Siunnersuutit ilitsersuutillu

Aningaasaliissutinit iluanaarutit
Ineqarnermut akiliutinit 21,3%-it aningaasaliissutinit iluanaarutitut illunik piginnittunut (Namminersorlutik Oqartussat kommuunillu) tuttarput.

Aningaasaliissutinit iluanaarutit tassaapput illunik piginnittut (Namminersorlutik Oqartussat kommuunillu) illunut aningaasaliissutaata ernialersorneri. Qaammatit tamaasa ineqarnermut akiliutinit tiguneqartarput illunillu piginnittunut toqqaannaq nuunneqartarlutik.

Ukiumoortumik Namminersorlutik Oqartussat kommunellu aningaasaliissutinit ilunaarutissaat illup sananeranut akiusup 1,5%-iannik annertussuseqassaaq.

Aningaasaliissutinit iluanaarutit pillugit malittarisassat attartortitsisarneq pillugu peqqussummi aalajangersagaapput. Attartortitsisarneq pillugu peqqussut uani takusinnaavat: Inatsisit

Ingerlatsineq
Ineqarnermut akiliutiniit 67,8%-it ineqarfittut immikkoortortaqarfinnut tuttarput.

Ineqarnermut akiliutip annerpaartaa ingerlatsinermut atorneqartarput. Ineqarfittut immikkoortortaqarfiit immikkut nammineq aningaasanik aqutsisarput namminerlu ingerlatsinermut naliginnaasumut, aserfallatsaaliuinermut nutarterinernullu aningaasartuutit isumagisarlugit.

Ingerlatsinermut aningaasat qanoq agguaanneqartarnersut immikkoortortaqarfinni assigiinngitsunni assigiinneq ajorpoq. Illit najugaqarfippit immikkoortortaqarfia najugaqarfiullu naatsorsuutai uani nassaarisinnaavatit:Najugaqarfiit immikkoortortaqarfii

Allaffissornikkut akissarsiat
Allaffissornikkut tapiissutit illunik piginnittup illuminik aqutsinerani illunik piginnittup aningaasartuutaanut matussutaasussaapput.

Imermut kiassarnermullu akiliigallarnerit (aconto)
Imermut kiassanermullu aningaasartuutit Nukissiorfinnut akilerneqartarput.

Najugarisanni errorsivimmik, erruivimmik panersaavimmillu ikkussuinissamut periarfissaqarputit, taamaattorli igaffimmi atortorissaarutinik ikkussuinissamut kissaateqarnerit uatsinnut ilisimatitsissutigissavat. Taamaasiussaatillu immersugassap Errorsivimmik/Erruivimmik/panersaammik ikkussinissamik akuersissut –ip immersorneratigut ini@ini.gl -mullu nassiunneratigut imaluunniit sumiiffigisanni INImut ornigulluni tunniunneratigut.

Ikkussuinissamut akuersisoqassaaq, piumasaqaatit uku naammassineqarpata:

• Ikkussuinerit tamarmik ineqartumit akilerneqarnissapput
• Attartortup siunissami aserfallatsaaliinissani tamanut maskine-nillu ikkussuinernut tamanut akisussaassaaq
• Errorsivik, imermut kusertitsivimmut uffarfeqarfimmulluunniit inissinneqassaaq
• Errorsivik erruivillu imermut milittaatilimmik/Aquastop-imik pilerneqarnissapput
• HPFI-qamittaammik maskine-lluunnit innaallagissamut ikkuffissaanik (jordforbindelse)-imik ikkussisoqassaaq
• Innersuussuterput naapertorlugu ilisimasallit akuerisaasut ikkussuisarnerattut panersaavik ikkunneqassaaq. Innersuussutigissavarpullu panersaavik aalamik katersuiffittalik (kondens) atorneqassasoq
• Attartortitsisup aalajangersinnaavaa attartortortoq ikkussuinngikkallarnertut iluseqalersitsilluni aaqqiisussanngortinneqassasoq, imaluunniit ikkussuinerit attartulersussanut tullernut atorneqarsinnasunngorlugit uninngatiinnarneqassasut

Innersuussutigissavarputtaaq innaallagissamut ikkussuinissamut akuerisaasunut ikkussuititsissasutit. Namminerli ikkussuunniarukkit tamanna illit nammineq akisussaaffigissavat, ajutoortoqarpallu taarsiisussanngortinneqaratarsinnaavutit.

Malugiuk, piffissap nipiliorfioqqusaanngitsup avataani maskine-p nipiliortarnera eqqaamiorisanit naammagittaalliuutaappat, akuersissut atorunnaarsinneqarsinnaammat.

Inissianni kuuffivit, kuuffiit katiguffiisa tungaannoortut, eqqiartarnissaat illit akisussaaffigaatit. Tamanna isumaqarpoq kuuffinnik milittoortitsisinnaasunik ikisisoqannginnissaa illit akisussaaffigigit aammalu milittoortitsinissaq pinngitsoorniarlugu kuuffiup eqqiakulanissaa akisussaaffigigit.

Erngup kuuffii nammineq salittarnissaat toqqarsinnaavat ilinnulluunniit akiligassiarineqartussanngorlugu INI A/S-imi inissialerisunut tamanna suliassanngortissinnaavat.

Pitsaaliuineq
Kuuffinnik milittoortitsinissaq pinngitsoorniarlugu, makku iliuuserisinnaavatit:

• Siatat orsuinik nerisassalluunniit sinnikuinik kuuffinnut kueraanaveersaarnikkut
• Nutsanik allanilluunniit riste-miit piiaasarnikkut, imermullu miligut peeriarlugu errorfikkut kuutsillugu salittarneratigut
• Kuuffinnut saligummik akuttuallaanngitsukkut kuuffiit salittarnerisigut

Imermut miligutip salittarnissaa pingaarutilerujussuuvoq, uffarnermiit ipermik militsitsisinnaasumik katersuuttoqartarmat. Erngup miligutaa peersinnaavat uffarfiup kuuffiata ristitaa peeriarlugu. Riste-p ataani erngup milittaataa qaqinneqarsinnaasoq nassaarisinnaavat. Imermut miligutip peernerani kuuffimmiit tipiliortoqartarnera nalinginnaavoq. Taamaattumik imermup miligutip erngertumik eqqiarnissaa pisariaqarpoq. Imermut miligummiittoq ipeq piiaruk, salilluarlugulu. Kingornalu imermut miligut kuuffimmut utertiguk, sivisunerusumillu kuuffiup tipiliunnginnissaa piniarlugu imermik immerlugu.

Kuuffiit milinngasut
Kuuffik milissimappat, kuuffimmut saligummik eqqiarlugu misilissinnaavat. Tamannali iluaqutaanngippat, uatsinnut ikioqqullutit attaveqarsinnaavutit. Innersuussutigissavarpulli pinaveersaartitsiniutit tamaasa maleqqullugit, taamaasillutit inissialerisutsinnit ikiorneqarnissat akiligassiinermik kinguneqartussaq pinngitsoortissinnaassagakku.

Ilitsersuut

Oquk inuit ilaasa peqqissusaannut akornusiisinnaasunik tappiorannartunik peqarpoq. Silaannarissuutitsinikkut najukkanni oqoqalernissaa pinngitsoortissinnaavat.

Pinngitsoortitsineq

Oqoqalernissaanut nammineerlutit pinngitsoortitsisinnaavutit. Oquk isugutattuni kiattumilu annertusiartortartuuvoq, oquulli inigisanni annertusiartornissaralua uku siunnersuutit arfineq pingasut atorlugit annikillisarsinnaavat:

1. Silaannarissaaneq

Inigisanni ullormut pingasoriarlutit silaannarissaasarit. Taamaasiornikkut silaannaap taarserarnera isugutaallu aninissaa qularnaassavat. Silaannarissaanerli iluarnerusoq tassaavoq sivikitsumik noqqoruutsitsineq. igalaamik sivisuumik ikersisimatitsiguit iikkat nillertunngortissavatit isugutatsitsilerlugillu, taamaasiornerlu oqoqalersitseratarsinnaavoq.

2. Illup iluani atisanik manisinak
Errortat silamut manisakkit, errortammi silaannarmik isugutatsitsilersarput, tamannalu oquup alliartornissaanut pilersitsisuusarpoq. Atisat silami panersernissaanut periarfissaqanngikkuit, manisivik peqittagaq atorsinnaavat imaluunniit panersaaveqaruit panersaavimmut panersiillutit.

3. Kiassusseq assigiiartiguk

Najukkami inini tamani minnerpaamik 18-nik kiassuseqarnissaa isumagiuk, isugutak nillertumi annertusiartortarmat.

4. Aalamik milluaasoq/tigooraasoq nerisassiornermi atortaruk

Inigisanni aalap milluaasuanik tigoorasuanilluunniit peqarpat, nerisassiorluni qalatitsinermi aalarnerup annertuup peerneqarnissaa pillugu atortaruk. Aalamut milluaasumik/tigooraasumik peqanngikkuit, nerisassioreernerup kingornat silaannarissarluarnissaq innersuussutigivarput.

5. Isugutammik akornusertoqarsimanersoq nakkutigiuk

Inigisanni imermik akornusertoqassappat, erngertumik iluarsartuunneqassaaq. Imermik akornusertoqarnerani isugutaap tamakkiisumik piiarneqarnissaa qularnaassallugu pingaaruteqarpoq, taamaasilluni oquk isugutattumi annertusiartunnginniassammat.

6. Iikkat silamut qanittuniittut nillissusaat maluginiaruk

Pequtit iikkanut silamut qanittuniittunut talitsinneqassanngillat, silaannaap iikkap killingatigoortup kaaviaarnerata ajornerulerneranik peqquteqarsinnaammat. Iikkani silamut qanittuniittuni pequtit iikkamit 10 centimerinik ungasitsiginissaat innersuussutigissavarput. Iikkat silamut qanittut kisimik uani pineqarput.

7. Silaannaap aqqutaa silaannarissarfiillu misissukkit

Igalasserfinni silaannarissarfeqarpat ammatinneqarnissaat innersuussutigaarput, inissiami silaannaaq ataavartumik taarserarniassammat.

Silaannaap aqqutai silaannarissarfiillu pujoralammik ipermilluunniit milinngannginnissaat isumagisaruk. Pingaartumik igaffimmi uffarfimmilu isugutaap annertuffiani.

8. Eqqiaaneq

Pujoralaat isugutammik katersisuupput, isugutaallu oqummik tigooraasuullutik. Taamaattumik eqqiaakulanerup oquk pinngitsoortissinnaavaa.

Oqoqalersimasoqarpat

Inigisanni oqoqalerneranik ilimatsaassaqaruit, tamanna uatsinnut nalunaarutigissavat. Taamaasiorsinnaavutit ini@ini.gl -mut allannikkut, 70 10 00-mut sianernikkut sumiiffinniluunniit INImut saaffiginninnikkut.

Nalunaarutiginninnerit uatsinnit tiguneqareerpat, nakkutilliisumit orninneqarumaarputit oqoqalerfiusutullu isumaqarfigisanni, misiligutinik tigusisoqassaaq. Tassanilu oqoqalersimanerup annertussusaa nakkutilliisumit nalilerneqassaaq.

Nakkutilliisup sukkanerusumik ajornannginnerusumillu naliliinissaa pillugu, qinnuigissavatsigit nakkutilliisup takkutinnginnerani iluarsaassereerlutillu eqqiaasimassasutit.

Pisariaqalersimappat oqummik ilisimasalimmut misissugassanik nassiussisinnaavugut. Inigisanni oquup sorliunera ulorianartuunersorlu, ilisimasallip takusinnaavaa.

Sapaatit akunneri pingasut sisamallu kingorna misiligutinut akissummik tigusaqassaagut. Akissutip imarissavai misiligut oqoqarnersoq oqoqannginnersorluunniit. Kingunerisaanillu nakkutilliisoq innersuussutaasut malillugit suliakkiissaaq.

Suliakkiinerit ukuusinnaapput:

• Klorin-imik eqqiaaneq
• Sanaartornermi atorneqarsimasunik taarsersuineq
• Illumik iluarsaaneq

Pigisannik ajoqusertoqarsimappat, pigisanut sillimmatit atorlugu pigisatit taarserneqarsinnaapput. Assersuutigalugu inigisanni parnaaqqasumi tillittoqarsimappat, ikuallattoqarsimaneranik imermilluunniit pigisatit aserorsimappata sillimmamminngaanniik taarsiivigitittoqarsinnaasarpoq.

Pigisanut sillimateqanngikkuit pigisavit taarsernissaat nammineerlutit akilissavatit, aningaasanillu ikiorserneqarsinnaanak.

Illu piginnittunit sillimmaserneqarnikuuvoq. Illilli pigisavit sillimmasernissaat nammineerlutit akisussaaffigaat.

Pigisanut sillimmatip matussusersinnaasai assigiinngillat, taamaattumik pisariaqartitsinerit eqqarsaatigilluassavat, taannalu aallaavigalugu pigisanut sillimmammik toqqaallutit.

Terissat putukkut 7 mm-risut mikitigisukkut pulasinnaapput (Aqerluusatut amissusilikkut) aammalu qammasissiatigut - iikkatigullu qisutsigut ajornaquteqanngitsumik majuarsinnaallutillu ammukarsinnaapput.

Pinngitsoortitsineq

Inigisanni teriaqalernissaaralua annikillisissinnavat, inigisavit eqqiluitsuutinneratigut. Igitassat uninngateqqaarnissaat pinngitsoortinniarlugu nakkartitsivikkut eqqaaveqarfinnulluunniit erngertumik igittakkit, nerisassat tipiliortut terissanut narajaasarmata.

Silatinni imerpalasumik kuisuugaqartoqarsimappat igitassanilluunniit nakkartoqarsimappat, piiarneqapallattariaqarput salinneqartariarlutillu, aamma taakku teriaqalersitsisinnaammata.

Teriaarutsitsineq

Inissianni teriaqalersimappat pisarineqartariaqarpoq.

Inigisanni teriaq putuliorsimappat, terissanut pullatiliissaatit. Terissap putuliaa matuinnaraluarukku, teriaq inissiamiiginnartissinnaavat inissiamilu allanik putuliortilerlugu.

Terissanut pullatinik pisiniarfinni pisisinnaavutit. Terissanut pullatit ilaat namminerisamik tipeqarput, taamaasilluni narassiinissaq pisariaqarani.

Isumassarsiatsialaassaaq terissamut pullatip kiisartua, iikkamut sammisumik inississallugu.

Teriaq pisarissagaanni nerisassanik sivisuumik tipiliorsinnaasunik atuinissaq pisariaqarpoq. Teriaq narasserniarlugu nerisassat makku atorneqarnissaat isumassarsiatsialaapput:

• Seqquluttuaqqat
• Pølse pujuugaq (Spegepølse)
• Qaqqortarissanik punniliaq
• Sukkulaat
• Qaqqortarissat
• Paarnanik qallersuusiat

Inissiami attartortuugaluarlutit - kissaatit naapertorlugu inigisanni allanngortiterinissamut pitsanngorsaanissamullu periarfissaqarputit. Tamanna atuisinnaatitaanermik taaneqartarpoq.

Allanngortiterilersinnalli uatsinnit akuersissummik pissarseqqaassaatit.

Isumaqalersimaguit inigisat iluarsartuunneqartariaqalersimasoq, iluarsartuussisoqarnissaanut qinnuteqarnissamut periarfissaqarputit.

Allanngortiteraluni suliaqarneq

Inigisanni allanngortiteraluni suliaqarneq, ilinnut iluaqutaasinnaavoq allanulli kingusinnerusukkut attartulersussanut taamaattariaqanngilaq. Soorlu assersuutigalugu:

• Errorsivinnut attavinnik ikkussuineq
• TV-antenne-mik ikkussineq
• Atortunik ikkussuineq

Allanngortiterinerimmi attartortunut tamanut iluaqutaaneq ajorput, pissutigalugu:

• Allanngortitinerit nammineerluni akiligassaammata
• Allanngortitersimasatit ilusaattut ilerseqqillugit iluarsartuunneqarsinnaassapput. Inimi allanngortitersimasatit, nooreernerpit kingorna iluarseqqinneqarsinnaajunnaarlugit allanngortiterneqarsimassinngillat
• Inip suliareqqinneqarnissaanut atorneqartussanik, ineqarnermut qularnaveeqqummik akiliissaatit. Inissiamilli nooreernerpit kingorna allanngortitereqqinnissaq pisariaqanngippat, qularnaveeqqummut akiliutigisimasatit ilinnut utertinneqassapput

Pitsanngorsaaneq

Inigisanni pitsanngorsaallutit suliaqarnerit, attartortunut tamanut iluaqutaasinnaapput.

Makkuusinnaapput:

• Termostatventilimik ikkussineq.
• Igaffimmik, errorsisarfimmik, uffartarfimmik imaluunniit perusuersartarfimmik iluarsartuussineq.
• Ikkussukkanik, perusuersartarfinnik, errorfinnik aamma blandingsbatterinik taarsersuineq.
• Igaffimmi, errorsisarfimmi, uffartarfimmi imaluunniit perusuersartarfimmi pequtinik, sikaavinnik nerriviusanillu taarsersuineq.
• Qaammaqqutissanut atortunik kiisalu innaallagianut kappuffinnik ikkussuineq.
• Emhættinik milluaasulinnik ikkussineq.
• Atisaajartarfinnik igalaat saavaniittussanik ilitsivilersuineq.
• Aneersuartarfiliorneq.
• Igalaanik matunillu silarlernik taarsersuineq.
• Pinnersaasiorneq imaluunniit matuliineq.
• Ukioq kaajallallugu imeqalernissamik ikkussineq. Allanngortiterinerit nammineerlutit akilissavatit, kingusinnerusukkut attartortussamut iluaqutaasinnaammat – aammali inip aningaasatigut nalinganik qaffassutaasinnaammat – pitsanngorsaallutit aningaasartuutigisimavit ilaat nuukkuit utertinneqarsinnaapput.

Allanngortiterineq illit nammineerlutit akilissavat. Kisiannili attartortussanut pitsaaqutaasussaammata – aamma inigisap naleqarneranut iluaqutaassammat – inigisannit nuukkuit pitsanngorsaanermut aningaasartuutit atukkavit ilaat utertinneqarnissaannut periarfissaqaratarsinnaavutit.

Qinnuteqaat

Allanngortiterinissamut- pitsanngorsaanissamilluunniit suliaqarniaruit, qinnuteqaasiussaatit.

Qinnuteqaat makkuninnga imaqassaaq:

• Pilersaarutip teknikkikkut nassuiaasersornera.
• Pilersaarutip aningaasatigut nassuiaasersornera.
• Atortussat atorusutatit pillugit nassuiaasersuineq.
• Atortussavit pitsaassusaata nassuiaasersorneri.
• Qalipaatit atorusutatit pillugit nassuiaasersuineq.
• Suliap piffissalersornera.

Qinnuteqaat ini@ini.gl -mut nassiussinnaavat, sumiiffigisanniluunniit INImut ornigullutit tunniussinnaavat. Tamatumap kingorna, inissiami allanngortiterisinnaanersutit pitsanngorsaasinnaanersutilluunniit nalunaarfigiumaarpatsigit.

Inissialiornermut tapersiissuteqartarneq aqqutigalugu illuutilittut, suliassamik suliarinninnerput pillugu naammagittaalliornissamut pisinnaatitaavutit, tamannalu pissaaq allakkatigut.

Allagaq nassiunneqarsinnaavoq bs-afdelingen@ini.gl -imut imaluunniit INImut aamma nunaqarfiup allaffianut Sullissivimmut tunniunneqarsinnaavoq.

Assersuutigalugu aalajangiinerit makkununnga tunngasinnaapput:

• Allat piginnittuunngornissaat pillugu qinnuteqaat
• Taarsigassarsiat naatsorsuusiorneqarnerat pillugu
• Naafferartumik akilersuinissamik aaqqissuussinissaq pillugu qinnuteqaat

Aalajangiineq suliarput naammagittaalliutiginiarukku, allakkatigut naammagittaalliummik sanassaatit. Naammagittaalliuut minnerpaamik ukuninnga imaqartinneqassaaq:

• Illit isumaqatigiissuteqarsimanerit pillugu paasissutissat
• Aalajangiineq naammagittaalliutigiumasat pillugu nassuiaat

Matuma saniatigut uppernarsaatit suliamut tunngasut tamaasa ilanngullugit nassiutissavatit. Assersuutigalugu tassaasinnaapput:

• Qinnuteqaatit
• Aalajangiineq naammagittaalliutigiumasat
  

Sullinneqarnerit pillugu imaluunniit sullinneqarnerpit inernera pillugu maalaarutiginiarukku  Ineqarneq pillugu maalaaruteqartarnermut allagaqassaatit. 

Attartortoq Ineqarneq pillugu Maalaaruteqarfimmut ukua paasissutissat ilanngullugit malaaruteqarsinnaavoq:

- Ineqarnermut akiligassanik qaffaaneq pillugu nalunaaruteqarneqarneq pillugu.

- Aserfallatsaaliuinermut iluarsartuussinermullu.

- Najukkamut nutsernermi qanoq issusaa pillugu.

- Attartukkami ikkussuussat iluarsartuussallu pillugit (atuisinnaatitaaneq).

- Attartortup attartukkamik atuinera (maleruagassanik unioqqutitsinerit).

- Attartorsinnaanermi pisinnaatitaaffiup allamut ingerlateqqinnerani (najukkamik paarlaaqatigiinneq, attartortitsineq attartukkamillu ingerlatsiinnarneq).

- Nutsernermi najukkap qanoq innera (nalinginnaasumik iluarsaassineq).

Maalaaruteqarusukkuit ataaniittoq immersugassaq immersoriarlugu nittartakkakkut (MitID piumasaqaataavoq) nassiussinnaavat, imaluunniit immersugassaq immersoriarlugu anisikkukku uunga nassiullugu: maalaarut@nanoq.gl

Sullissivik, Ineqarneq pillugu Maalaaruteqarfimmut immersugassaq