Nutaarsiassat

  • 19.052022maaji

    INI aamma Domea.dk isumaqatigiissusiorput

    Kalaallit inissiaqarnikkut allaffissuussisuat INI aamma Domea.dk suliffeqarfittut isumaqatigiissuteqarput. INIp najoqqutaminut atatillugu Domea.dk-p misilittagaqarnera atorlugu, Kalaallit Nunaanni attartortut iluaqutigiligassaannik inerisaanissaq aalajangiunneqarpoq.

    Namminersorlutik Oqartussat nunallu kommuniisa inissiaatai 9.000-it missaaniittut INIp allaffissuussarai. Namminersorlutik Oqartussanut kommuninullu Kalaallit Nunaanni inissiaqarnikkut politikkikkut unammilligassanut aaqqiissuteqarniarnermini suliffeqarfik najoqqutassiornikkut suleqataasutut ineriartornissaminik ukkataqarpoq. Tamatumalu saniatigut INIp najoqqutamini suliffeqarfiup digitalinngorsaanikkut inerisaanissani atuisunullu atoruminarsakkanik aaqqiissusiornissani ukkataraa.

    Taamaattumillu INIp Domea.dk ikiortiserisimavaa, akunnerminnilu piffissami sivitsulersumi pitsaasumik oqaloqatigiinnerit ingerlasimapput. Domea.dk-llu suliffeqarfittut ilusaa nalinginnaasumillu assingusunik suliaqarnermi misilittagaqarnera pissutigalugu, INIp najoqqutaminik inerisaanissaminut ikorfartuisussatut suleqatigilissallugu toqqarsimavaa:

    ”Domea.dk-lu suleqatigiilernissarput qilanaarisimavarput. Taamalu misilittagartutigisumik Domea.dk-tut ittumik peqateqarnitsigut INImut attartortutsinnullu iluaqutaasussamik ineriartortitsinissarput naatsorsuutigaarput”, INIp allaffissornikkut pisortaanera, Henrik Rafn taama oqarpoq.

    Ataatsimuussutsip nukittuup ilaa

    Ataatsimuussusermut nukittuumut, Danmarkip annersaani inissianik ataatsimut piginnittuunngikkunik allaffissuussisut 70-it missaanniittut Domea.dk-p sullissaasa peqataaffigisaannut, INI suliffeqarfittut sullinneqartunut akuulissaaq.

    Domea.dk-milu allaffissornikkut pisortaanerup Thomas Holluf Nielsen-ip INI tikilluaqqulluarlugu suleqatigiilernissartik qilanaareqaa.

    ”Suleqatigiilernissarput pissanganarluinnartuuvoq INIllu tatiginninnera tulluusimaarutigaara. Danmarkip annersaani sullissaqalereernikuuvugut, ataatsimoornerullu iluaqutissartai malugilluareernikuullutigit. Taamaammallu alutorsaatigisorujussuuara INI peqatigilerneratigut siammasinnerusumik, allaallu nunat killeqarfii qaangerlugit suleqatigiilertussanngoratta”, Thomas taama oqaluttuarpoq.

    Kalaallit Nunaat Danmarkillu akunneranni piorsarsimassutsikkut, aaqqissugaanikkut ingerlatsinikkullu assigiinngissuteqartorujussuuvugut. Aammali assigiissuterpassuaqarpugut, tamannalu pillugu Thomas Holluf Nielsen aperigaanni INImut Domea.dk-mullu peqatigiilerneq siunertaqarluarpoq:

    ”Domea.dk-mit sullinneqarnermi periuseq ataasiinnaanngilaq. Sullissat ilai ataatsimoorfiusumit sullissinermik siunnersorneqarnermilluunniit pisisarput, soorluttaaq uani taamatoqqinnaaq pisoqartoq, ilaasalu allaffissuunneqarneq tamaat pisiarisinnaasarlugu. Sullissagullu tamarmik assigiinngisitaartuupput assigiinngitsunillu pisariaqartitaqarlutik. Pingaaruteqarnerpaarli tassaavoq ataatsimuussusermik nukittullunilu pikkorissorpassuarnik peqataasoqarfiusumik eqaatsumillu iluarsiissuteqarfiusumik ataasiakkaat pisariaqartitaat naapertorlugit neqerooruteqarsinnaanerput. Taavalu Svendborgimi, Holstebromi Sisimiuniluunniit angerlarsimaffeqarneq apeqqutaanngimmat,” Thomas akivoq.

    Namminersorlutik Oqartussat nunallu kommuniisa annerpaartaasa inissiaatai 9.000 missaaniittut INIp allaffissuussarai.

    Namminersorlutillu Oqartussat INI pilersissimavaat assigiimmik allaffissuussinissaq inissianillu attartortittakkanik ataqatigiissumik aaqqissuussamik aserfallatsaaliuinissaq kissaatigalugu, taamaaliorsimallutillu 1994-miilli.

    INIllu suliffeqarfittut sullissarilerneratigut, Domea.dk-p sullissat 70 missaanniittut ataatsimoorlutik piginnittoqanngikkunik inissianut 80.000-inut allaffissuussisut siunnersuinermik allaffissuussinermillu sullisilerpai.

  • 20.042022apriili

    Imermut kiassarnermullu naatsorsuutit saqqummiunneqarnissaat pillugu nalunaarut

    Najugaqartut imermut kiassarnermullu atuinerisa naatsorsorneri imminut kiffartuussivikkut saqqummersinneqarnerat ukioq kingulleq iluatsilluarnikooqimmat, aammaarluta ukioq manna imminut kiffartuussivikkut 27. april 2022 saqqummiuteqqissavagut.

    Attartornermut akiliutinnit anginerusumik utertuugassaqaruit, attartornermut akiligassanut tulliuttunut utertuukkatit agguataarneqassapput.

    Imminut kiffartuussivimmut isertaatinnik ajornartorsiuteqaruit, sullitanut siunnersortimik oqaloqatiginninnissannut piffissamik inniminniissaatit.

    Attartortuusimaguillu utertuugassaqarlutillu aningaaserivippit eqqortup nalunaarutiginissaa eqqaamassavat, pissatit tunniunneqarsinnaaniassammata.

    Attartortuusimasunut atuinermut naatsorsuutit allakkatigut nassiunneqassapput.

    Atuinermut naatsorsuutit pillugit apeqqutissaqaruit 70 10 00-mut nal. 9.00-ip 12.00-illu akornanni sianissaatit mailerlutilluunniit ini@ini.gl-imut.

  • 03.112021novembari

    INIp misiliutitut suliniutaa Meeqqat oqartussaaqataanerat naammassiartungajalerpoq

  • 29.102021oktobari

    INIp Nanu Meeqqat suliniutaa tapersersorpaa

  • 16.082021aggusti

    Attartortut naammagisimaarinninnerannik misissuineq

    Pitsanngorsaanissatsinnut ikiortigut. 

    Suna pitsaaninngortissinnaaneripput oqaluttuutigut. Apeqqutillu akisassat atorlugit taamaaliussaatit. Minutsialunnguit kisiisa atorlugit immersorneqarsinnaavoq. 

    Apeqqutit akiassat uani nanikkit: https://da.surveymonkey.com/r/XHT37NY

    Apeqqutit akiassat pillugit saaffiginnissutit akisinnaanngilagut, saaffiginnissutissaqaruillu ini@ini.gl-imut allaffigaluta 70 10 00-mulluunniit sianerlutit attavigisinnaavatsigut.