliiffissamut killiliussaq tassa ulluinnaq tulleq.

Akiliuteqartarnermi kiffartuussivimmut Betalingsservicemut atalerumallutit nalunaarsinnaavutit. Akiliuteqartarnermi kiffartuussivimmut nalunaarsimaguit, akiligassatit piffissaq eqqorlugu isumamineersumik illit kontonniit akilerneqassapput. Taamaalillutit akiligassat akilinngitsuukkat pillugit isumakuluutissaarutissaatit.

Nuussimaguit, najugaqarfippit allanngornera najukkanni INImut nalunaarutigissavat, taamaalillutit akiligassatit ingerlaavartumik tigusinnaaniassagakkit.

• Uani quppernermi paasisinnaavatit makku:Taarsigassarsianut tunngatillugu aaqqissuussat suuneri
• tapiissutinik qanoq annertutigisunik pissarsisinnaanerit
• akiitsut akilersornissaannut periarfissaq
• erniat qanoq ilanngaatigineqarsinnaaneri
• taarsigassarsiat sinnerisa akilerneqarsinnaaneri
• tapiissutit aamma naafferartumik akilersunissamut periarfissat

Taarsigassarsiatit nammineq kisivit akilertussaanngilatit:

• Namminersorlutik Oqartussat ernianut aamma inissialiornermut tapersiissuteqartarneq aqqutigalugu taarsigassarsiat akilersornerannut 30 %-imik tapiissuteqartarput
• Tamatuma saniatigut Namminersorlutik Oqartussat meeqqanut angerlarsimaffimmi najugaqartunut tamanut – taamaattoq amerlanerpaamik meeqqanut arfinilinnut – ineqarnermi meeqqanut tapiissutinik 7,5 %-iusunik tunniussisarput.

Akiligassatit akilerukkit nammineq isumamineersumik tapiissutit pissarsiarissavatit. Aningaasat ataasiartumik akilersinnaanngikkukkit taamaalillutillu kinguaattoorlutit, naafferartumik akilersuinissaq pillugu isumaqatigiissusiornissaq siunertaralugu saaffigisinnaavatsigut,  taamaalillutit kinguaattoorutitit naafferartumik akilersinnaaniassagakkit.

Kinguaattoorutit naafferartumik akilersornissaannut ilanngullugu qaammatikkaartumik akiligassaq nassiuttassavarput.

Erniat ilanngaatigisinnaasat

Taarsigassarsiaqaruit ernialersukkanik inissialiornermut tapersiissuteqartarneq aqqutigalugu illumik pigisaqarlutit akileraarutiniit erniat ilanngaatiginissaannut pisinnaatitaavutit. Tassa imaappoq, akileraarutiniit erniat akilernikuusatit ilanngaatigisinnaavatit.

Ernianut ilanngaataasinnaassappata :

• Erniat akilersimassavatit
• Taakku akileraarutinut tunngasunik nammineerluni nalunaarsuiffinnut allassavatit

Erniat akileraarutinit ilanngaatigineqarsinnaasut pillugit allakkat ukiup aallartinnerani ilinnut nassiutissavagut. Ilutigisaanik inissialiornermut tapersiissuteqartarneq aqqutigalugu illuutillit taarsigassarsiaasa erniaat, akileraarutiniit ilanngaatigineqarsinnaasut allattorsimaffiat  Akileraartarnermut oqartussaasunut nassiuttarparput. Paasissutissat allakkaniittut nammineerlutit nalunaarsuiffimmik immersuininni atussavatit, kisitsit ilanngaatissaq eqqortuunersoq misissorsinnaavat

Taarsigassarsiat sinneruttut tamaasa ataatsikkut akilerneri

Inissialiornermut tapersiissuteqartarneq aqqutigalugu illuuteqaruit imaluunniit nammineq illuliamik peqaruit, taarsigassarsiarisatit sinneruttut tamakkerlugit ataatsikkut akilersinnaavatit.

Taarsigassarsiat erniallit atorlugit inissialiornermut tapersiissuteqartarneq aqqutigalugu illumik peqaruit, taarsigassarsiat sinneruttut tamakkerlugit ataatsikkut akiliiguit 30 % -imik akikillisaavigineqassaatit malitigisaanillu 6% ernialerneqassallutik, nalikillisat piffissami taarsigassarsiallip akiliinissamut allakkatigut qinnuteqarfigisaaniit aamma taarsigassarsiat sinnerutut taamaattorli taarsigassarsiat akilerneqarneriniit siusinnerpaamik ukiunut tallimanut. Kinguaattooruteqaruilli taakkununnga akikillisaavigineqarsinnaanngilatit.

Nammineerluni illuliamik allamillunniit illumik peqaruit, tapiiffigineqarsimanngitsumik, akikillisaavigineqarsinnaanngilatit.

Taarsigassarsiavit sinneri ataatsikkut tamaasa akilerniarukkit, najukkanni INImut saaffiginnissaatit. Ulloq akiliiffissaq nalunaarutigineqassaaq, akiliutissannut naatsorsuusiamik tunineqassaatit. Illit aningaaseriviit sinnerlutit uatsinnut aamma saaffiginnissinnaavoq tamaattoqassappat illit uppernarsaammik ilanngussissaatit.

Taarsigassarsiatit utertillugit akilereerukkit, illup qularnaveeqqutaa pillugu allagaq eqqartuussivimmi illut piginnittuinik nalunaarsuisarfianut atorunnaarsinneqartussanngorlugu nassiutissavarput. Ilutigisaanik inissialiornermut tapersiissuteqartarnermi maleruagassanut maanna pituttoqqajunnaarnerit pillugu uppernarsaammik ilinnut nassiussissaagut.

Inissialiornermut tapersiissuteqartarneq aqqutigalugu illuutilik toquppat, eqqartuussivimmik kingornussassanik suliaqartoq nalunaarfigissavarput makku pillugit:

• Toqukkut qimaguttup taarsigassarsiai. Assersuutigalugu tassaasinnaapput taarsigassarsiat erniaqanngitsut aamma taarsersugassaanngitsut, taarsigassarsiat allanngortitat, taarsigassarsiat aaqqissuteqqitat, nammineq illuliamut imaluunniit sanaqateqarluni illuliamut taarsigassarsiat imaluunniit taarsigassarsiat nalinginnaasumik ernialersukkat
• Akiitsut sinneri
• Akiligassat kinguaattoorutaasimasinnaasut
• Piginneqatigisinnaasat
• Toqukkut qimaguttup ilaqutai imaluunniit piginneqatai illumi suli najugaqarsimappata, pigisanut illumullu akisussaaneq nalinginnaasumik eqqartuussivimmi kingornussassanut tunngasunik sulialimmit tiguneqartarpoq. Eqqartuussivimmi kingornussassanik sullissisup illu kimit kingornunneqassanersoq matuma kingorna misissortarpaa.

Inissialiornermut tapersiissuteqartarneq aqqutigalugu illuummik kingornussisimaguit, inissialiornermut tapersiissuteqartarneq aqqutigalugu illuummik piginnittuusinnaanermut piumasaqaatit peqqussummiittut naammassisimaneritit matumalu kingorna illu tigummiinnarsinnaanerit nalilersussavarput. Assersuutigalugu imaassinnaavoq illit:

• Najugaqarnissamut pisussaaffik eqquutsissinnaagit eqquutsikkumagilluunniit
• Taarsigassarsiat erniaat utertillugillu akilersornerat akilersinnaagit
• Namminersorlutik Oqartussanit taarsigassarsineq aqqutigalugu inissialiornermut tapersiissuteqartarneq aqqutigalugu illumik allamik pigisaqariinngitsutit
• Kingornussisussaanut, aappaasumut, aappaasutut nalunaarsorsimasumut inooqataaguit peeruttumut.

Eqqartuussivimmi kingornussassanik sullissisup suliaq nalilersoreerpagu makku pillugit nalunaarutisissaagut:

• Piginneqataasoq kingornussassat allanngortinnagit illumiiginnarsinnaasoq.
• Kingornussisussat illu tigugaat
• Imaluunniit illu Namminersorlutik Oqartussanut utertinneqarluni tunniunneqartoq

Illumik piginneqataaguit, kingornussiguit, aappaaguit, aamma aappassutut nalunaarsorsimasuuguit qaammatikkaartumik akiligassaq ilinnut nassiunneqartalissaaq.