INI A/S-ip inissiat allaffissuussarai, inissianilli pigisaqarani. Namminersorlutik Oqartussat kommunillu inissianik piginnittuupput, ingerlatsinerli INI A/S-ip ingerlataraa. Taamaammat INI A/S inissianik piginnittunut attartortunullu ataqatigiisitsisuuvoq.
Inissianik piginnittut atugassarititaasunut tamaginnut, soorlu assersuutigalugu inissiamut attartornermut akiliutip angissusissaanut qanorlu aserfallatsaaliinermut annertutigisunik aningaasaliisoqassanersoq aalajangertarpaat. INIp suliassaa tassaavoq, inissianik piginnittut sinaakkusiussaasa iluini, suliassanik allaffissuussinissaq. Sorpiaallu INIp suliarisarnerai atuarumagukkit, assip ataani nassuiaat atuarsinnaavat.
INI suleriva?
Suliarisartakkagut ukununnga agguataarneqarsinnaapput:
- Inissianik allaffissuussineq
- Pisortat inissianut aningaasalersuisarnerat – BSU-mit taarsigassarsiat
- Illuutinik sullissineq
Uagut inissianik pigisaqanngilagut, inissianilli Namminersorlutik Oqartussanit kommunenillu pgineqartunik ingerlatsinermik allaffissuussilluta.
Inissianik allaffissuussineq
Inissianik 9.000-it missaanniittunik allaffissuussilluta suliaqarpugut. Inissianik ingerlatsinermik allaffissuussilluta oqarutta, isumaqarpoq, makku ilaatigut suliarisarigut:
- Missingersuusiorneq aamma ineqarnermut akiliutissanik akiliisitsisarneq
- Utaqqisut allattorsimaffiannik aqutsineq
- Missingersuusianik nakkutilliineq ukiumoortumillu naatsorsuusiorneq
- Aserfallatsaaliuinissanik pilersaarusiorneq suliaqarnerlu
- Inissiamut iserternerni inissianiillu aninerni misissuisarneq
- Najugaqartut oqartussaaqataalersinniarlugit najugaqarfinni siulersuisunik tapersersuineq
Inissianik piginnittut isumaqatigiissusiorfigisarpaatigut allaffissornikkut suut ingerlatissanerigut aalajangerniarlugit. Pisariaqartinneqartut naapertorlugit ikiuinissarput nalimmassarsinnavarput. Inatsisartut ineqarneq pillugu peqqussutaat kiisalu nalunaarutit taakkununnga attuumassutillit naapertorlugit allaffissornikkut ingerlatsivugut.
Pisortat inissianut aningaasalersuisarnerat – BSU-mit taarsigassarsiat
BSU-mit taarsigassarsiat ingerlanneqarneranni allaffissuussisuuvugut, nammineq illuutillit piginnittui Namminersorlutik Oqartussat aqqutigalugit atorniarsimappata, illuutit nammineerlutik pigineqartut aningaasalersorneqarnerat pillugu allaffissuussisuulluta.
Illuutinik sullissineq
Illuutinik sullissineq tassaavoq najugaqarfinni sulisutta najugaqarfinni ataasiakkaani sullissinerat. Assersuutigalugu tassani eqqiluisaarneq, aputaajaaneq, mikisualunnik iluarsaassineq assigisaallu pineqarput.
